བཅུ་བཞི། བརྒྱ་ལུ།

ནད་འདི་ལོ་ལྔ་མན་གྱི་བྱིས་པར་འབྱུང་བ་མང་ཞིང་། འགོ་བའི་རང་བཞིན་ཆེན་པོ་ལྡན་པ་མ་ཟད། ན་ཡུན་ཅུང་རིང་བ་ཡིན། ནད་རྟགས་ནི་ལུ་བ་དང་སྐྱུགས་པ་ཡིན། ནད་དེ་བྱུང་ནས་དྲག་རྗེས་ཡང་བསྐྱར་འབྱུང་མི་སྲིད་པ་ཡིན།

ནད་དེ་གསོ་བཅོས་ཐད་ནས་ཐོག་མར་ལུ་སྐབས་དུག་སྲིན་འགོག་སྨན་བཀོལ་ནས་གསོ་བཅོས་བྱས་ན་ནད་རྟགས་ཇེ་ཡང་དུ་གཏོང་ཐུབ་མོད། འོན་ཀྱང་རྩ་འཁུམ་རང་བཞིན་གྱི་ལུ་བརྒྱ་ལངས་སྐབས་དུག་སྲིན་འགོག་སྨན་གྱིས་ལུ་བརྒྱ་ཇེ་ཡང་དུ་གཏོང་མི་ཐུབ།

ཁྱིམ་གྱི་བདག་སྐྱོང་ཐད་ནས་ཁང་བའི་ནང་ལྷིང་འཇགས་ཡིན་པ་དང་། མཁའ་དབུགས་གསར་བ་ཡིན་པ། ཉི་འོད་རྒྱག་ཚད་བཟང་བ་བཅས་བྱེད་དགོས། བྱིས་པར་ཟ་ཚད་ཉུང་ཞིང་ཐེངས་གྲངས་ཇེ་མང་དང་། འཇུ་སླ་བའི་ཟས་རིགས་ཟ་རུ་འཇུག་དགོས། རྒྱུན་དུ་བྱིས་པའི་གོན་རྒྱུ་བཀྲུ་བ་དང་བརྗེ་སོར་བྱེད་དགོས། གང་འདོད་དུ་བྱིས་པར་གློ་འཇགས་སྨན་འཐུང་དུ་འཇུག་མི་རུང་། དེ་ལྟར་བྱས་ན་ཉེན་ཁ་ཆེ་བ་རེད། བྱིས་པར་ནུ་མ་བསྣུན་སྐབས་གལ་ཏེ་ལུ་བརྒྱ་ལངས་ཚེ། ལུ་བརྒྱ་ལངས་མཚམས་བཞག་རྗེས་ནུ་མ་བསྣུན་དགོས།

བཅོ་ལྔ། སྣ་ཁྲག་བཞུར་བ།

དཔྱིད་ཀའི་དུས་སུ་བྱིས་པར་སྣ་ཁྲག་བཞུར་ཚད་དེ། དུས་ཚིགས་གཞན་པ་ལས་མཐོ་བར་མ་ཟད། སྣ་ཁྲག་གློ་བུར་དུ་བཞུར་བ་ཞིག་ཡིན། ནད་དེ་གསོ་བཅོས་བྱེད་པའི་ཐད་ནས་བྱིས་པ་ཟུར་དུ་ཉལ་ནས་སྣ་ཁྲག་མིད་པ་ནས་ཕོ་ཁའི་ནང་ཤོར་ཏེ་སྐྱུགས་སློང་བ་སྔོན་འགོག་བྱེད་དགོས། དེ་ནས་མཛུབ་མོས་སྣ་གཤོག་བཙིར་ཏེ་སྐར་མ་བཅུ་ཡས་མས་བསྡད་ན་རང་ཤུགས་སུ་སྣ་ཁྲག་གཅོད་ཐུབ། གཞན་ཡང་ཆུ་འཁྱག་ནང་ལག་ཕྱིས་སྦངས་ནས་དཔྲལ་བར་གླན་པ་དང་། ཆུ་ཁོལ་དྲོད་འཇམ་གྱི་ནང་རྐང་བ་སྤངས་བ་བཅས་བྱས་ན། སྣ་ཁྲག་བཞུར་སའི་ཁྲག་རྩ་སྐུམ་པ་དང་ལུས་སྨད་ཀྱི་ཁྲག་རྩ་འབྱེད་པར་བརྟེན་ནས་ཁྲག་གཅོད་པའི་དམིགས་ཡུལ་དུ་བསླེབས་ཐུབ། གལ་ཏེ་གོང་གི་བྱེད་ཐབས་དེ་དག་སྤྱད་ན་ཡང་སྣ་ཁྲག་གཅོད་མ་ཐུབ་ཚེ། མྱུར་དུ་སྨན་ཁང་ལ་བསྐྱལ་ནས་གསོ་བཅོས་བྱེད་དགོས།

བཅུ་དྲུག རྐང་ལག་ཁ་ནད།

དཔྱིད་ཀ་ནི་འགོ་བའི་རང་བཞིན་གྱི་ནད་རིགས་མཆེད་པའི་དུས་ཚིགས་ཡིན་ཞིང་། ནང་སྒོས་སུ་རྐང་ལག་ཁ་ནད་དང་སིབ་ནད། ཆུ་ཐོར་སོགས་ནད་རིགས་འབྱུང་སླ་བ་ཡིན་པས། སྔོན་འགོག་བྱ་བ་བཟང་བོར་སྒྲུབ་རྒྱུ་དེ་ཧ་ཅང་གལ་ཆེ། རྐང་ལག་ཁ་ནད་ནི་ནད་དུག་འགོས་བཙོག་བྱུང་བ་ལས་བསླངས་བའི་སྐྱི་པགས་འབྱར་སྐྱིའི་ནད་ཅིག་ཡིན་ཞིང་། རྐང་ལག་གི་སྐྱི་པགས་དང་ཁ་སྦུག་འབྱར་སྐྱི་ལ་གནོད་པ་བཟོ་བ་གཙོ་ཡིན་པའི་ཆུ་ཐོར་རང་བཞིན་གྱི་ནད་ཅིག་ཡིན། ནད་དེ་དཔྱིད་ཀ་དང་སྟོན་ཀར་འབྱུང་བ་ཅུང་མང་ཞིང་། ལོ་ཆུང་བྱིས་པ་དང་ཁྱད་པར་དུ་ལོ་བཞི་མན་གྱི་བྱིས་པ་རློན་ནུར་འབྱུང་སླ་བ་དང་། ནད་དེར་འགོ་བའི་རང་བཞིན་ཅུང་ཆེན་པོ་ལྡན། ནད་དེའི་འགོ་ལམ་ནི་ནད་པའི་མཆིལ་ཟེགས་ནང་གི་ནད་དུག་མཁའ་དབུགས་ནང་ཁྱབ་པ་དེ་རྒྱུན་ལྡན་གྱི་མིས་རྔུབ་པ་ལས་འགོ་བ་རེད། དེར་བརྟེན། ནད་འབྱུང་སླ་བའི་དུས་ཚིགས་སུ་རྐང་ལག་ཁ་ནད་དེ་བྱིས་གཉོར་ཁང་དང་སློབ་ཆུང་དུ་མཆེད་པ་རེད།

རྐང་ལག་ཁ་ནད་གྱི་ནད་རྟགས་མི་མངོན་པའི་དུས་ཡུན་ནི་ཉིན་གཉིས་ནས་ལྔ་བར་ཡིན་པ་དང་། ཐོག་མའི་ནད་རྟགས་ནི་ནད་ཐོག་མར་འབྱུང་སྐབས་ལུས་ཡོངས་ཀྱི་ནད་རྟགས་ཅུང་ཡང་ཞིང་། ལུས་ཚ་ཅུང་ལངས་བ་དང་ཐང་ཆད་པ། མགོ་ན་བ། ལུ་བ། སྣ་ཆུ་བཞུར་བ། ཡི་ག་ཞན་པ་སོགས་ཀྱི་ནད་རྟགས་ཡོད་སྲིད། དེའི་རྗེས་སུ་ཁ་སྦུག་ནང་ཕྱོགས་དང་སོ་རྙིལ། རྐན་མདོ། ལྕེ། མཆུ་སྒྲོས། གྲེ་བ་སོགས་ཀྱི་འབྱར་སྐྱིའི་སྟེང་ན་ཟུག་རང་བཞིན་གྱི་ཆུ་བུར་ཆུང་ཆུང་འབུད་པ་དང་། དེའི་མཐའ་བསྐོར་དུ་དམར་གོར་འབྱུང་བ་དང་། ཆུ་བུར་ཕན་ཚུན་འདྲེས་པར་མ་ཟད། མྱུར་དུ་རལ་ནས། རྨ་ཤུལ་དཀར་པོ་ཆགས་སྲིད། ལུས་ཕྱི་ལ་བུད་པའི་རྨ་དང་ཁ་ནང་དུ་བུད་པའི་རྨ་དུས་མཉམ་དུ་བྱུང་བའམ་ཡང་ན་ཅུང་ཙམ་ནས་བྱུང་བ་དང་། དེ་དག་ལག་མཐིལ་དང་རྐང་མཐིལ། འཕོངས་ཤ་སོགས་སུ་ཁྱབ་སྲིད། ནད་དེ་གཟའ་འཁོར་གཉིས་ཀྱི་ནང་སངས་དྲག་འབྱུང་བ་ཡིན། བྱིས་པ་ལ་ལར་དུས་མཉམ་དུ་གསུས་པ་ན་བ་དང་བཤལ་བ་སོགས་ཀྱི་ནད་རྟགས་འབྱུང་སྲིད།

ནད་དུག་འགོག་པའི་སྨན་རྫས་རམས་རྩའི་སྦངས་སྨན་དང་ནད་དུག་འགོག་པའི་བཏུང་བྱའི་སྨན་ཆུ་སོགས་འཐུང་བ་དང་། མཐུད་འབྱུང་རང་བཞིན་གྱི་འགོས་བཙོག་བྱུང་མཁན་གྱིས་དུག་སྲིན་འགོག་སྨན་འཐུང་དགོས། དུས་མཚུངས་སུ་ནད་དེ་མཆེད་པ་ཇེ་ཉུང་དུ་གཏོང་ཆེད་ནད་པ་ལོགས་སུ་བཀར་ནས། གནས་སྐབས་སུ་བྱིས་གཉོར་ཁང་དང་སློབ་གྲྭར་འགྲོ་རུ་མི་འཇུག་པ་བྱེད་དགོས།

ཁྱིམ་གྱི་བདག་སྐྱོང་ཐད་ནས་རྐང་ལག་ཁ་ནད་བྱུང་བ་དང་ནད་དེར་དོགས་པ་ཟ་བའི་བྱིས་པར་འབྲེལ་འདྲིས་མི་བྱེད་པ་དང་། ནད་བྱུང་བའི་བྱིས་པར་ངལ་གསོ་བཟང་བོ་བྱེད་དུ་འཇུག་དགོས། ཚ་རྒྱས་སྐབས་བྱིས་པར་ཆུ་ཁོལ་མང་པོ་འཐུང་དུ་འཇུག་པ་དང་། བཟའ་བཏུང་ཐད་ནས་འཇུ་སླ་བའི་ཟས་དང་ཟས་སྙི་མོ་ཟ་རུ་འཇུག་པ་དང་། ཚན་འདེའི་རིགས་ཀྱི་ཟས་རིགས་ཟ་རུ་འཇུག་མི་རུང་། དེའི་རྒྱུ་མཚན་ནི་བྱིས་པའི་ཁ་ནང་ལ་ན་ཟུག་ལངས་པའི་རྐྱེན་གྱིས་ཡིན། འགོས་བཙོག་བྱུང་ནས་སིབ་ཐོར་རལ་བར་སྔོན་འགོག་བྱེད་ཆེད། བྱིས་པའི་རྐང་ལག་དང་གོན་རྒྱུ། ཉལ་གདན་སོགས་གཙང་མ་བྱེད་དགོས། སིབ་ཐོར་བཤུས་ནས་འགོས་བཙོག་འབྱུང་བ་སྔོན་འགོག་བྱེད་ཆེད། རྒྱུན་དུ་བྱིས་པའི་ལག་པ་གཙང་མར་བཀྲུ་བ་དང་སེན་མོ་བཏོག་དགོས། གལ་ཏེ་སིབ་ཐོར་རལ་ཚེ། དེའི་སྟེང་ལ་སྨན་ཆུ་སྨུག་པོ་བྱུག་དགོས། དེ་མིན་ད་རུང་བྱིས་པར་ཚ་ཆེན་པོ་རྒྱས་པ་མ་ཟད་སིབ་ཐོར་མང་པོ་འབྱུང་ཚེ། སྨན་པར་བསྟན་ནས་ཚ་འཇོམས་དུག་སེལ་སོགས་ཀྱི་སྨན་འཐུང་དགོས།