རང་སེམས་སོང་བའི་མི་ལ།།

སེམས་ཐག་ཉེ་བའི་སྐད་ཆ།།

གློད་གློད་བཤད་པའི་དུས་དེར།།

ཚོར་སྣང་ཐོལ་ཐོལ་རྒྱས་བཞག།

སེམས་ཀྱི་མེ་ཏོག་པདྨ།།

མིག་གིས་ཚོར་ན་ཆོག་པ།།

སེམས་ཀྱིས་བཀླགས་ན་ཆོག་པ།།

སེམས་ཀྱི་ཕྱི་ནང་འདྲིས་སོང་།།

རང་སེམས་ལྷ་དར་དཀར་པོ།།

མ་ནོག་ཁྱེད་ལ་ཕུལ་ན།།

སེམས་ཀྱི་དྲན་ཤིང་ལྕི་མོ།།

ཚོར་བའི་རྐང་དུ་སིམ་ཤོག།

དཀར་གསལ་བཅོ་ལྔའི་ཟླ་འོད།།

ང་ཡིས་མིག་ལ་ཐོགས་ཏེ།།

མཚན་གྱི་ཟླ་བའི་འོད་སྣང་།།

སེམས་ཀྱི་དཀྱིལ་དུ་ལྟུང་སོང་།

དང་པོ་མཐོང་བའི་མོད་ལ།།

རིག་རིག་འདྲ་ལེ་སྐྱེས་སོང་།།

རིག་བཟང་སེམས་ཀྱི་དྲན་ཤིང་།།

ལས་ཀྱི་ཐུག་འཕྲད་བྱུང་སོང་།།

འཛོམས་པ་ཡག་མོའི་སྐབས་དེར།།

སྐད་ཆ་ཞེ་འདྲེས་གཏིང་འདྲེས།།

ཁ་སེམས་མཐུན་པོ་བྱུང་བ།།

སྨོན་ལམ་བཟང་བའི་རྟེན་ཡིན།

མཚན་མོ་འུག་པ་བཞིན་དུ།།

མཚན་ལམ་སྐད་ཆས་བསྐྱལ་བ།།

སུ་དང་གང་གིས་མི་ཤེས།།

གསང་གཏམ་ཆད་པ་མ་བྱུང་།།

བར་ཐག་རི་ཆུའི་བཅད་ཅིང་།།

སེམས་ཐག་ཉེ་ཉེ་བསམ་བཞིན།།

སྙིང་གཏམ་བཞུར་རྒྱུན་གློད་པ།།

ཞེ་རྩ་ཉེ་བའི་ཁྱེད་རེད།།