ཡུན་ནན་ཞིང་ཆེན་བདེ་ཆེན་བོད་རིགས་རང་སྐྱོང་ཁུལ་སེམས་ཀྱི་ཉི་ཟླ་རྫོང་གིས་སྨན་བཅོས་རོགས་སྐྱོར་ལ་གྲོང་རྡལ་དང་གྲོང་གསེབ་གཅིག་དྲིལ་གྱི་དབུལ་ཕོངས་སྨན་བཅོས་རོགས་སྐྱོར་བྱས་པ་ནས་བཟུང་།ནན་ཏན་གྱིས་གྲོང་ཁྱེར་དང་གྲོང་གསེབ་ཀྱི་དཀའ་ངལ་ཡོད་པའི་ཁྱིམ་དུད་ཀྱི་སྨན་བཅོས་རོགས་སྐྱོར་ལས་ཀ་ཡག་པོ་བསྒྲུབས།ཤེས་གསལ་བྱུང་དོན།2013ལོར།སྨན་བཅོས་རོགས་སྐྱོར་གྱིས་འགྲོ་སྒོ་སྒོར་ཁྲི1318.182བཏང་བ།དེའི་ནང་གྲོང་ཁྱེར་དང་གྲོང་གསེབ་ཀྱི་སྨན་བཅོས་རོགས་སྐྱོར་བྱ་ཡུལ་མི་ཐེངས6127ལ་རོགས་སྐྱོར་བྱས་པ།སྨན་ཁང་དུ་སྡོད་པའི་རོགས་སྐྱོར་མ་དངུལ་སྒོར་ཁྲི703.44བཏང་བ།གྲོང་གསེབ་ཐེམ་ཐོའི་མི102457གསར་གྲས་ཀྱི་གྲོང་གསེབ་མཉམ་ལས་སྨན་བཅོས་སུ་ཞུགས་པར་རོགས་སྐྱོར་བྱས་ནས།མི་རེར་སྒོར60སྤྲད་ཡོད་དེ།ཁྱོན་བསྡོམས་སྒོར་ཁྲི614.742ཟིན་པ་རེད།
 
ཉེ་བའི་ལོ་འགའི་རིང་ལ།སེམས་ཀྱི་ཉི་ཟླ་རྫོང་གིས་གྲོང་ཁྱེར་དང་གྲོང་གསེབ་ཀྱི་སྨན་བཅོས་རོགས་སྐྱོར་ལས་ཀ་དེ་སྤྱི་ཚོགས་རོགས་སྐྱོར་མ་ལག་འཛུགས་སྐྲུན་གྱི་གནད་ཆེར་བཟུང་ནས།སྲིད་གཞུང་གིས“དམངས་འཚོའི་ལས་གྲྭ”ཡི་དཔྱད་ཞིབ་དུ་ཚུད་པ་རེད།དམའ་སྲུང་དང་འགན་ལེན་ལྔའི་དུད་ཚང་གསར་གྲས་ཀྱི་གྲོང་གསེབ་མཉམ་ལས་སྨན་བཅོས་དང་གྲོང་ཁྱེར་སྡོད་དམངས་ཀྱི་གཞི་རྩའི་སྨན་བཅོས་འགན་བཅོལ་དུ་ཞུགས་པར་རོགས་སྐྱོར་བྱེད་པ་རྨང་གཞིར་གྱུར་བ་དང་།དམིགས་འཛུགས་སྨན་བཅོས་ལས་ཁུངས་ཀྱིས་སྨན་ཡོན་ཆག་ཡང་དང་རྩ་ཆག་གཏོང་བ་ཞོར་འདེགས་སུ་ཆགས་པ།ནད་ཆེའི་རོགས་སྐྱོར་གཙོ་བོར་བཟུང་བ།སྤྱི་ཚོགས་ཀྱིས་ཞལ་འདེབས་་ཁ་སྣོན་བྱས་པའི་སྨན་བཅོས་རོགས་སྐྱོར་མ་ལག་བཙུགས་ནས།མངོན་གསལ་གྱི་སྤྱི་ཚོགས་ཕན་ནུས་ཐོན་པ།རོགས་སྐྱོར་བྱ་ཡུལ་དང་རོགས་སྐྱོར་བྱ་ཐབས་སོགས་ཀྱི་ཐད་ལ་གསལ་འབེབས་བྱས་པ་མ་ཟད།ད་དུང་རོགས་སྐྱོར་བྱ་ཡུལ་གྱིས་སྙན་ཞུ་དང་ཞིབ་བཤེར་ཆོག་མཆན།རོགས་སྐྱོར་མ་དངུལ་སོགས་ཀྱི་བཀོལ་སྤྱོད་ལམ་ལུགས་བཙུགས་པ།རྒྱང་བསྒྲགས་རླུང་འཕྲིན་དང་བརྙན་འཕྲིན།ཚགས་པར་སོགས་གསར་འགྱུར་སྨྱན་བྱད་ཀྱི་ཐོགགྲོང་ཁྱེར་དང་གྲོང་གསེབ་ཀྱི་དཀའ་ངལ་ཡོད་པའི་མང་ཚོགས་ཀྱི་ནད་ཆེའི་སྨན་བཅོས་རོགས་སྐྱོར་ལས་ཀ་དྲིལ་བསྒྲགས་བྱས་ནས།དཀའ་ངལ་ཡོད་པའི་མང་ཚོགས་ཀྱིས་དུས་ཐོག་ཏུ་གྲོང་ཁྱེར་དང་གྲོང་གསེབ་ཀྱི་སྨན་བཅོས་རོགས་སྐྱོར་གྱི་དངོས་གཞིའི་ནང་དོན་དང་འབྲེལ་ཡོད་བླང་བྱ་རྒྱུས་ལོན་བྱུང་བར་འཇུག་པ།གོང་རིམ་གྱི་གཏན་འབེབས་ལ་གཞིགས་པ་དང་རྫོང་འདིའི་དོན་དངོས་དང་བསྟུན་ནས།འོས་འཚམ་གྱིས་རོགས་སྐྱོར་ནད་རིགས་མང་དུ་བཏང་བ་དང་རོགས་སྐྱོར་བྱས་པའི་ཚད་གཞི་མཐོ་རུ་བཏང་ནས།དེ་ལས་མང་བའི་གྲོང་ཁྱེར་དང་གྲོང་གསེབ་ཀྱི་དཀའ་ངལ་ཡོད་པའི་མང་ཚོགས་ནད་ཆེ་ཕོག་དུས་རོགས་སྐྱོར་ཐོབ་པར་འགན་སྲུང་བྱས་པ།དུས་མཚུངས་སུ།སྨན་བཅོས་རོགས་སྐྱོར་མ་དངུལ་གྱི་ཆེད་སྤྱོད་ཐོ་ཁོངས་བཀོད་སྒྲིག་བྱས་ནས།ཆེད་དངུལ་ཆེད་སྤྱོད་བྱས་ཤིང་།རོགས་སྐྱོར་མ་དངུལ་བདེ་བླག་ཏུ་གཏོང་བར་ཁག་ཐེག་བྱས་པ་རེད།  །