ཀྲུང་གོའི་བོད་ཀྱི་དྲ་བའི་འཕྲིན།  ཟླ9བའི་ཚེས11ཉིན་ནས་ཚེས13ཉིན་བར་དུ།  རྒྱལ་ཁབ་ཁྲབ་དོན་སྤྱི་ཁྱབ་ཅུའུ་ཡིས་སྣེ་ཁྲིད་པ་དང་།  རྒྱལ་ཁབ་སྤུས་ཚད་ཞིབ་བཤེར་སྤྱི་ཁྱབ་ཅུའུ་དང་།  རྒྱལ་སྲིད་སྤྱི་ཁྱབ་ཁང་དབུལ་སྐྱོར་གཞུང་སྒྲུབ་ཁང་།  རྒྱལ་ཁབ་རིག་དངོས་ཅུའུ་སོགས་སྡེ་ཁག་བཅས་ལས་གྲུབ་པའི་ཞིབ་བཤེར་ཚན་ཆུང་བདེ་ཆེན་ཁུལ་དུ་སོང་ནས།  ཀྲུང་དབྱང་གིས་རྒྱབ་སྐྱོར་བྱེད་བཞིན་པའི་སྤྱི་ཚོགས་དཔལ་འབྱོར་འཕེལ་རྒྱས་ཐད་ཀྱི་སྲིད་ཇུས་ལག་བསྟར་བྱས་ཚུལ་ལ་ཞིབ་བཤེར་བྱས། 

ཟླ9བའི་ཚེས11ཉིན།  བདེ་ཆེན་ཁུལ་དུ་བསྡུས་པའི་བྱ་བའི་སྙན་ཞུའི་ཚོགས་འདུ་སྟེང་།  བདེ་ཆེན་ཁུལ་གྱི་ཏང་ཨུའི་རྒྱུན་ཨུའམ།  བདེ་ཆེན་ཁུལ་མི་དམངས་སྲིད་གཞུང་གི་ཁུལ་དཔོན་གཞོན་པ་ཀྲུང་ཀྲུ་ཅོན་གྱིས་བདེ་ཆེན་ཁུལ་གྱི་སྤྱི་ཚོགས་དཔལ་འབྱོར་འཕེལ་རྒྱས་གནས་བབ་དང་།  ཀྲུང་དབྱང་གིས་བདེ་ཆེན་ཁུལ་གྱི་སྤྱི་ཚོགས་དཔལ་འབྱོར་ཐད་སྤེལ་བའི་གཟིགས་སྐྱོང་སྲིད་ཇུས་ལག་བསྟར་བྱས་ཚུལ་སོགས་ནས་སྙན་ཞུ་ཕུལ། 

 བྱ་བའི་སྙན་ཞུ་ལ་ཉན་རྗེས།  ཞིབ་བཤེར་ཚན་ཆུང་གིས་བདེ་ཆེན་ཁུལ་གྱི་ཕྱོགས་སོ་སོ་ནས་བླངས་པའི་གྲུབ་འབྲས་ལ་གདེང་འཇོག་ཆེན་པོ་མཛད་པ་མ་ཟད།  སྤྱི་ཚོགས་དཔལ་འབྱོར་འཕེལ་རྒྱས་ཁྲོད་གནས་པའི་གནད་དོན་ལ་བསམ་འཆར་གང་ལེགས་བཏོན།  བྱེད་ཐབས་སོ་སོ་ལག་བསྟར་བྱེད་པའི་ཁྲོད།  འགོ་ཁྲིད་ལ་ཤུགས་སྣོན་དགོས་པ་དང་།  བྱ་བ་སོ་སོ་བཀོད་སྒྲིག་ལེགས་པོ་བྱས་ཏེ།  སྔར་ལས་ལྷག་པར་ནུས་ཤུགས་ཡོད་དགུ་བཏོན་ནས་རྒྱབ་སྐྱོར་མང་པོ་ཐོབ་པར་བརྩོན་ལེན་བྱེད་པ་སོགས་ཀྲུང་དབྱང་གིས་བདེ་ཆེན་ཁུལ་ཀྱི་སྤྱི་ཚོགས་དཔལ་འབྱོར་ཐད་གནང་བའི་སྲིད་ཇུས་ལག་བསྟར་ལེགས་པོ་བྱེད་དགོས་པའི་བླང་བྱ་བཏོན།  །