ཀྲུང་གོ་བོད་ཀྱི་དྲ་བའི་འཕྲིན། ཉེ་བའི་ལོའི་ནང་། ཆབ་མདོ་ས་ཁུལ་གྱིས་ཐོག་མཐའ་བར་གསུམ་དུ་དབུལ་ཕོངས་ས་ཁུལ་གྱི་ཐོན་སྐྱེད་དང་འཚོ་བའི་ཆ་རྐྱེན་ལེགས་སུ་གཏོང་རྒྱུ་དང་། མང་ཚོགས་ཀྱི་ཡོང་འབབ་འཕར་སྣོན་ཡོང་རྒྱུར་ཤུགས་སྣོན་ཏན་ཏིག་བརྒྱབ་ནས། ཤང་ཧྲིལ་པོར་སྐུལ་སྤེལ་གཏོང་བ་དང་ཁྱོན་ཡོངས་ལ་དབུལ་སྐྱོར་བྱེད་པ། ངལ་རྩོལ་ནུས་ཤུགས་སྤོ་བསྒྱུར་བྱེད་པ། ཞིང་ལས་ཕྱོགས་བསྡུས་གསར་སྤེལ་རྣམ་གྲངས་འཛུགས་སྐྲུན་བྱེད་པ་བཅས་ཀྱི་གྲོང་གསེབ་ཀྱི་དབུལ་སྐྱོར་གསར་སྤེལ་ལས་དོན་ལ་དགེ་མཚན་ལྡན་པའི་གྲུབ་འབྲས་ཐོབ་ཡོད།
ད་བར་ས་ཁུལ་དེ་ཡོངས་ཀྱི་ཤང་གྲོང་རྡལ63ལ་ཤང་ཧྲིལ་པོར་སྐུལ་སྤེལ་གཏོང་བའི་དབུལ་སྐྱོར་རྣམ་གྲངས177ལག་བསྟར་བྱས་པར་རྒྱལ་ཁབ་ཀྱིས་ཁྱོན་མ་དངུལ་སྒོར་དུང་ཕྱུར1.1བཏང་ཡོད་པ་རེད། དེ་དང་དུས་མཚུངས་ས་ཁུལ་ཧྲིལ་པོར་ཁྱབ་པའི་དབུལ་སྐྱོར་རྣམ་གྲངས180ལག་བསྟར་བྱས་པར་རྒྱལ་ཁབ་ནས་མ་དངུལ་སྒོར་དུང་ཕྱུར1.28བཏང་བ་དང༌། སྔོ་ཚལ་འདེབས་འཛུགས་དང་དཔལ་འབྱོར་ནགས་ཚལ་འདེབས་འཛུགས། བོད་ཕག་དང་བོད་བྱ་གསོ་སྤེལ། བཞོན་མ་གསོ་ཚགས། ཆུ་འདྲེན་ཡུར་བུ། ཟམ་པ་ཆུང་གྲས། གྲོང་གསེབ་ཀྱི་གཞུང་ལམ་སོགས་འཛུགས་སྐྲུན་བྱེད་པའི་རྣམ་གྲངས་དེ་དག་བདེ་བླག་ངང་ལག་བསྟར་བྱེད་བཞིན་ཡོད་པ་རེད།  །