གྲུ་ཆུང་། 2019-06-10
ཁྱེད་ཀྱི་ཕྲག་པར་མགོ་བོ་བསྙེས་ཏེ།
སྙིང་གཏམ་དམར་པོ་ལྷོག་ལྷོག་བཞུར་དུས།
ངས་ཁ་ཞེ་གཉིས་མེད་ཀྱི་སྙིག་གཏམ་མཐའ་དག
བཤད་ས་ཁྱོད་ལས་གཞན་སུ་སྙམ་ཡོད།
ཁྱོད་ཀྱིས་ང་ཉིད་ཉི་མ་བཞིན་དུ་བཀུར་ཞིང་།
རང་ཉིད་ཉི་དགའ་མེ་ཏོག་བཞིན་དུ་འཁོར་དུས།
ཡོད་ཚད་ཡིད་དུ་འོང་།
ཁྱོད་ནི་ངའི་འཇིག་རྟེན་གྱི་གོ་ལའི་སྲོག་ཤིང་བཞིན་དུ།
ངའི་ཡོད་ཚད་ཁྱོད་ཀྱི་ཕྱོགས་སུ་བསྟུན་དུས།
ཐམས་ཅད་གཅེས་སུ་འོས་པར་འགྱུར།
ཁྱོད་ཀྱིས་ང་ཉིད་རང་གི་བྲང་ལ་སྦྱར་ཞིང་།
རང་གི་སྟོད་ལྭ་ཕུད་ནས་ང་ལ་བསྐོན་ཏེ།
ལག་ཟུང་བརྐྱངས་ཏེ་དམ་པོར་འཁྱུད་དུས།
ངས་བདེ་སྐྱིད་ཅེས་པ་ནི་རང་ཉིད་ཁོ་ནས་ཚོར་སྙམ་ལ།
འཇིག་རྟེན་ཡང་ཉམས་དགའ་བ་ཞིག་ཏུ་སྣང་།
མི་ལོ་ཁ་ཤས་ཀྱི་རྗེས་སུ།
རྟག་བརྟན་དུ་སྙམ་པ་རྟག་བརྟན་ཡང་མ་ཡིན་ལ།
དམ་ཚིག་ཀྱང་ལོ་ཟླའི་རླུང་ཆེན་གྱིས་བསུབས་སོང་།
དགའ་བ་དང་བརྩེ་བ་ཇི་འདྲའི་ཟབ་ན།
དེའི་ལྡོག་ཕྱོགས་ཐ་སྙད་ཀྱི་རྣོ་ཡང་དེ་ལྟར་བུད་དེ།
ང་ཉིད་མུན་ནག་གི་རྒྱལ་མོར་བཞུགས་མྱོང་།
གཏི་མུག་གཉིད་ཀྱི་ཁ་གཏད་དུ་འགྲེངས་ནས།
ཁྱོད་ཀྱི་མིང་ནས་ཡང་ཡང་བོས་ཤིང་ཡང་ཡང་ངུས།
སྟོང་འདང་དང་འཇིགས་སྐྲག
སྨྱོན་པའི་བསམ་ཚུལ་སོགས་ཀྱིས་ང་ལ་གཡབ་མོ་མང་དུ་བྱས།
འོན་ཀྱང་ང་ཡི་དད་མོས་དང་ང་ཡི་གྲོགས་པོ།
ངའི་མཐའ་ཁོར་གྱི་རྩྭ་རྩི་ཤིང་མང་པོས།
ང་ལ་སེམས་གསོའི་བརྗེད་ཆུ་བླུད་པས།
ངས་་་་་་་།
ལྟ་བ་རྒྱང་མཐོང་གི་མིག་རྩ་བཙན་གྱིས་བཅད་དེ།
ཉན་པ་རྣ་རིང་གི་ངལ་བ་ཧུར་གྱིས་བླངས་པ་ན།
ཁྱོད་ཀྱི་འཇིག་རྟེན་གྱི་བདག་མོ་དེ།
ཁྱོད་ཀྱི་གཉའ་བར་རྟ་བཞིན་ཞོན་ཚུལ་ཐོས།
དེ་དུས་ཀྱང་ངའི་སེམས་ལ་བརྣག་པའི་སྐད་ཆ་དག
ཤེལ་གྱི་གོང་བུར་ཆགས་ནས་མིག་ཟུང་ནས་ས་གཞིའི་པང་དུ་ལྷུང་།
ཁྱོད་ཀྱང་ས་ཡི་གོ་ལར་གནས།
ང་ཡང་ས་ཡི་གོ་ལར་འཐམས་ནས།
ཉི་ཟླ་གཅིག་འདྲའི་འཁོར་སྐྱོད་དང་དྲོད་ཁོལ་ལ་རོལ་བཞིན།
དབྱང་རླུང་ཞེས་པའི་ཁ་དབུགས་གཅིག་ལ་བརྟེན་ནས།
ཚེ་སྲོག་ཅེས་པའི་འགྲུད་བཞུད་ཅིག་གི་སྣེ་ལ་འཇུས་ཏེ།
རྒྱུས་ཡོད་ཆ་མེད་དུ་གྱུར་བའི་བརྩེ་དུང་གི་ཆོས་ཉིད་ཅིག་བསླབས།
འུ་གཉིས་ཀྱི་ལོ་ཐོའི་ཤོག་གྲངས་རེ་རེ་བཞིན་འདས་རྗེས།
ཡོད་ཚད་མཉམ་འབྲེལ་དང་བཙན་སྐུལ་གྱི་ཞགས་པས་བཅིངས་ལ།
དེ་ནས་ཟུར་གསུམ་དང་གྲུ་བཞི་མའི་འཇིག་རྟེན་ཞིག་ལ་འཁྲེང་པར་གྱུར།
རྩོམ་གསར། 10