ཁམས་ཚེར་མདའ། 2019-03-04
ཨོཾ་སྭ་སྟི།
དགེ་ལེགས་ཆར་འབེབས་ཞི་བ་དམ་པའི་ཆོས།།
འགྲོ་བློའི་མུན་སེལ་རིག་གྲོལ་བྱེ་བའི་མཛོད།།
དོན་གཉིས་མཐར་ཕྱིན་སྟོན་པ་རྫོགས་སངས་རྒྱས།།
མཆོག་གསུམ་འདུས་ཞལ་དྲིན་ལྡན་བླ་མར་འདུད།།
རབ་འབྱམས་ཆོས་ཚུལ་མུ་མཐའ་ཀུན་བྲལ་སུས་ཀྱང་གཞལ་དཀའ་བདེན་པའི་དོན།།
སྐད་ཅིག་གཅིག་གིས་བྱེ་བྲག་འབྱེད་མཛད་འགྲོ་བློའི་མུན་པའི་དཔུང་འཇོམས་ཤིང་།།
ལུས་ཅན་འཁོར་མཐའ་དབྱིངས་སུ་དག་ཅིང་བདེ་ཆེན་གདོད་མའི་གཞི་ཀློང་ནས།།
རྣམ་གཉིས་གཟུགས་སྐུའི་རོལ་བ་འབུམ་སྩོལ་རྒྱལ་བའི་ཡུམ་གྱུར་དབྱངས་ཅན་མ།།
དྲི་མེད་དུང་མདོག་ཟླ་བའི་མཛེས་སྡུག་ལས།།
རྣམ་པར་དཀར་བ་གཞོན་ནུའི་སྐུ༵་ལུས༵་ཅན།།
སྒེ༵ག་ཉ༵མས་འདབ་སྟོང་གཡོ་བའི་ལ༵ང་ཚོ༵་ལ།།
མཚན་དཔེའི་གཟི་འོད་འབར་བའི་ཟེ་འབྲུ་རྒོད།།
གནག་སྣུམ་ཐོར༵་ཙུག༵ས་སྤྲིན་བྲལ་ལྷ་ལམ་དུ།།
རིན་ཆེན་རྒྱན་གྱིས་མཛེས་པའི་རྩེ་ཕྲན་སྟེང་།།
ཡིད་འོང་ཟླ༵་ཚེས༵་ཡེ་ཤེས་འོད་འབར་བས།།
འགྲོ་བའི་གཏི་མུག་གཏན་དུ་སེལ་བར་བྱེད།།
མཐོང་བས་མི་ངོམས་ཞལ༵་ཁྱིམ༵་ཡངས་པའི་མཁར།།
འདྲེན༵་བྱེད༵་འཇའ་སྤྲིན་གཡོ་བའི་སྟངས་སྟབས་ལ།།
བལྟ་བར་ལྷགས་པའི་སྨིན༵་མ༵འི་རོལ་གར་ལས།།
ལྡེམ་འཕྲུལ་མཛེས་མའི་མཆོད་ཕྲེང་ཡིད་དུ་འོང་།།
མཁུར༵་འཛུམ༵་དགྱེས་ཆགས་སློང་བའི་སྐྱེད་ཚལ་དུ།།
ཤ༵ངས་མཐོ་ཀུ་མུད་སར་བའི་འདབ་གཤོག་གྲོལ།།
རབ་དམར་མ༵ཆུ་སྒྲོས༵་འཛུམ༵་མད༵ངས་གསལ་བ་ལས།།
བཞི་བཅུའི་ཚེ༵མས་འགྲིག་པད་དཀར་ལང་ཚོ་བཞད།།
རྗེས་ཆགས་ཐུགས་སྨོན་ཟབ་མོའི་བདེན་མཐུ་ཡིས།།
ཡངས་ཤིང་སྲབ་ལ་དམར་བའི་ལྗ༵གས་རླབས་ལས།།
དྲུག་ཅུའི་དབྱངས་ཀྱིས་བཏེག་པའི་ཟབ་མོས་ཆོས།།
དུས་སུ་སྟོན་པའི་བསྐལ་བཟང་ཀུན་ནས་གསལ།།
མི་འཛད་ཡོན་ཏན་ཕྱོགས་མཐར་རྒྱས་པའི་དཔལ།།
རབ་མཛེས་སྙ༵ན་ཤལ་མགུལ༵་དང་ཕྲ༵ག་པ་ལ།།
སྣ་ཚོགས་དར་དང་རིན་ཆེན་རྒྱན་ཕྲེང་རྣམས།།
མཛེས་པར་ཀླུབ་པས་སྐྱེ་དགུའི་ཡིད་དབང་ཕྲོག།
དར་གོས་ཕྱང་ཕྲུལ་རིན་ཆེན་འབར་བའི་ཟླར།།
དཀར་ལ་འཇམ་མཉེན་ལ༵ང་ཚོ༵འི་མཚ༵ན་མ༵་ཡིས།།
འཕགས་ནོར་ཡིད་ལ་རེ་བའི་འདོད་རྔམས་ལ།།
ཟག་བྲལ་དགྱེས་དགུའི་ཡོ་བྱད་ཀུན་ནས་འཇོ།།
བདེ་བའི་དཔལ་སྟེར་ཕྲ་བའི་སྐེ༵ད་སྐ༵བས་སུ།།
མི་མཐུན་འགལ་བའི་ལྷག་མ་འཇོམས་པ་ཡི།།
ཟབ་ལ་གཡས་འཁྱིལ་ལྟེ༵་བ༵འི་དཔེ་བྱད་ལས།།
མི་འབྲལ་བརྩེ་དགའི་ཟེགས་མ་རྟག་ཏུ་འཐོར།།
སྨད་དཀྲིས་ཤམ་བུའི་འཕུར་ལྡིང་བྲེས་པ་ཡི།།
མཆོག་ཏུ་རྒྱས་པའི་སྟ༵་ཟུར༵་རྣམ་པར་ཟླུམ།།
བདེ་བའི་རླན་འཆང་གས༵ང་བ༵འི་འཁོ༵ར་ལོ༵་ལས།།
ལྷན་སྐྱེས་དགའ་བའི་རོ་མཆོག་ཅིར་ཡང་འགྲེམ།།
ཡོངས་སུ་དཀར་བའི་བརླ༵་དང་བྱི༵ན་པ༵་དག།
ཟླུམ་ལ་རྒྱས་ཤིང་བྱིན་གྱིས་ཕྲ་བས་མཛེས།།
ལོ༵ང་བུ་༵མི་མངོན་མཉམ་པའི་ཞ༵བས་མཐི༵ལ་ཡང་།།
དམར་མདངས་མཛེས་པས་དགའ་བ་ཀུན་ལ་སྟེར།།
ཕྱ༵ག་ཞ༵བས་དཔུང༵་དང་སོ༵ར་མོའི་དཔྱིད་དཔལ་དུ།།
རིན་བྲལ་རིན་ཆེན་སྙིང་པོར་ལྷུན་ཆགས་པ།།
རྣམ་པར་མཛེས་པའི་གདུབ༵་ཀོ༵ར་གཡོ་བ་ལས།།
སྙན་པའི་སིལ་སྒྲས་འདོད་པའི་རེ་བ་སྐོང་།།
མི་འབྲལ་ཆ༵ས་གོ༵ས་རེག་འཇམ་བདེ་བའི་གཏེར།།
སྣ་ལྔའི་ད༵ར་ཚོ༵ན་མཛེས་སྡུག་འོད་འབར་ཞིང་།།
དད་གུས་འདུན་པ་སློང་བའི་འཕྱང༵་འཕྲུལ༵་ཡང་།།
ས་གསུམ་མིག་དབང་བསུ་བའི་གཉེན་དུ་ཆགས།།
མི་དང་ལྷ་ཀླུའི་བསོད་ནམས་ལས་ཆགས་པའི།།
ངོ་མཚར་རིན་ཆེན་འབར་བའི་རྒྱ༵ན་ཕྲེ༵ང་གིས།།
ཡིད་འོང་ཉམས་བརྒྱ་འབར་བའི་སྟ༵ངས་ཀ༵་ལ།།
ཆགས་བྲལ་དྲང་སྲོང་དག་ཀྱང་བློ་རྩེ་གཡོ།།
རྒྱལ་ཀུན་ཡུམ་གཅིག་རྒྱ༵ལ་སྲ༵ས་སེ༵མས་མ༵འི་ཚུལ།།
དྲན་དང་ཐོས་པའི་བསོད་ནམས་བག་རེས་ཀྱང་།།
ཐོག་མེད་སྙེིང་ལ་ཡིབ་པའི་རྨོངས་མུན་ཀུན།།
རྣམ་པར་གཞོམ་ལ་རྒྱལ་བས་བསྔགས་མིན་ནམ།།
ངག་ལ་དཔལ་སྟེར་ང༵ག་དབ༵ང་དབྱང༵ས་ཅ༵ན་མ༵ར།།
དད་ཅིང་གུས་པས་ཕྱག་མཆོད་ནོར་བུའི་གཏེར།།
ཡང་ཡང་བསགས་པའི་བསོད་ནམས་ལས་འོང་བ།།
རྣམ་འབྱེད་ཤེས་རབ་མཆོག་ཏུ་དགེ་བར་གསུངས།།
ཆགས་ཤིང་དགའ་བ་འདོད་པའི་སེམས་ཀྱིས་ཀྱང་།།
སྐྱབས་ཀུན་འདུས་ཞལ་ཤེ༵ས་ར༵བ་ལྷ༵་མོ༵་མཆོག།
དྲན་པའི་ཡུལ་དུ་ལན་གཅིག་བླངས་ན་ཡང་།།
སྲེད་ལས་འདས་ཞེས་དྲིན་ལྡན་བླ་མས་གདམས།།
སླར་སྨྲས་པ།
དམིགས་མེད་བརྩེ་བའི་ཏིང་འཛིན་ལས་བྱུང་ལྷུན་གྲུབ་ཕྱག་རྒྱས་རོལ་གར་ཅན།
མ་འོངས་འགྲོ་ལ་ཕན་བདེའི་དཔལ་སྩོལ་སྔོན་དང་ད་ལྟའི་བསོད་ནམས་ལས།།
ནམ་ཡང་མི་གཡོ་གཉུམ་མའི་ཕ་ཁྱིམ་གཏན་དུ་དབང་བའི་བསྐལ་བཟང་ཞིག།
བདག་དང་བདག་མིན་སེམས་ཅན་ཡོངས་ལ་རྟག་ཏུ་འཆར་བའི་རྒྱུར་གྱུར་ཅིག།
ཤེས་བརྩོན་རྒྱན་ཕྲེང་དྲི་མས་མ་བཏང་ཞིང་།།
དད་གུས་བཞིན་རས་ན་ཚོད་མ་སྨིན་པས།།
ཚིག་དོན་སྙོམ་ལག་རྒྱས་པའི་མཆོད་རྫས་ཤིག།
འབུལ་བའི་ལས་སྐལ་འདི་ཀོ་ན་ཕྲ་ཡང་།།
དགའ་ཞེན་མོས་པའི་རླབས་ཕྲེང་གཡོ་བའི་ཞིང་།།
རིག་གཞུང་ནོར་བུའི་དཔལ་ཡོན་མ་སྨད་པ།།
ཐོས་བསམ་གོམས་པ་གསལ་བའི་བློ་གྲོས་ཤིག།
རྙེད་འཚོལ་གཏམ་གྱི་འདུ་བྱེད་ཐོད་དུ་བླངས།།
ཞེས་བོད་རབ་རྒྱན་ས་ཕག་ཟླ༡པོའི་ཚེས༢༥བཟང་པོར་ཁམས་ཚེར་མདས་རྫོང་སར་བཀྲ་ཤིས་ལྷ་རྩེའི་ཉེ་གམ་དུ་སྦྱར་བ་དགེའོ།།
རྩོམ་སྒྲིག་པ། མགར་རྒྱལ་སྲས།
རྩོམ་གསར། 10