སེམས་ཀྱི་དགའ་སྐྱོ་དབྱིངས་སུ་བོར་སོང་སྨྱུ་གུས་མིག་ཆུ་ཤམ་ཤམ་བཞུར། །
ལུས་ཀྱི་བདེ་སྡུག་སླར་ཡང་དྲན་བྱུང་སྙན་ངག་དབྱངས་རྟ་ལྷང་ལྷིང་གྱེར། །
འཚོ་བའི་ཆགས་སྡང་གླིང་ལ་ཁྱབ་པས་སེམས་ཀྱི་འགན་ཁུར་ལྗིད་ཏིག་ཏིག །
རང་བྱུང་འབྱུང་བཞིའི་ཆད་པ་འདི་ཡང་རང་གིས་བྱས་པས་གསལ་ལྷང་ལྷིང་།

སྙིང་གི་རུས་པ་འཇིག་ཏུ་མེད་པ་སྙིང་སྟོབས་ཅན་གྱི་ཨ་མའི་བུ། །
ཤ་ཞེན་དུང་བའི་ལག་ཟུང་རྐྱོང་ལ་གཅེས་པའི་ཚེ་སྲོག་ཁྱོར་བས་བསྐྱོར། །
ལུགས་གཉིས་དོན་ལ་འཇུག་ལྡོག་བྱེད་པའི་དོན་གྱི་མདོ་རྩ་སྙིང་ལ་བཟུང་། །
སྐྱེ་འཆི་བདེ་སྡུག་སྒྱུ་མའི་རོལ་གར་ལུས་ཅན་ཀུན་གྱི་ལས་དབང་རེད། །

མ་བརྟག་སེམས་ཀྱི་དགའ་སྐྱོ་དག་ཀྱང་ཡིག་དྲུག་མ་ཎི་གསེབ་ཏུ་ཡལ། །
མ་བསམ་འབྱུང་བཞིའི་འཇིག་པ་དེ་ཡང་མིག་ཆུའི་ཁྲོད་ཀྱི་འདས་དོན་ཉིད། །
མ་ལུས་སྐྱེ་རྒུའི་ལས་དབང་སྣ་ཚོགས་ཟག་མེད་ཆོས་ཀྱི་དབྱིངས་སུ་འདོགས། །
མ་འོངས་འབྱུང་འགྱུར་གཏན་གྱི་བདེ་བ་རེས་མེད་འགྲོ་ལ་ཐོབ་པར་སྨོན། ། ས་ཡི་གོ་ལའི་རྒས་གཉེར་བར་ན་ལོ་རྒྱུས་སྟོང་གི་འདས་དོན་བཞུར། །
ཕྱི་མིག་ཁྲོད་ཀྱི་མིག་ཆུའི་ནང་ན་མི་དང་མི་ཡི་བརྩེ་སེམས་འབར། །
སྐྱ་ཟད་སྔོ་སྡུག་འཚོ་བའི་གསེབ་ན་བཞི་གཅིག་བཞི་ཡི་ངུ་ངག་སྒྲོག །
སེམས་དང་སེམས་པའི་འགྱུར་ཁུག་ཁྲོད་ན་སླར་ཡང་ཡིག་དྲུག་དབྱངས་རྟ་འཁོར། །