སྤྱི་ཟླ3པའི་ཚེས15ཉིན་བསྡུས་པའི་ཡུན་ནན་ཞིང་ཆེན་བདེ་ཆེན་བོད་རིགས་རང་སྐྱོང་ཁུལ་བསམ་བློ་རིག་གནས་དྲིལ་བསྒྲགས་བྱ་བའི་གྲོས་ཚོགས་ལས་ཏང་གི་འཐུས་མི་ཚོགས་ཆེན་ཐེངས18པའི་དགོངས་དོན་ལ་སློབ་སྦྱོང་ལེགས་པོ་བྱས་ཏེ།  གསར་འགྱུར་དྲིལ་བསྒྲགས་ཀྱི་རྣམ་པ་གསར་བ་སྤྱད་པ་དང་།  རིག་གནས་འཛུགས་སྐྲུན་ལ་ཤུགས་སྣོན་པ་།  དཔལ་ཡོན་འཛུགས་སྐྲུན་དར་སྤེལ་བྱེད་པ། ཕྱི་ཕྱོགས་དྲིལ་བསྒྲགས་སྟེང་རྣམ་པ་གསར་བ་སྐྲུན་པ་སོགས་ཁུལ་ཡོངས་ཀྱི་སྤྱི་ཚོགས་དཔལ་འབྱོར་དང་བདེ་འཇགས་ལ་བསམ་བློ་དང་སྙིང་སྟོབས།  བླངས་ཕྱོགས་བཅས་ཀྱིས་རྒྱབ་སྐྱོར་བྱེད་དགོས་པའི་བླང་བྱ་བཏོན། 

བདེ་ཆེན་ཁུལ་གྱི་ཏང་ཨུའི་རྒྱུན་ཨུའམ།  ཁུལ་ཏང་ཨུའི་དྲིལ་བསྒྲགས་པུའུ་ཡི་པུའུ་ཀྲང་ལུའུ་ཡོན་མིན་གྱིས་ཚོགས་ཐོག་ནས་ད་ལོའི་བྱ་བའི་གཙོ་གནད་ཐད་བླང་བྱ་གསར་བ་བཏོན།   

ལུའུ་ཡོན་མིན་གྱིས་ན་ནིང་གི་བསམ་བློ་རིག་གནས་དྲིལ་བསྒྲགས་བྱ་བར་སྤྱི་བསྡོམས་བྱས་པ་དང་།  དེང་སྐབས་ཀྱི་རྣམ་པ་གསར་བ་དབྱེ་ཞིབ་བྱས་པ་བརྒྱུད།  ད་ལོའི་བསམ་བློ་རིག་གནས་དྲིལ་བསྒྲགས་བྱ་བའི་ལས་འགན་བཀོད་སྒྲིག་བྱས།  ལུའུ་ཡོན་མིན་གྱིས་ཁུལ་ཡོངས་ཀྱི་བསམ་བློ་རིག་གནས་དྲིལ་བསྒྲགས་བྱ་བར་གཙོ་བོ་ཕྱོགས་བདུན་ནས་དོ་སྣང་བྱེད་དགོས་བླང་བྱ་བཏོན།  གཅིག་ནི་རིགས་གཞུང་སློབ་སྦྱོང་ལ་ཤུགས་བསྣན་ནས།  ཏང་གི་འཐུས་མི་ཚོགས་ཆེན་ཐེངས18པའི་དགོངས་དོན་ལག་ལེན་མཐར་ཕྱིན་བྱེད་དགོས་པ་དང་།  གཉིས་ནི་བླངས་ཕྱོགས་མཛུབ་ཁྲིད་བྱ་བ་དམ་འཛིན་བྱས་ཏེ།  ཁུལ་ཡོངས་ནས་བཅོས་བསྒྱུར་སྒོ་འབྱེད་གྱི་ཁོར་ཡུག་ལེགས་པོ་ཞིག་སྐྲུན་པར་འབད་བརྩོན་བྱེད་དགོས་པ་དང་།  གསུམ་ནི་བསམ་པའི་དཔལ་ཡོན་འཛུགས་སྐྲུན་ལ་ཤུགས་བསྣན་ནས།  མཁར་གྲོང་གི་དཔལ་ཡོན་རྣམ་པ་རྒྱུན་ཆད་མེད་པར་མཐོར་འདེགས་སུ་གཏོང་དགོས་པ་དང་། བཞི་ནི་རིག་གནས་འཕེལ་རྒྱས་འཛུགས་སྐྲུན་ལ་ཤུགས་བསྣན་ནས།  ནན་ཏན་སྒོས《རིག་གནས་ཀྱིས་ཁུལ་དར་སྤེལ་བྱེད་པའི་འགུལ་སྐྱོད་རྩ་གནད》ལག་ལེན་མཐར་ཕྱིན་བྱེད་དགོས་པ་དང་།  ལྔ་ནི་ཕྱི་ཕྱོགས་དྲིལ་བསྒྲགས་ལ་ཤུགས་བསྣན་ནས། རྒྱུན་ཆད་མེད་པར་བདེ་ཆེན་ཁུལ་གྱི་མིང་རྟགས་མཐོར་འདེགས་སུ་གཏོང་དགོས་པ་དང་།  དྲུག་ནི་ས་གནས་གྱི་དོ་དམ་ལ་ཤུགས་བསྣན་ནས།  རིག་གནས་བདེ་འཇགས་དང་བོད་ཁུལ་གྱི་སྤྱི་ཚོགས་བདེ་འཇགས་ལ་འགན་སྲུང་བྱེད་དགོས་པ་དང་།  བདུན་ནི་བྱ་སྤྱོད་འཛུགས་སྐྲུན་ལ་ཤུགས་བསྣན་ནས།  བྱ་སྤྱོད་བཟང་བསྒྱུར་དང་སློབ་བརྩོན་ལེགས་སྤུས།  རྩོམ་གཤིས་ལེགས་བསྒྱུར་བྱེད་པར་སྔོན་གྲས་སུ་འགྲོ་དགོས་པ་བཅས་སོ།  །