རྔ་བ་ཕུན་ཚོགས། 2018-12-03
འཆི་གསོན་ནི་སེམས་ཅན་སྤྱིའི་བརྒྱུད་པའི་སྤྱི་འགྲོས་བཞིན།
སྐྱིད་སྡུག་གི་ཁ་ངོར་དོད་པའི་རྒྱལ་ཕམ་ཟེར་བའང་།
ཉིན་མཚན་གྱི་འཆར་ནུབ་གསེང་ནས།
ང་ལ་བདེན་རྫུན་གྱི་ཐ་སྙད་འགྲེལ།
གྲང་འཁྱགས་ཀྱིས་ཤི་བཞིན་པའི་སྲིན་འབུ་དག
ང་ཡི་སྙན་ངག་གི་ཚེ་བླ་བླངས་སོང་།
མྱི་ཚེ་འདིར་ང་ལ་འགྱོད་པ་ཆེན་པོ་གསུམ་ཡོད།
ཡང་ན་ཕུགས་བསམ་ཆེན་པོ་གསུམ་ཡོད།
གང་ནས་ཡོང་བའི་རྐང་རྗེན་ང་ཉིད།
གང་དུ་ཡོད་པ་གསལ་བོར་ཤེས་ན།
ཤར་རིའི་ཕྱོགས་ལ་རྡོག་པས་མནན་འགྲོ།
དུས་གསུམ་གྱི་འདོད་པ་སྦྲུམ་པའི་ཁྱེད་ཉིད།
སོ་ལྟ་དང་གཟབ་ཉན་སྒོས།
ད་རུང་ཡོད་ཡོད་འདྲ་བའི་ཐག་རིང་ཞིག་ལ་འགྲོ་དགོས།
ཆར་རྗེས་ཀྱི་འཇའ་འོད་སྙིང་བོ་མེད་པ་བདེན་ཡང་།
མྱིས་ཅིའི་ཕྱིར་འཇའ་ཚོན་ཞེས་བཏགས།
ཆེན་པོ་དང་ཆེན་པོ་དག
འཇའ་འོད་ཀྱིས་བཏུམ་ཞིང་འཇའ་ལུས་ལ་ཐིམ།
ཡིད་འོང་གི་རླངས་སྨུག་སྐྱ་བོར་འཇའ་ཚོན་སྣ་ལྔ་རུ་བོས།
འཁོར་བ་ལ་སྙིང་བོ་མི་འདུག་མ་ཟེར།
འཁོར་བ་ནི་སྙིང་བོ་འཚོལ་བའི་གྲོང་ཚོ་ཞིག་ཡིན།
མྱི་ཚེ་ཟེར་བ་ནི་རིང་ཡང་ཆོག་ལ་ཐུང་ཡང་རུང་།
སྙིང་བོ་ལོན་ན་འཆི་གསོན་གྱི་ཐ་སྙད་རང་གིས་བྲིས་ཆོག
སྙིང་བོ་ནི་ཅི་ཞིག་ཡིན།
དེ་ནི་མྱི་ཚེ་ཅི་ཡིན་པ་དེའོ།
མྱི་ཚེ་ནི་ཅི་ཞིག་ཡིན།
ཁྱོད་ཀྱིས་ད་ལྟ་ཅི་བྱེད་བཞིན་པར་འདྲའོ།
དཀོན་མཆོག་ལགས།
ཁྱོད་ཀྱིས་རང་གིས་རང་ལ་དེ་ལྟར་བོས།
རྒྱུ་མཚན་ངས་ཁྱེད་ཀྱི་ལས་དབང་ལ་ཅི་ཡང་བྱ་མི་ནུས།
ཁྱོད་རང་མྱི་ཡུལ་གྱི་མགྲོན་པོ་ཡིན་པ་ཤིན་ཏུ་བདེན་ན།
ཉིན་ཞག་དང་ལོ་ཟླ་སྐར་མདའ་བཞིན་ལྷུང་བས།
མཚན་མོ་འདིར་ཁྱོས་ཟླ་བ་མི་མཐོང་ངམ།
ཞོགས་པར།
ཤར་རིའི་སྐེ་རྒྱན་དེ་ལའང་།
མྱི་ཡུལ་གྱི་ཉི་མ་ཟེར་བ་མ་ཤེས་སམ།
རྩོམ་གསར། 10