ཟླ་བཞི་བའི་ཚེས་བཅུ་གཉིས་ཉིན། མཚོ་ནུབ་སོག་རིགས་དང་བོད་རིགས་རང་སྐྱོང་ཁུལ་གྱི་ཡུས་ཧྲུའུ་ས་འགུལ་གནོད་འཚེའི་རྗེས་ཀྱི་སླར་གསོ་བསྐྱར་འཛུགས་བྱ་བའི་བཀོད་འདོམས་པུའུ་འབྲི་སྟོད་རྫོང་ལ་སོང་། ད་ལྟ། རོགས་སྐྱོར་མི་སྣ་ཚང་མ་འབྲི་སྟོད་རྫོང་དུ་ཐོན་ནས་བྱ་བ་སྒྲུབ་མགོ་བརྩམས་པ་དང་། བཟོ་སྐྲུན་ལས་ཁུངས་ཀྱིས་བཟོ་སྐྲུན་མི་སྣ་སྣ་ཚོགས་སྟོང་གཅིག་དང་ལྔ་བརྒྱ་རྩ་འཛུགས་བྱས་ནས་བཟོ་སྐྲུན་ལག་བསྟར་བྱེད་མགོ་བརྩམས།
  2011ལོ་ནི་ཡུས་ཧྲུའུ་ས་འགུལ་གནོད་འཚེའི་རྗེས་ཀྱི་སླར་གསོ་བསྐྱར་འཛུགས་བྱ་བའི་གནད་འགག་གི་ལོ་ཡིན་པས། རོགས་སྐྱོར་བྱ་བ་བདེ་བླག་ངང་སྤེལ་ཆེད། མཚོ་ནུབ་ཁུལ་ཏང་ཨུ་དང་ཁུལ་སྲིད་གཞུང་གིས་ངོས་ཟིན་མཐོར་འདེགས་སུ་གཏོང་བ་དང་། གནད་ཆེ་ས་འབུར་དུ་ཐོན་པར་བྱེད་པ། དོ་དམ་ལ་ཤུགས་བསྣོན་པ། འགན་འཁྲི་དངོས་འབེབ་བྱེད་པ། སྒྲིག་ལམ་ནན་མོ་བྱེད་པ་བཅས་བྱེད་ཐབས་ལྔ་གཙོ་བོར་བཟུང་སྟེ། རོགས་སྐྱོར་མི་སྣའི་འགན་འཁྲིའི་བསམ་པ་ཇེ་དྲག་ཏུ་བཏང་ནས། རོགས་སྐྱོར་བྱ་བ་བཟང་བོར་བསྒྲུབ་པར་ཁག་ཐེག་བྱས།
 མཚོ་ནུབ་ཁུལ་གྱིས་འབྲི་སྟོད་རྫོང་གི་སླར་གསོ་བསྐྱར་འཛུགས་བྱ་བར་རོགས་སྐྱོར་བྱེད་པའི་ལས་གཞི་ལ་མཁར་གྲོང་སྡོད་དམངས་ཀྱི་ཁང་བ་དང་། སྤྱི་པའི་ཞབས་ཞུའི་སྒྲིག་ཆས། རྨང་གཞིའི་སྒྲིག་ཆས། འཆམ་མཐུན་ཁྱིམ་གཞིས་འཛུགས་སྐྲུན་བཅས་རིགས་ཆེན་པོ་བཞིའི་ལས་གཞི་གོ་གཅིག་ཡོད། ན་ནིང་ལས་མགོ་བརྩམས་པའི་ལས་གཞི་ལས་གཞན། འཛུགས་སྐྲུན་ལས་གཞི་བདུན་ཅུ་ལྷག་ད་ལོར་ཕྱོགས་ཡོངས་ནས་ལས་མགོ་རྩོམ་རྒྱུ་ཡིན་པར་མ་ཟད། ལོ་གསུམ་གྱི་འཛུགས་སྐྲུན་ལས་འགན་མང་ཆེ་བ་ད་ལོར་ཡོངས་འགྲུབ་བྱེད་རྒྱུ་རེད། སྔོན་དཔག་བྱས་པ་ལྟར་ན། ད་ལོའི་ཟླ་བརྒྱད་པའི་ཚེས་སོ་གཅིག་ཉིན་བར་མཁར་གྲོང་སྡོད་དམངས་ཁྱིམ་ཚང་སྟོང་གཅིག་དང་སུམ་བརྒྱ་རེ་བརྒྱད་ཀྱི་ཁང་བ་འཛུགས་སྐྲུན་བྱེད་པའི་ལས་འགན་ཡོངས་འགྲུབ་བྱེད་རྒྱུ་རེད།