ཀྲུང་གོའི་བོད་ཀྱི་དྲ་བའི་འཕྲིན། གསར་འགོད་པས་ཡུན་ནན་ཞིང་ཆེན་བདེ་ཆེན་བོད་རིགས་རང་སྐྱོང་ཁུལ་སེམས་ཀྱི་ཉི་ཟླ་རྫོང་རིག་རྩལ་རྒྱང་སྒྲོག་བརྙན་འཕྲིན་ཅུའུ་ནས་རྒྱུས་ལོན་པ་ལྟར་ན།ལོ་སར་སྐབས་སུ་འཁྲབ་སྟོན་བྱེད་རྒྱུ་ཡིན་པའི2015ལོའི་བོད་ཤིང་མོ་ལུག་ལོའི་ལོ་སར་སྤྲོ་ཚོགས་དྲོད་སྐྱིད་ལྡན་པའི་ཤམ་བྷ་ལ་ཞེས་པའི་དམངས་སྲོལ་རིག་གནས་བྱ་འགུལ་ད་ལྟ་གྲ་སྒྲིག་བྱེད་བཞིན་པའི་སྒང་ཡིན།ཤེས་གསལ་བྱུང་བ་ལྟར་ན། ཐེངས་འདིའི་བྱ་འགུལ་ནི་སེམས་ཀྱི་ཉི་ཟླ་རྫོང་ཏང་ཨུ་དང་རྫོང་སྲིད་གཞུང་གིས་གཙོ་སྒྲུབ་བྱས་ཤིང་།རྫོང་ཏང་ཨུའི་གཞུང་སྒྲུབ་ཁང་དང་ཏང་ཨུའི་དྲིལ་སྒྲོག་པུའུ།གནའ་མཁར་དོ་དམ་ཨུ་ཡོན་ལྷན་ཁང་། རིག་རྩལ་རྒྱང་སྒྲོག་བརྙན་འཕྲིན་ཅུའུ་དང་གནས་སྐོར་ཅུའུ། རྒྱལ་ཐང་གྲོང་རྡལ་བཅས་ཀྱིས་སྒྲུབ་འགན་ཁུར་བ་རེད།བྱ་འགུལ་དུས་ཡུན་ལ་ཉིན་གཅིག་ཡིན་པ་དང་ཟླ2པའི་ཚེས20ཉིན་གྱི་སྔ་དྲོའི་དུས་ཚོད་བཅུ་ནས་བཅུ་གཉིས་བར་ཟླ་འོད་ཐང་ཆེན་དུ་བསྡུ་རྒྱུ་ཡིན་པ་དང་།ཉིན་དེའི་ཕྱི་དྲོར་ད་དུང་རྒྱལ་ཐང་གྲོང་རྡལ་གྱི་སྐོར་བྲོ་འཁྲབ་སྟོན་བྱེད་རྒྱུ་རེད།རྒྱུས་ལོན་པ་ལྟར་ན།བདེ་ཆེན་སྐོར་བྲོ་ནི་རྒྱལ་ཁབ་ཀྱི་དངོས་མིན་ཤུལ་བཞག་རིག་གནས་གྲས་སུ་ཚུད་པར་ཡར་ཞུ་བྱས་ཡོད་པ་དང་། རིག་གནས་རྒྱུན་འཛིན་གྱི་རྣམ་གྲངས་ཡིན་པའི་ཆ་ནས་སྲུང་སྐྱོང་བྱས་པ་རེད། །