ཀྲུང་གོའི་བོད་ཀྱི་དྲ་བའི་འཕྲིན། ཞོགས་པ་ནམ་གསལ་མ་ཐག སྟོད་ཐུང་སེར་པོ་གྱོན་པའི་ཁོར་ཡུག་གཙང་སྦྲའི་ལས་མི་རྣམས་ཀྱིས་ཁྲོམ་ལམ་གཙང་ཕྱག་བྱེད་འགོ་ཚུགས་པ། ཉེ་བའི་ལོ་འགའི་རིང་། ཡུན་ནན་ཞིང་ཆེན་བདེ་ཆེན་བོད་རིགས་རང་སྐྱོང་ཁུལ་འཇོལ་རྫོང་གིས་གོམ་གང་མདུན་སྤོས་ཀྱིས་གྲོང་ཁྱེར་དོ་དམ་ལས་ཀར་ཤུགས་བསྣན་པས། མིག་སྔར། རྫོང་དེའི་ཁོར་ཡུག་གཙང་སྦྲ་ས་ཚིགས་ལ་ལས་མི70ལྷག་ཡོད་དེ། རྫོང་མཁར་གྱི་ཁོར་ཡུག་གཙང་མོར་གྱུར་ཡོད།
ཉེ་བའི་ལོ་ཤས་རིང་། རྫོང་དེའི་གྲོང་ཁྱེར་ཕྱོགས་བསྡུས་ཁྲིམས་འཛིན་ཅུས་ཀྱིས་ཤུགས་ཆེན་ངང་རྫོང་མཁར་གྱི་ཁོར་ཡུག་ལེགས་སྒྲིག་བྱས་པ། “འཇོལ་རྫོང་གི་ཁྲོམ་ལམ་ནི་ལ་གཟར་པོ་ཡིན་ལ། དགུན་ཁར་གནམ་གཤིས་ཧ་ཅང་གྲང་ཞིང་། ཕྱིར་འབོ་བའི་ཆུ་དེ་ལམ་སང་འཁྱགས་པར་ཆགས་པས། ཕར་འགྲོ་ཚུར་འོང་གི་མི་རྣམས་སྟབས་མི་བདེ་བ་རེད།”འཇོལ་རྫོང་གྲོང་ཁྱེར་དོ་དམ་ཕྱོགས་བསྡུས་ཁྲིམས་འཛིན་ཅུས་ཀྱི་ཅུས་ཀྲང་བློ་བཟང་ཆོས་འཕེལ་གྱིས“ང་ཚོས་ཁྱད་པར་དུ་དགུན་ཁར་ཁྲོམ་ལམ་གཡས་གཡོན་གྱི་ཟ་ཁང་དང་ཚོང་ཁང་རྣམས་ཀྱིས་ཆུ་གཙོག་གང་བྱུང་དུ་འབོ་བའི་གནས་ཚུལ་དེ་ལེགས་སྒྲིག་བྱས་ཡོད།”ཅེས་བཤད་བྱུང་། ཁོ་ཚོས་ད་དུང་ལོ་ལྟར་ས་འོག་ཆུ་ལམ་གཙང་སྒྲིག་ཐེངས་གསུམ་བྱེད་དགོས་པ་དང་། དུས་མཚུངས་སུ་ཁྲོམ་ལམ་གཡས་གཡོན་གྱི་ལམ་སྒྲོན་ལ་དོ་དམ་ནན་པོ་བྱས་ཤིང་དུས་ཐོག་ཏུ་ཆག་གྲུམ་པའི་ལམ་སྒྲོན་བརྗེ་བ་རེད།
ལོ་མང་པོའི་ཧུར་བརྩོན་བྱས་པ་བརྒྱུད་ནས། འཇོལ་རྫོང་གི་རྫོང་མཁར་གྱི་རྣམ་པ་ལེགས་པོར་གྱུར་ཡོད། རྫོང་མཁར་གསར་པའི་ཁུལ་གྱི་ལྗང་འགྱུར་གྲ་འགྲིག་ཅིང་མཛེས་སྡུག་ལྡན་པ། ཁ་བ་དཀར་པོ་ལམ་ཆེན་གྱི་ལམ་སྒྲོན་དེ་མཚན་མོར་ཚོན་མདངས་རྣམ་པ་བཀྲ་བའི་ཁ་བཏགས་ལྟ་བུར་འཇོལ་རྫོང་རྫོང་མཁར་ལ་མཛེས་རྒྱན་སྤྲས་པ་རེད།  །