ཉེ་སྔོན་གསར་འགོད་པས་བོད་ལྗོངས་ཆབ་མདོ་ས་ཁུལ་གྱི་གནའ་རྫས་ཅུའུ་ནས་རྒྱུས་ལོན་བྱུང་བ་ལྟར་ན།བསྡོམས་པས་མ་དངུལ་སྒོར་ཁྲི9000ལྷག་བཏང་ཡོད་པའི་བྱམས་པ་གླིང་དགོན་པར་ཉམས་གསོ་དང་སྲུང་སྐྱོང་བྱེད་པའི་ལས་གཞི་དེ་ད་ལོའི་ཟླ6པར་ལེགས་འགྲུབ་འབྱུང་རྒྱུ་རེད།
རྒྱུས་ལོན་པ་ལྟར་ན།བྱམས་པ་གླིང་དགོན་པར་ཉམས་གསོ་བྱེད་པའི་བཟོ་སྐྲུན་དེ་ནི་བོད་ལྗོངས་ཀྱི་ལོ་ལྔའི་འཆར་གཞི་བཅུ་གཉིས་པའི་སྐབས་ཀྱི་གནའ་རྫས་གལ་ཆེན་ལ་སྲུང་སྐྱོབ་བྱེད་པའི་རྣམ་གྲངས་ནང་གསེས་ཤིག་ཡིན་ལ།དེ་ནི་མིག་སྔར་ཆབ་མདོ་ས་ཁུལ་གྱི་གཞི་ཁྱོན་ཆེས་ཆེ་བའི་གནའ་རྫས་སྲུང་སྐྱོབ་བཟོ་སྐྲུན་ཐོག་མ་ཡིན་པ་རེད།
ཆབ་མདོ་ས་ཁུལ་གནས་རྫས་ཅུའུ་ཡི་ཅུའུ་ཀྲང་གཞོན་པ་བློ་བཟང་ཆོས་གྲགས་ཀྱིས་བཤད་རྒྱུར།བྱམས་པ་གླིང་དགོན་པའི་ཉམས་གསོ་སྲུང་སྐྱོང་བྱ་བར་དུས་རིམ་གཉིས་དབྱེ་ཡོད་དེ།དུས་རིམ་དང་པོར་གནའ་བའི་བཟོ་སྐྲུན་རྐྱང་རྐྱང་ལ་ཉམས་གསོ་བྱེད་རྒྱུ་དང་།བསྡོམས་པས་མ་དངུལ་སྒོར་ཁྲི3178བཏང་ཡོད་དེ།2013ལོའི་ཟླ3པའི་ཚེས8ཉིན་དངོས་སུ་ལས་འགོ་བརྩམས་ཤིང་།ད་ལྟ་ལས་གཞི་ཕལ་ཆེར་ལེགས་འགྲུབ་བྱུང་ཡོད།
མ་དངུལ་སྒོར་ཁྲི6200བཏང་ཡོད་པའི་དུས་རིམ་གཉིས་པའི་བཟོ་སྐྲུན་གྱི་ལས་གཞི་བསྟུད་མར་ལས་འགོ་བརྩམ་ཞིང་།དེར་སྒོ་ཆེན་དང་།བསང་ཁྲི།སྤོས་ཕོར།ཐང་ཆེན།ཕྱི་ནང་གི་ཆོས་སྐོར་རྒྱག་ལམ།ཆུ་འབུད་དང་ལྗང་སྒྱུར་བྱེད་པ་སོགས་འདུས།མིག་སྔར་བཟོ་སྐྲུན་སྤྱིའི70%ནས80%ལེགས་འགྲུབ་བྱུང་ཞིང་།ཚོད་རྩིས་ལྟར་ན་ཟླ6པར་ལེགས་འགྲུབ་འབྱུང་རྒྱུ་རེད།
ཆབ་མདོ་ས་ཁུལ་གྱིས2008ལོ་ནས་བཟུང་སྔ་གཞུག་ཏུ་ལོ་རྒྱུས་གལ་ཆེན་དང་།གསར་རྗེས་གནའ་རྫས།གནའ་བའི་བཟོ་སྐྲུན།གནའ་ཤུལ།གནའ་གཞུང་།གནས་སྤར་ཆོག་པའི་གནའ་རྫས་ལ་ཐོ་འགོད་དང་ཡིག་ཚགས་བཟོ་བ་སོགས་ཆེད་སྒྲིག་བརྟག་དཔྱད་བྱ་བ་སྤེལ།ཐེངས་འདིའི་བརྟག་དཔྱད་བྱ་བ་ལས་ཆབ་མདོ་ས་ཁུལ་དུ་གནའ་རྫས་ཀྱི་གྲངས་ཀ678ཡོད་པ་བསྡོམས་རྩིས་བྱས་ཡོད་དེ།2012ལོ་ནས2013ལོའི་བར་དུ་ཆབ་མདོ་ས་ཁུལ་གྱིས་བསྡོམས་པས་གནའ་རྫས་སྲུང་སྐྱོང་རྣམ་གྲངས17དངོས་འབེབས་བྱས་ཤིང་བསྡོམས་པས་མ་དངུལ་སྒོར་དུང་ཕྱུར3.2བཏང་ཡོད་པ་རེད།  །