ར་རྔ་ཁ་ནས་དཀར་མཛེས་དང་སེར་ཤུལ་བར་གྱི་གློག་དྲ་སྦྲེལ་བའི་ལས་གྲྭའི་གནས་ཚུལ་བཀོད།སེར་ཤུལ་རྫོང་མཁར་གྱི་ས་ཁད་མཐོ་ཚད་རྒྱ་མཚོའི་ངོས་ལས་སྨི4250ཡོད་པས་མཁའ་རླངས་ནང་དབྱང་འདུས་ཚད་ཁྲེང་ཏུའུ་ཡི་བརྒྱ་ཆ46མ་གཏོགས་མེད་ཅིང་།ལོ་གཅིག་ནང་ཉིན183རིང་གི་གནམ་གཤིས་གྲང་ཚད་ཀླད་སྐོར་འོག་གི་ཏུའུ25ཡོད་པ།ཆེས་འཁྱགས་པའི་སྐབས་སུ་ཀླད་སྐོར་འོག་གི་ཏུའུ45ལ་ཟིན་པ་རེད།རྫོང་ཡོངས་ཀྱི་མི་གྲངས་ཁྲི8.68ཀྱིས་ཆུ་གློག་ས་ཚུགས་ཀྱི་དུས་ཚིགས་རང་བཞིན་གྱི་གློག་འདོན་རྒྱུ་རྐྱང་པར་བརྟེན་དགོས་ཤིང་།མི་རེས་ཆ་སྙོམས་ལོ་རེར་གློག་སྤྱོད་ཚད་ཏུའུ19ལ་ཟིན་གྱིན་མེད་པས་དུས་ཡུན་རིང་བའི་དགུན་དུས་སུ་རྩ་བའི་ཐོག་གློག་སྤྱོད་རྒྱུ་མེད་པ་རེད།2011ལོའི་ཟླ་བ11པའི་ཚེས4ཉིན་ཞིང་ཆེན་ཏང་ཨུ་དང་ཞིང་ཆེན་སྲིད་གཞུང་གིས་རྒྱལ་ཁབ་གློག་དྲ་ཀུང་སི་དང་མཉམ་དུ་ཁྲེང་ཏུའུ་རུ་ལོ་ལྔའི་འཆར་གཞི་བཅུ་གཉིས་པའི་སྐབས་སུ་སི་ཁྲོན་བོད་ཁུལ་གྱི་གློག་དྲ་སྦྲེལ་བའི་རྣམ་གྲངས་གཅིག་བསྡུས་ཀྱིས་ཨར་ལས་རྒྱག་འགོ་ཚུགས་པའི་མཛད་སྒོ་སྤེལ་བ་རེད།རྒྱལ་ཁབ་གློག་དྲས་ལོ་ལྔའི་འཆར་གཞི་བཅུ་གཉིས་པའི་སྐབས་སུ་སི་ཁྲོན་བོད་ཁུལ་ལ་སྒོར་དུང་ཕྱུར192.5གཏང་རྒྱུའི་གྲོས་ཐག་བཅད་ནས་སི་ཁྲོན་བོད་ཁུལ་གྱི་གློག་དྲ་འཕེལ་རྒྱས་གཏང་རྒྱུར་ཚོད་འཛིན་ཐེབས་པའི་འགག་མདོ་རྦད་དེ་གཏོར་བ་རེད།ར་རྔ་ཁ་ནས་དཀར་མཛེས་དང་སེར་ཤུལ་བར་གྱི་གློག་དྲ་སྦྲེལ་བའི་ལས་གྲྭ་ནི2012ལོར་རང་རེའི་ཞིང་ཆེན་གྱི་གློག་དྲ་འཛུགས་སྐྲུན་གྱི་ལས་གྲྭ་ཨང་དང་པོ་ཡིན་ཞིང་།མ་དངུལ་བསྡོམས་འབོར་སྒོར་དུང་ཕྱུར32.15བཏང་ནས་ད་ལོའི་ཟླ་བ3པའི་ཚེས20ཉིན་རང་ཁུལ་གྱི་དར་མདོ་དང་།སེར་ཤུལ།དཀར་མཛེས་བཅས་ས་གནས་གསུམ་ལ་དུས་མཉམ་དུ་ལས་འགོ་ཚུགས་པ་རེད།སྤྱིའི་རིང་ཚད་སྤྱི་ལེ1015ཡོད་པའི་སྐུད་ལམ་དེ་རང་ཁུལ་གྱི་དར་མདོ་རྫོང་ར་རྔ་ཁ་གྲོང་རྡལ་ནས་འགོ་ཚུགས་ཏེ་དར་མདོ་དང་རྟའུ།བྲག་འགོ  དཀར་མཛེས།སྡེ་དགེ་བཅས་ཀྱི་མངའ་ཁོངས་བརྒྱུད་ནས་སེར་ཤུལ་རྫོང་དུ་སླེབས་པར་བརྟེན།དཀར་མཛེས་ཁུལ་གྱི་བྱང་རྒྱུད་ས་ཁུལ་དེ་སི་ཁྲོན་གཙོ་བོའི་གློག་དྲ་སྦྲེལ་མཐུད་བྱ་རྒྱུ་རེད།