ཁ་དྲག 2018-11-12
ཚེ་ཡི་དར་ཤིང་འཛུགས་ས་དེ།།
འདང་གི་དར་སྐུད་འཐེན་ས་དེ།།
རླུང་བུའི་ནང་གི་དྲི་འདྲ་མིན།།
ཆར་བའི་རྗེས་ཀྱི་འཇའ་འདྲ་མིན།།
ཐབ་ལ་མེ་ཁ་གསོ་མཁན་དེ།།
རུམ་ལ་བྲོ་ཀ་བསྡུ་མཁན་དེ།།
གྲམ་པའི་ནང་ན་བཏུ་རྒྱུ་མེད།།
སྡོང་བོའི་མགོ་ན་གཏོག་རྒྱུ་མེད།།
ཐང་ནས་རྙེད་པའི་ཁྱིམ་མི་དེ།།
ཡིད་རྟོན་འཕེར་བའི་བློས་ཐུབ་དེ།།
བྱམས་དུང་དུས་ན་མ་དང་འདྲ།།
བརྩེ་འཛུམ་ཚེ་ལ་ལྷ་དང་འདྲ།།
ཚིག་མཚམས་སྐྱོང་བའི་དམ་ཅན་དེ།།
ལུས་སེམས་འབུལ་བའི་སེམས་དཔའ་དེ།།
ན་དུས་ཁྲག་གི་ཁ་སྣོན་ཡིན།།
རྨས་དུས་ཤ་ཡི་ལྷན་པ་ཡིན།།
བློ་དང་གྲོས་ཁ་སྡུར་ས་དེ།།
རྒྱབ་དང་དཔུང་བ་འཁེན་ས་དེ།།
ཁང་བའི་བྲག་ཅ་གཏོར་མཁན་ཡིན།།
གོམ་པའི་ཚད་གྲངས་ལེན་མཁན་ཡིན།།
མཛེས་པ་ཀུན་གྱི་མཐར་ཐུག་དེ།།
སྙན་པ་ཡོངས་ཀྱི་ཡང་རྩེ་དེ།།
མེ་ལོང་དགོས་པའི་རྒྱུ་མཚན་ཡིན།།
ཆོས་གོས་སྤང་བའི་གནས་ལུགས་ཡིན།
སྣང་བ་ཡན་སའི་བྲོ་ར་དེ།།
ངལ་དུབ་བསྐྱུངས་སའི་དགའ་ཚལ་དེ།།
ཚིགས་བཅད་བརྒྱ་ཡིས་མི་ཤོད་དོ།།
ཚོན་སྨྱུག་སྟོང་གིས་མི་ཕྲིས་སོ།།
རྩོམ་གསར། 10