ཐུབ་བསྟན་བཀྲ་ཤིས། 2019-04-11
རྟག་བརྟན་བདེན་གྲུབ་དབེན་བའི་སྲིད་པ་ནས།།
བཅོས་མིན་མི་འགྱུར་ཆོས་ཤིག་ཡོད་མིན་པས།།
རེ་འཇོག་མེད་པར་སྐད་ཅིག་ཉིད་ལས་འདའ།།
མི་རྟག་སྒྱུ་མའི་རྒྱལ་པོས་ཁ་ལོ་བསྒྱུར།།
སྤྱད་པས་ངོམ་པ་མེད་པའི་སྲིད་པ་ནས།།
མ་རིག་མུན་པས་འཐིམ་པའི་ལུས་ཅན་ང་།།
ཉོན་མོངས་དགྲ་ཡིས་ལུས་སེམས་དམ་པོས་འཆིང་།།
རྣམ་གཡེང་བྲན་དུ་གྱུར་ནས་ཉི་མ་འདའ།།
དུས་ཀྱི་སྦྲན་སོགས་གང་ཡང་ཡོད་མིན་པ།།
ལྗང་མདོག་ཡུལ་ལ་སེར་མདོག་མདངས་ཀྱིས་སྤྲས།།
མཛེས་སྡུག་དཔལ་གྱིས་ཕྱུག་པའི་དབྱར་ཁ་དེ།།
བཅུད་ལྡན་དུས་ཀྱི་ཞགས་པས་དམ་དུ་བསྡམས།།
ལུས་ལ་དགའ་བ་སྩོལ་བའི་དྲོད་རླུང་དེ།།
རྩུབ་པོ་སྲིན་མོ་ཞིག་གི་གཤིས་སུ་གྱུར།།
བྱམས་དང་སྙིང་རྗེ་ཨེན་ཙམ་ཡོད་མིན་པ།།
གཡུ་ལོའི་ལང་ཚོ་བཅོམ་ནས་གཅེར་བུར་བསྒྱུར།།
འཕུར་ལྡིང་གར་ལ་བྱང་བའི་འདབ་ཆགས་ལ།།
བཟོད་ཐབས་མེད་པའི་གྲང་བཀྲེས་སྡུག་བསྔལ་བྲིམས།།
འཛུམ་མདངས་ཞལ་རས་གང་བའི་ཤེད་བུ་ཡང།།
དྲག་པོ་ཁྲོས་པའི་ཞེ་སྡང་གདོང་གཅིག་བཞིན།།
རྩོམ་གསར། 10