འབྲོག་རུ་རྡོ་རྗེ་འཚོ། བྱ་མདོ་མར་ལོ། 2019-06-28
སྟག་མཚེར
ཤིན་ཏུ་མཐུག་པའི་མུན་པ།
མེ་ལོང་རྫུན་མ།
ཚོན་ཉེས་བྱུང་བའི་ལྡེབས་རིས།
འདི་དག་མགོ་མཇུག་བསློགས་ཏེ་བཙལ་ན།
ཁྱོད་རྙེད་ཐུབ།
ཞབས་རྗེས་ཤིག་གི་ཚུར་རོལ།
དྲན་གདུང་གི་ནམ་མཁའ་འཁྱག་ཏོ།
ལ་མོ་ཁྲི་སྟོང་བརྒལ་འགྲོ་བའི་
སེམས་ཀྱི་གཤོག་པ།
སྟག་མཚེར།
སེམས་ཀྱི་གཤོག་པ།
ཁྱོད་ནང་བཞིན་རི་རྩེ་འདི་ནས་རྨི་
ལམ་གྱིས་མནར་སོང་།
ལམ་ཕྲན་སྟེང་གི་ར་བཟི་བའི་མི།
སྙིགས་སྒམ་སྟེང་གི་ཡིག་ནོར་དང་
སྐྱག་སྦྲང་ལྡོམ་པོ།
དར་ལྕོག་དང་རླུང་རྟའི་རྒྱབ་ཀྱི་
འདམ་བག་གི་ངོ་གདོང་།
སྟག་མཚེར།
ཁྱོད་དང་འུ་གཉིས་ཀྱི་ནམ་མཁའ་
འདི་ཤིན་ཏུ་འཁྱག་ཨང་།
རི་རྩེ་འདི་རུ་ཁྱོད་གཅིག་པུས་ང་ལ་
མཐའ་མཇུག་གི་དྲོད་ཁོལ་སྦྱིན་ཐུབ་པར་སྨོན།
རྩོམ་གསར། 10