ཀྲུང་གོ་བོད་ཀྱི་དྲ་བའི་འཕྲིན། ཆབ་མདོ་གྲོང་ཁྱེར་གྱི་དངོས་མང་བཤམས་སྟོན་ཁང་ད་ལོའི་ཟླ9བའི་ཚེས19ཉིན་སྒོ་འབྱེད་པ་ནས་བཟུང་། ཉིན་རེར་ཆ་སྙོམས་སུ་གནས་སྐོར་བ་མི་ཐེངས300ཡན་སྣེ་ལེན་བྱེད་བཞིན་ཡོད་པ་དང་། ཟླ10བའི་ཟླ་མཇུག་བར་དུ་བསྡོམས་པས་གནས་སྐོར་བ་མི་ཐེངས12000སྣེ་ལེན་བྱས།

ཆབ་མདོའི་དངོས་མང་བཤམས་སྟོན་ཁང་ནི་ཆབ་མདོའི་གནའ་རྫས་བསྡུ་ཉར་དང་། སྲུང་སྐྱོབ། ཞིབ་འཇུག སློབ་གསོ། བེད་སྤྱོད། འགྲེམ་སྟོན་བཅས་འདུས་པའི་ཕྱོགས་བསྡུས་རང་བཞིན་གྱི་དངོས་མང་བཤམས་སྟོན་ཁང་ཐོག་མ་ཡིན་ལ། འཛུགས་སྐྲུན་སྤྱིའི་གཞི་ཁྱོན་ལ་སྨི་གྲུ་བཞི་མ12000ལྷག་ཡོད་དེ། འགྲེམས་སྟོན་སྤྱིའི་རྒྱ་ཁྱོན་ལ་སྨི་གྲུ་བཞི་མ8235ཡོད། བཤམས་སྟོན་ཁང་དུ་གནའ་རྫས་རིགས་སོ་སོ10000ལྷག་བསྡུ་ཉར་བྱས་ཡོད་ཅིང་། དེ་མིག་སྔར་བོད་ལྗོངས་ཀྱི་ས་ཁུལ་དང་གྲོང་ཁྱེར་བདུན་གྱི་ཁྲོད་འཛུགས་སྐྲུན་རྒྱ་ཁྱོན་ཆེས་ཆེ་བའི་ས་ཁུལ་དང་གྲོང་ཁྱེར་རིམ་པའི་དངོས་མང་བཤམས་སྟོན་ཁང་ཡིན། མིག་སྔར་འགྲེམ་སྟོན་རྒྱ་ཁྱོན་སྨི་གྲུ་བཞི་མ3000ལྷག་སྒོ་འབྱེད་ཡོད་པ་དང་། རིགས་སོ་སོའི་གནའ་རྫས433དང་པར་རིས240ལྷག་འགྲེམ་སྟོན་བྱས་ཡོད་པ་རེད།  །