ཀྲུང་གོ་བོད་ཀྱི་དྲ་བའི་འཕྲིན། འདི་ལོ་ཤར་ཚུན། ཆབ་མདོ་གྲོང་ཁྱེར་གྱིས“བདུན་ལྡན་གྲོང་ཁྱེར་མཉམ་དུ་གཏོད”པ་གཞི་རྟེན་དུ་བྱས་ཏེ་བོད་རང་སྐྱོང་ལྗོངས་ཀྱི“དམངས་འཚོའི་བྱ་བ་དངོས་བཅུ”ཕྱོགས་ཡོངས་ནས་དོན་འཁྱོལ་དང་། “གནད་སྨིན་གཅིག་དང་གཙོ་གནད་བཞི”ཡི་ལས་དོན་ལ་སྐུལ་འདེད་ཤུགས་ཆེན་གཏོང་བ། དམངས་འཚོའི་ཞན་ཆ་ནུས་ཤུགས་ཡོད་རྒུས་གསབ་པ་བཅས་ཀྱིས་དབུལ་སྒྲོལ་འགག་སྒྲོལ་གྱི་ལས་འགན་ཁག་དོན་ཐོག་ཏུ་འཁྱོལ་བར་སྐུལ་འདེད་རྒྱུན་ཆད་མེད་པར་བཏང་བ་རེད།

     སློབ་གསོའི་བྱ་གཞག་སྔོན་ལ་འཕེལ་རྒྱས་བཏང་ཞིང་། ཆབ་མདོས་སློབ་གསོར་བརྟེན་ནས་གྲོང་ཁྱེར་སྟོབས་ཆེར་གཏོང་བའི་འདུ་ཤེས་བརྟན་པོར་འཛུགས་པ་དང་། “100%བྱས་པ་ལྔ”ཡི་དམིགས་ཚད་ལ་དམ་པོར་དམིགས་པ། བྱང་ཚད་མཐོར་གཏོང་འདུ་འགོད་ཕྱོགས་ཡོངས་ནས་ལག་ལེན་བསྟར་བ། “སྐད་གཉིས”སློབ་གསོའི་འདུ་འགོད་ལ་རྒྱུན་ཆད་མེད་པར་སྐུལ་འདེད་གཏོང་བ་བཅས་བྱས་པས་གྲོང་ཁྱེར་ཡོངས་ཀྱི་སློབ་གསོ་འཕེལ་རྒྱས་ཀྱི་ཁོར་ཡུག་ཡག་ཏུ་གཏོང་བ་དང་། རྨང་གཞིའི་ཆ་རྐྱེན་ལེགས་སུ་གཏོང་བ། དགེ་རྒན་དཔུང་ཁག་འཛུགས་སྐྱོང་བྱེད་པ་སོགས་ཀྱི་ཆུ་ཚད་རྒྱུན་ཆད་མེད་པར་མཐོ་རུ་སོང་ཡོད། མིག་སྔའི་བར་རི་བོ་ཆེ་དང་། ལྷོ་རོང་། དཔལ་འབར་བཅས་རྫོང་གསུམ་གྱི་རྒྱལ་ཁབ་འོས་འགན་སློབ་གསོ་དོ་སྙོམས་འཕེལ་རྒྱས་ཀྱི་ལས་དོན་ལ་ཚོད་སྐོར་བྱས་པ་མ་ཟད་ཞིབ་བཤེར་རྩིས་ལེན་ཡང་བྱུང་བ་རེད།

      སྨན་བཅོས་འགན་ལེན་ཆུ་ཚད་ཇེ་མཐོར་བཏང་ཞིང་། ཞིང་འབྲོག་པ་དང་དེ་བཞིན་གྲོང་ཁྱེར་དང་གྲོང་རྡལ་གྱི་གྲོང་མི་དང་ལས་བཟོའི་སྨན་བཅོས་འགན་བཅོལ་ཁྱབ་རྒྱ་ཆེ་རུ་གཏོང་བ་གཙོ་བོར་བཟུང་བ་དང་གྲོང་ཁྱེར་གྱིས་ཀ་པ་རིམ་པ་གསུམ་པ་དང་རྫོང་གིས་རིམ་གསུམ་གཏོད་པ་གཙོ་གནད་དུ་བཟུང་སྟེ་ཐུམ་འབུའི་ནད་འདེམས་དཔྱད་དང་ཕྱོགས་བསྡུས་འགོག་བཅོས་ལས་དོན་ཏན་ཏིག་བསྒྲུབས་ནས་ཞིང་འབྲོག་པའི་བདེ་ཐང་གི་ཆུ་ཚད་ཕྱོགས་ཡོངས་ནས་མཐོ་རུ་བཏང་བ་རེད། མིག་སྔའི་བར་གྲོང་ཁྱེར་ཡོངས་ཀྱིས་ཞིང་འབྲོག་པའི་སྨན་ཡོན་སྒོར་ཁྲི8228.51རྩིས་ཞུ་བྱས་པ་དང་མི་ཁྲི2.02ལ་ཐུམ་འབུའི་ནད་ཕོག་མིན་འདེམས་དཔྱད་བྱས་པ་རེད།

      གྲོང་གསེབ་གསར་པ་འཛུགས་སྐྲུན་ལ་རྒྱུན་ཆད་མེད་པར་ཤུགས་སྣོན་བརྒྱབ་ཅིང་། འདི་ལོའི་ལོ་སྟོད་དུ་ཆབ་མདོ་གྲོང་ཁྱེར་གྱིས་སྒྲིག་ཚུད་གྲོང་ཚོ་6གི་གཞུང་ལམ་ཤར་གཏོང་ལས་འགན་དང་སྒྲིག་ཁོངས་སུ་ཚུད་པའི་གྲོང་ཚོ་51གི་གཞུང་ལམ་ཤར་གཏོང་ལས་འགན་ལེགས་སྒྲུབ་བྱས་པ་དང་། གློག་མེད་པའི་ས་ཁུལ་གྱི་གློག་ཤུགས་འཛུགས་སྐྲུན་རྣམ་གྲངས་8གསར་སྐྲུན་དང་མུ་མཐུད་བསྐྲུན་པ། ཞིང་ནང་ཆུ་བེད་ཀྱི་གཙོ་གནད（ཆེད་དམིགས་རྣམ་གྲངས）རྫོང་གི་འཛུགས་སྐྲུན་རྣམ་གྲངས་4གསར་སྐྲུན་བྱས་པ། ཞིང་ཆུ་འདྲེན་ཁུལ་དང་ཆུ་གྲོན་ཆུང་གི་སྒྱུར་བཀོད་ལས་གྲྭ་8གསར་སྐྲུན་བྱས་པ། 2016ལོའི་གྲོང་གསེབ་ཀྱི་འཐུང་ཆུའི་བདེ་འཇགས་དང་སྲ་བརྟན་མཐོར་གཏོང་ལས་གྲྭའི་གནས་ཚིགས་36མུ་མཐུད་འཛུགས་སྐྲུན་བྱས་པ་རེད།

       དབུལ་སྒྲོལ་འགག་སྒྲོལ་དམག་འཐབ་ཀྱི་རྒྱལ་ཁ་མཐའ་གཅིག་ཏུ་བླངས་ཤིང་། མིག་སྔའི་བར་གྲོང་ཁྱེར་ཡོངས་ཀྱིས་ཡུལ་གཞན་དུ་གནས་སྤོས་དབུལ་སྐྱོར་གྱི་བཀོད་སྒྲིག་བྱ་ཡུལ87སྐྲུན་འགོ་ཚུགས་པ་དེ་དག་ཡུལ་སྤོས་མང་ཚོགས་དུད་ཚང9470ཡི་མི་གྲངས་ཁྲི4.68དང་འབྲེལ་བ་ཡོད་པ་དང་། 2017ལོའི་ལོ་སྟོད་དུ་གྲོང་གསེབ་ཀྱི་མ་མཐའི་འཚོ་བ་འགན་ལེན་དངུལ་སྒོར་དུང་ཕྱུར1.7དང་། གྲོང་གསེབ་ཀྱི་འགན་ལེན་ལྔའི་དུད་ཚང་གི་མ་དངུལ་སྒོར་ཁྲི2434.46 ཁ་ཕྱོགས་གཏན་འཁེལ་གྱི་སྲིད་ཇུས་རང་བཞིན་གྱི་ཁ་གསབ་མ་དངུལ་སྒོར་ཁྲི7743.21 བཅས་དོན་འཁྱོལ་བྱས་པ་དང་། སྨན་བཅོས་རོགས་སྐྱོབ་མ་དངུལ་སྒོར་ཁྲི5002.5གྲབས་གསོག་བྱས་ཡོད་པ་རེད།   །