ཟླ་བ7པའི་ཚེས4ཉིན།རང་རྒྱལ་གྱི་ཆོས་ལུགས་གནའ་རྫས་རྟོག་ཞིབ་པ་གྲགས་ཅན་སློབ་དཔོན་ཆེན་མོ་ཝུན་ཡུས་ཁྲེང་གིས་གསེར་རྟ་རྫོང་གི་དབང་མདའ་རུ་གནའ་རྫས་རྟོག་ཞིབ་གནང་སྐབས་གླིང་གེ་སར་རྒྱལ་པོའི་རྡོ་རྐོས་འདྲ་སྐུ་ཞིག་རྙེད།འདྲ་སྐུ་དེའི་མཐོ་ཚད་ལ་སྨི0.75དང་།ཞེང་ཚད་ལ་སྨི0.45 ཟབ་ཚད་ལ་སྨི0.06བཅས་ཡོད།
སློབ་དཔོན་ཆེན་མོ་ཝུན་ཡུས་ཁྲེང་གིས་གསུངས་རྒྱུར།འདི་ནི་ཞལ་ཐང་ལྟ་བུ་བྱས་ནས་བརྐོས་པ་ཞིག་རེད།  གླིང་གེ་རྒྱལ་པོའི་དབུ་ལ་གུ་རུ་ཨུ་རྒྱན་པདྨ་དང་།  གཡས་གཡོན་ལ་ཉི་ཟླ་དང་རྒྱུ་སྐར་བརྐོས་འདུག  གེ་སར་རྒྱལ་པོའི་དབུ་རྨོག་ནི་སུང་རྒྱལ་རབས་སྐབས་ཀྱི་བཟོ་ལྟ་འདྲ་ཞིང་།སྐུ་ལ་ཁྲབ་གསོལ་བ་དང་།ཕྱག་གཡས་རལ་གྲི།ཕྱག་གཡོན་མདུང་དར་བསྣམས།འོག་ལ་ལྷ་རྟ་རྐྱང་ལི་བཞོན་ཡོད།  འདྲ་སྐུའི་གོང་འོག་སྤྲིན་རིས་ཀྱིས་བསྐོར་བ་ནི་གེ་སར་རྒྱལ་པོ་ལྷ་རུ་འཛིན་པ་རེད།  སྤྲིན་རིས་བཀོད་སྟངས་ཀྱང་ཡོན་དང་མིང་རྒྱལ་རབས་སྐབས་ཀྱི་ཉམས་དང་ལྡན་འདུག་པས་འདྲ་སྐུ་དེ་བཞེངས་པའི་དུས་ཚོད་ནི་སྤྱི་ལོའི་དུས་རབས་བཅུ་བཞི་པ་ཙམ་ཡིན་པ་ཤེས་ཐུབ་ཟེར།
སློབ་དཔོན་ཆེན་མོ་ཝུན་ཡུས་ཁྲེང་གིས་འདྲ་སྐུ་དེ་ནི་མིག་སྔར་བོད་ཁུལ་དུ་མཐོང་རྒྱུ་ཆེས་སྔ་བའི་རྡོ་རྐོས་འདྲ་སྐུ་ཞིག་ཡིན་པས་གེ་སར་རྒྱལ་པོའི་ཚད་ལྡན་འདྲ་སྐུ་ཞིག་དུ་བརྩི་ཆོག་ཆོག་རེད་གསུངས།

སློབ་དཔོན་ཆེན་མོ་ཝུན་ཡུས་ཁྲེང་གིས་གསེར་རྟ་གེ་སར་དངོས་མང་བཤམས་སྟོན་ཁང་དུ་གེ་སར་རྡོ་བརྐོས་འདྲ་སྐུར་གཟིགས་ཞིབ་གནང་པ།

 
གསར་འགོད་པས་གེ་སར་འདྲ་སྐུའི་ཁྱད་ཆོས་ཟིན་ཐོར་བཀོད་པ།


 
གེ་སར་འདྲ་སྐུའི་ཐོག་གི་སློབ་དཔོན་པད་འབྱུང་གི་འདྲ་སྐུ།