འཐུས་མི་རྣམ་པ།
ལོ་གསར་པའི་ནང་ང་ཚོས་མུ་མཐུད་དེ་ཞི་བདེ་དང་། གོང་སྤེལ། མཉམ་ལས་བཅས་ཀྱི་དར་ཆ་མཐོན་པོར་བསྒྲེངས་ནས་རང་བཙན་རང་བདག་གི་ཞི་བའི་ཕྱི་འབྲེལ་སྲིད་ཇུས་མཐའ་འཁྱོངས་དང་། ཞི་བས་གོང་དུ་སྤེལ་བའི་བགྲོད་ལམ་དུ་བསྐྱོད་པ་མཐའ་འཁྱོངས། གཉིས་ཕན་མཉམ་རྒྱལ་གྱི་སྒོ་འབྱེད་འཐབ་ཇུས་ལག་བསྟར་མཐའ་འཁྱོངས། ཡུན་རིང་ཞི་བདེ་དང་མཉམ་དུ་དར་རྒྱས་ཡོང་བར་བྱེད་པའི་འཆམ་མཐུན་གྱི་འཇིག་རྟེན་འཛུགས་སྐྱོང་བྱེད་པར་སྐུལ་འདེད་གཏོང་རྒྱུ་མཐའ་འཁྱོངས་བཅས་བྱས་ནས་རང་རྒྱལ་དེང་རབས་ཅན་དུ་འགྱུར་བའི་འཛུགས་སྐྲུན་བྱེད་པར་དགེ་མཚན་སྔར་ལས་ཆེ་བའི་ཕྱི་ཕྱོགས་ཀྱི་ཁོར་ཡུག་དང་ཆ་རྐྱེན་བསྐྲུན་དགོས།
ང་ཚོས་རྒྱལ་ཁབ་ཆེ་རིགས་གཙོ་བོའི་བར་གྱི་འབྲེལ་བ་སྐྱོན་བྲལ་ངང་གོང་འཕེལ་བརྟན་པོ་ཡོང་བ་དང་གྲོས་མོལ་མཉམ་ལས་ཧུར་ཐག་བྱས་ཏེ་ཐུན་མོང་གི་ཁེ་ཕན་དང་མཉམ་ལས་བྱེད་པའི་རྨང་གཞི་རྒྱ་ཆེ་རུ་གཏོང་དགོས། “ཁྱིམ་མཚེས་གྲོང་པ་སེམས་བཟང་། ཁྱིམ་མཚེས་གྲོང་པ་གདང་སྦྲེལ”ཟེར་བ་ལྟར་མཐའ་འཁོར་གྱི་ཕྱི་འབྲེལ་བྱེད་ཕྱོགས་མཐའ་འཁྱོངས་བྱས་ནས་མཐའ་སྐོར་གྱི་རྒྱལ་ཁབ་བར་གྱི་ཁྱིམ་མཚེས་མཛའ་མཐུན་གྱི་མཉམ་ལས་འབྲེལ་བ་ཟབ་ཏུ་སྤེལ་ཏེ་ས་ཁོངས་དང་ས་ཁོངས་ཕལ་པའི་བར་མཉམ་ལས་བྱེད་རིམ་ལ་སྐུལ་སྤེལ་གཏོང་དགོས། དར་རྒྱས་འགྲོ་བཞིན་པའི་རྒྱལ་ཁབ་དག་དང་སྲོལ་རྒྱུན་ལྡན་པའི་མཛའ་མཐུན་མཉམ་ལས་འབྲེལ་བ་དམ་དུ་བཏང་སྟེ་མཉམ་ལས་ཀྱི་གྲུབ་འབྲས་སྔར་ལས་ལྷག་པར་དོན་འཁྱོལ་དང་རྒྱ་སྐྱེད་གཏོང་དགོས། ཕྱོགས་མང་ཕྱི་འབྲེལ་ཧུར་ཐག་གིས་སྤེལ་ཏེ་རྒྱལ་ཁབ་ཉི་ཤུའི་ཚོགས་ཁག་གི་འགོ་གཙོའི་ཚོགས་འདུ་སོགས་སྟེགས་བུ་གཙོ་བོར་བཟུང་སྟེ་སྤྱི་ཁོག་དཔལ་འབྱོར་སྲིད་ཇུས་མཐུན་སྦྱོར་བྱེད་ཤུགས་ཆེ་རུ་གཏོང་བ་དང་། རྒྱལ་སྤྱིའི་དཔལ་འབྱོར་དངུལ་རྩའི་མ་ལག་བསྒྱུར་བཅོས་བྱེད་པར་སྐུལ་འདེད་གཏོང་བ། འཛམ་གླིང་གི་དཔལ་འབྱོར་སྟོངས་དང་ལྡན་ཞིང་། རྒྱུན་མཐུད། དོ་མཉམ་བཅས་ཀྱི་སྒོ་ནས་འཕེལ་རྒྱས་ཡོང་བར་སྐུལ་འདེད་གཏོང་བ་བཅས་བྱས་ཐོག   རྟག་གླེང་གནད་དོན་དང་འཛམ་གླིང་ཧྲིལ་པོའི་གནད་དོན་ཐག་གཅོད་པར་དགེ་མཚན་ལྡན་པའི་ནུས་པ་འདོན་སྤེལ་བྱེད་པའི་སྐུལ་འདེད་བཏང་སྟེ་འཁུར་དགོས་པའི་རྒྱལ་སྤྱིའི་འགན་འཁྲི་དང་འོས་འགན་བསྒྲུབ་དགོས། ཀྲུང་གོའི་སྲིད་གཞུང་དང་མི་དམངས་ཀྱིས་རྒྱལ་སྤྱིའི་སྤྱི་ཚོགས་དང་མཉམ་དུ་ཉིན་ཁའི་འགྲན་སློང་ལ་ཁ་གཏད་དེ་གོང་དུ་སྤེལ་བའི་གོ་སྐབས་མཉམ་སྤྱོད་བྱས་ནས་མིའི་རིགས་ཞི་བདེ་དང་གོང་འཕེལ་ཡོང་བར་བྱེད་པའི་བྱ་གཞག་བླ་ན་མེད་དོན་དུ་བྱས་རྗེས་གསར་པ་འཇོག་རྒྱུ་ཡིན།
འཐུས་མི་རྣམ་པ།
སྔོན་ཆད་ཕྱིར་དྲན་སོས་སྐབས། ང་ཚོས་འོད་སྟོང་འབར་བའི་བྱས་རྗེས་སྤྱིར་བཏང་མིན་པ་བཞག་པ་དང་། མ་འོངས་པར་རྒྱང་བལྟ་བྱེད་སྐབས། ང་ཚོ་རྒྱལ་ཁབ་ཀྱི་མདུན་ལམ་བཟང་པོར་ཡིད་ཆེས་ཀྱིས་ཁེངས་ཡོད། བློ་མཐུན་ཧུའུ་ཅིན་ཐའོ་ཡིས་སྤྱི་ཁྱབ་ཧྲུའུ་ཅི་གནང་བའི་ཀྲུང་དབྱང་གི་འགོ་ཁྲིད་འོག་ང་ཚོས་ལོ་རྒྱུས་ཀྱི་གོ་སྐབས་དམ་འཛིན་བྱས་ཏེ་འགྲན་སློང་སྣ་ཚོགས་ལ་དཔའ་ངར་ཆེན་པོས་ཁ་གཏད་འཇལ་བ་དང་། གསར་གཏོད་ཡར་བརྩོན་དང་། མཐུན་སྒྲིལ་འབད་འཐབ། ལས་དོན་ཏན་ཏིག་ངང་སྒྲུབ་པ། ལོ་ལྔ་ཚན་བཅུ་གཉིས་པ་འགོ་ལེགས་པོར་ཚུགས་ཐུབ་པའི་འབད་བརྩོན་བཅས་བྱས་ཏེ་ཀྲུང་གོའི་ཁྱད་ཆོས་ལྡན་པའི་སྤྱི་ཚོགས་རིང་ལུགས་ཀྱི་བྱ་གཞག་རླབས་པོ་ཆེ་མུ་མཐུད་དེ་གོང་དུ་སྤེལ་དགོས།
རྒྱལ་ཡོངས་མི་དམངས་འཐུས་ཚོགས་སྐབས་བཅུ་གཅིག་པའི་གྲོས་ཚོགས་ཐེངས་བཞི་པའི་དྲུང་ཡིག་ཁང་གིས།
2011ལོའི་ཟླ3ཚེས2ཉིན།