ཟླ་བ7པའི་ཚེས25ཉིན།སྐབས་བརྒྱད་པའི་ཁམས་པའི་རིག་གནས་ལྗོངས་རྒྱུའི་སྒྱུ་རྩལ་དུས་ཆེན་དང་ཡུལ་ཤུལ་རྟ་རྒྱུག་འགྲན་ཚོགས་དེ་ཡུལ་ཤུལ་བཀྲ་ཤིས་ཁོག་གི་རྟ་རྒྱུག་འགྲན་རར་གཟབ་རྒྱས་ངང་ཚོགས་འགོ་ཚུགས་པ་རེད།

   རྒྱལ་ཁབ་དང་ཞིང་ཆེན་གྱི་འབྲེལ་ཡོད་འགོ་ཁྲིད་དང་།བོད་ལྗོངས།སི་ཁྲོན།མཚོ་སྔོན།ཡུན་ནན་སོགས་ཀྱི་འཐུས་མི་ཚོགས་པ།ཡུལ་ཤུལ་བསྐྱར་འཛུགས་བྱེད་མཁན་གྱི་ཀྲུང་དབྱང་ཁེ་ལས།ཡུལ་ཤུལ་དུ་ལས་དོན་བསྒྲུབས་མྱོང་པའི་འགོ་ཁྲིད་དང་ལས་བྱེད་པ་རྒན་པ།གསར་འགྱུར་ལས་རིགས་དང་སྤྱི་ཚོགས་ཀྱི་ལས་རིགས་ཁག་གི་འཐུས་མི་རྣམ་པ་བཅས་འགོ་ཚུགས་མཛད་སྒོར་ཞུགས་པ་རེད། 

   རང་ཁུལ་གྱི་འཐུས་མི་ཚོགས་པའི་ཚོགས་དཔོན།ཁུལ་ཨུའི་ཧྲུའུ་ཅི་ཧུའུ་ཁྲང་ཧྲེང་།ཚོགས་དཔོན་གཞོན་པ།ཁུལ་ཨུའི་རྒྱུན་ཨུ།དྲིལ་བསྒྲགས་པུའུ་ཡི་པུའུ་པུའུ་ཀྲང་བྱམས་བློ།ཁུལ་སྲིད་གཞུང་གི་ཁུལ་དཔོན་གཞོན་པ་ཀུའོ་ཉིང་བཅས་ཀྲུའུ་ཞིའི་སྟེགས་བུའི་མདུན་གྲལ་དུ་བཞུགས་ཡོད།
  སྔ་དྲོའི་ཆུ་ཚོད10ཐོག་རྒྱལ་ཡོངས་སྲིད་གྲོས་མི་རིགས་དང་ཆོས་ལུགས་ཨུ་ཡོན་ལྷན་ཁང་གི་ཀྲུའུ་རེན་གཞོན་པ་པད་མས་སྐབས་བརྒྱད་པའི་ཁམས་པའི་རིག་གནས་ལྗོངས་རྒྱུའི་སྒྱུ་རྩལ་དུས་ཆེན་དང་ཡུལ་ཤུལ་རྟ་རྒྱུག་འགྲན་ཚོགས་ཚོགས་འགོ་ཚུགས་པའི་ཁྱབ་བསྒྲགས་གནང་བ་དང་།ཀྲུང་གུང་ཡུལ་ཤུལ་ཁུལ་ཨུའི་ཧྲུའུ་ཅི་ཝན་གོ་ཏུང་གིས་ཤིས་ཚིག་ཕུལ་བ་དང་།ཡུལ་ཤུལ་ཁུལ་ཨུའི་ཧྲུའུ་ཅི་གཞོན་པ།ཁུལ་དཔོན་ཝང་ཡུས་ཧུའུ་ཡིས་འགོ་ཚུགས་མཛད་སྒོའི་གཙོ་འགན་བཞེས་པ་རེད།
  ཁམས་པའི་རིག་གནས་ལྗོངས་རྒྱུའི་སྒྱུ་རྩལ་དུས་ཆེན་སྤེལ་བའི་དམིགས་ཡུལ་ནི་ས་ཁོངས་ཀྱི་རིག་གནས་ལྗོངས་རྒྱུ་ཐོན་ཁུངས་སྡེབ་སྒྲིག་བྱས་ནས་ཁམས་པའི་རིག་གནས་ལྗོངས་རྒྱུའི་ཁྱད་རྟགས་སྐད་གྲགས་ཆེན་པོ་བཟོས་པ་དང་།རྒྱུན་ཆད་མེད་པར་མཉམ་ལས་འཕེལ་རྒྱས་ཀྱི་ནང་དོན་གསར་པ་ཕུན་སུམ་ཇེ་ཚོགས་སུ་གཏང་རྒྱུ།མཉམ་ལས་འཕེལ་རྒྱས་གཏོང་ཁོངས་རྒྱ་ཆེ་རུ་གཏོང་བ།མཉམ་ལས་འཕེལ་རྒྱས་ཀྱི་སྟོབས་ཤུགས་གསར་པ་གཅིག་ཏུ་བསྒྲིམ་རྒྱུ་འདི་རེད།དུས་ཆེན་གྱི་ནང་དོན་གཙོ་བོ་ནི་འགོ་ཚུགས་པའི་མཛད་སྒོ་དང་མཇུག་བསྒྲིལ་བའི་མཛད་སྒོ།རིག་རྩལ་བྱེད་སྒོ།ལྗོངས་རྒྱུ་དྲིལ་བསྒྲགས།དཔལ་འབྱོར་མཉམ་ལས་གྲོས་མོལ།ཁྱད་ཆོས་ལྡན་པའི་ཐོན་ཁུངས་འགྲེམས་སྟོན་ཉོ་ཚོང་།གནོད་སྐྱོན་ཐེབས་རྗེས་ཀྱི་གྲུབ་འབྲས་སྟོན་པ་བཅས་ལྔ་ལས་གྲུབ་པ་རེད།དུས་ཡུན་ནི་ཉིན་བཞི་ཡིན་ཞིང་།ཚོགས་ར་གཙོ་བོ་གཅིག་དང་ཡན་ལག་ཚོགས་ར་ལྔ་ཡོད་བགོས་པ་སྟེ།ཚོགས་ར་གཙོ་བོ་ནི་སྐྱེ་རྒུ་མདོ་གྲོང་རྡལ་གྱི་བཀྲ་ཤིས་ཁོག་རྟ་རྒྱུག་འགྲན་ར་ཡིན་པ་དང་།ཡན་ལག་ཚོགས་ར་ཁག་དབྱེ་ནས་འབའ་ཐང་རྩྭ་ཐང་དང་ཁམས་པའི་རིག་གནས་སྒྱུ་རྩལ་ལྟེ་གནས།ས་འགུལ་རྗེས་ཤུལ་དྲན་གསོ་ཁང་།ཡུལ་ཤུལ་དངོས་མང་འགྲེམས་སྟོན་ཁང་།གེ་སར་རིག་གནས་ལྟེ་གནས་བཅས་རེད།ཁམས་པའི་སྒྱུ་རྩལ་དུས་ཆེན་དེ་བདེ་ཆེན་དང་ཆབ་མདོ།དཀར་མཛེས།ཡུལ་ཤུལ་བཅས་ས་གནས་དང་ཁུལ་བཞི་ཡིས་མཉམ་དུ་གཉེར་ཞིང་།ཡུན་ནན་དང་སི་ཁྲོན།བོད་ལྗོངས།མཚོ་སྔོན་བཅས་ས་མཚམས་འབྲེལ་བའི་ས་ཁུལ་གྱི་དཔལ་འབྱོར་དང་རིག་གནས་བྱེད་སྒོ་གལ་ཆེན་ཞིག་ཡིན་པས།1994ལོ་ནས་ད་བར་སྐབས་བདུན་ལེགས་གྲུབ་ངང་གཉེར་ཡོད།ས་གནས་དང་ཁུལ་བཞིའི་ཐུན་མོང་དུ་ཧུར་ཐག་འབད་འཐབ་བྱས་འོག་མི་རིགས་མཐུན་སྒྲིལ་ལ་སྐུལ་འདེད་གཏོང་བ་དང་མི་རིགས་སྙིང་སྟོབས་ཆེར་སྐྱེད།སྤྱི་ཚོགས་འཆམ་མཐུན།རིག་གནས་དར་རྒྱས་གོང་སྤེལ་ཡོང་བའི་འདུ་ཚོགས་གཟབ་རྒྱས་ཤིག་ཏུ་གྱུར་བ་རེད།