ཚེས18ཉིན། བོད་རང་སྐྱོང་ལྗོངས་ལྷོ་ཁ་ས་ཁུལ་གྱི་མཆོང་སྐྱོད་ལྟ་བུའི་འཕེལ་རྒྱས་ཀྱི་བཞུགས་མོལ་ཚོགས་འདུ་དང་ལྷོ་ཁ་ས་ཁུལ་མི་རིགས་ལག་ཤེས་བཟོ་ལས་གོང་སྤེལ་སྐོར་གྱི་དཔྱད་གླེང་ཚོགས་འདུ་པེ་ཅིང་དུ་ཚོགས་ཤིང་། ཚོགས་ཞུགས་ཆེད་མཁས་པ་དང་འབྲེལ་ཡོད་ལས་རིགས་གཉེར་བཞིན་པའི་མི་སྣས་མཉམ་དུ་ལྷོ་ཁ་ས་ཁུལ་གྱི་མི་རིགས་ལག་ཤེས་བཟོ་ལས་གོང་དུ་སྤེལ་བའི་ཐད་ལ་ཐབས་འདོན་ཇུས་འགོད་གནང་ནས་ལྷོ་ཁ་ས་ཁུལ་གྱི་སྤྱི་ཚོགས་དང་དཔལ་འབྱོར་མཆོང་སྐྱོད་ལྟ་བུའི་འཕེལ་རྒྱས་འགྲོ་བར་སྐུལ་འདེད་བྱས་པ་རེད།

ངོ་སྤྲོད་བྱས་པ་ལྟར་ན། ཉེ་བའི་ལོ་ཤས་རིང་། ལྷོ་ཁ་ས་ཁུལ་གྱིས་རང་གི་དགེ་མཚན་ལ་བརྟེན་ནས། བོད་ཀྱི་ས་གདན་སོགས་སྲོལ་རྒྱུན་གྱི་མི་རིགས་ལག་ཤེས་བཟོ་ལས་ཐོན་ལས་གོང་དུ་སྤེལ་ཞིང་། ད་སྔའི་བར་ས་ཁུལ་ཡོངས་སུ་མི་རིགས་ལག་ཤེས་བཟོ་ལས་ཀྱི་ཁེ་ལས20ལ་ཉེ་བ་ཡོད་ཅིང་། ཐོན་རྫས་གཙོ་བོ་རིགས་ཆེ་བ20དང་། རིགས་ཆུང་བ800ལྷག་ཡོད་ལ། ཐོན་རྫས་ཁག་ཅིག་རྒྱལ་སྤྱིའི་ཚོང་རར་བསྐྱོད་ཡོད་པ་དང་། སྤྱི་ཚོགས་དང་དཔལ་འབྱོར་གྱི་ཕན་འབྲས་ལེགས་པོ་ཐོབ་ཡོད་པ་རེད། 2009ལོར་ལྷོ་ཁ་ས་ཁུལ་གྱི་ས་གདན་དང་ཁ་གདན། པང་གདན་སོགས་སྲོལ་རྒྱུན་གྱི་མི་རིགས་ལག་ཤེས་བཟོ་ལས་ཐོན་རྫས་ཀྱི་ཐོན་སྐྱེད་རིན་ཐང་སྒོར་དུང་ཕྱུར་༢ལས་བརྒལ་ཞིང་། ཞིང་དུད་ཁྲི2ཙམ་གྱི་སྣེ་འཁྲིད་ཡོད་པ་དང་། མི་རིགས་ལག་ཤེས་བཟོ་ལས་ཉིད་ས་ཁུལ་དེའི་ཞིང་འབྲོག་མང་ཚོགས་ཀྱི་ཡོང་འབབ་འཕར་སྣོན་ཡོང་བའི་ཞོར་ལས་ཡིད་རྟོན་རུང་བ་ཞིག་ཏུ་གྱུར་ཡོད་པ་རེད། །