སྡེ་དགེ་རྫོང་ཨོ་སྒང་ཤང་གི་ལས་བྱེད་པ་དང་གྲོང་ཚོའི་འགན་ཁུར་པ་ཚོས་དགེ་བཟང་གྲོང་ཚོར་བདེ་དྲོད་བསྐྱལ་བ།
སྒྲོལ་མ་ཚེ་མཚོས། 2010-12-02
ཟླ་བ11པའི་ཚེས29ཉིན་སྡེ་དགེ་རྫོང་ཨོ་སྒང་ཤང་གི་ཧྲུའུ་ཅི་དང་ཤང་ཀྲང་གིས་གཞུང་ཞབས་པ་དང་གྲོང་ཚོའི་འགན་ཁུར་པ་ཁྲིད་ནས་དགེ་བཟང་གྲོང་ཚོའི་དམིགས་འཛུགས་སློབ་ཁྲིད་བྱེད་ས་དང་ཁྱིམ་དུད་དུ་ཕྱིན་ནས་འབྲོག་པ་རྣམས་ལ་དྲ་སྐོར་རྩྭ་ར་སྲུང་སྐྱོང་ཡག་པོ་བྱེད་དགོས་ལུགས་དང་དགུན་ཁ་གྲང་ཆེ་བ་དང་ཁ་བ་འབབ་པའི་སྐབས་སུ་མི་ཕྱུགས་གཉིས་ཀ་བདེ་རྒལ་ཡོང་བར་བྱེད་ཆེད་ཕྱུགས་ཟོག་ལ་དྲོད་སྲུང་གཟན་གསོ་ཡག་པོ་བྱ་རྒྱུའི་ཐད་སློབ་གསོ་ཡང་ཡང་བརྒྱབ་པར་མ་ཟད།ད་རུང་ཤང་དེའི་ཧྲུའུ་ཅི་དང་ཤང་ཀྲང་གིས་སྣེ་ཁྲིད་ནས་ཤང་ཡོངས་ཀྱི་གཞུང་ཞབས་པ་དང་གྲོང་ཚོའི་འགན་པ་ཚོས་དགེ་བཟང་དམིགས་འཛུགས་སློབ་ཁྲིད་བྱེད་སའི་སློབ་མ་ཚོར་ཁྱོན་བསྡོམས་སྒོར་སྟོང་ཕྲག་གཅིག་ལྷག་ཙམ་ཞལ་འདེབས་བརྒྱབ་པ་དང་མངར་ཆ་སྦྱིན་ནས་དགུན་ཁ་གྲང་ཆེ་བའི་ཁྲོད་དུ་ཤང་སྲིད་གཞུང་གིས་ཁོ་ཚོར་བདེ་དྲོད་བསྐྱལ་ཡོད་པ་རེད།།