ལོ་རེའི་དབྱར་རྩྭ་དགུན་འབུ་རྐོ་བའི་དུས་ཚིགས་ཤར་གྲབས་ཡོད་པས་དཀར་མཛེས་རྫོང་གིས་འབུ་རྐོ་མཁན་ཚོས་ཉེན་མེད་དང་གོ་རིམ་ལྡན་པའི་སྒོ་ནས་འབུ་རྐོ་ཐུབ་པ་ཁག་ཐེག་བྱེད་ཆེད།ཟླ་བ4པའིཚེས11ནས་བཟུང་སྟེ་ལོ་ཕྱེད་ཀའི་དུས་ཚོད་སྤྱད་དེ་བརྡ་ཐང་མ་འབྲོག་ཁུལ་གྱི་དམིགས་བསལ་གནས་དོན་ལ་ཕྱོགས་བསྡུས་ལེགས་སྒྲིག་གི་ལས་ཀ་སྤེལ་བ་རེད།གོང་ཚེས་ཉིན།དཀར་མཛེས་རྫོང་གི་བརྡ་ཐང་མ་འབྲོག་ཁུལ་གྱི་དམིགས་བསལ་གནད་དོན་ལ་ཡང་དུ་ཕྱོགས་བསྡུས་ལེགས་སྒྲིག་བྱེད་པའི་སྐུལ་སློང་ཚོགས་ཆེན་འཚོགས་ནས་འབྲོག་ཁུལ་དེའི་ཤང4ཡི་འབྲོག་དམངས400ལྷག་ཙམ་ཤང་སོ་སོའི་སྲིད་འཛིན་གྲོང་སྡེའི་ཨུ་ལྷན་གཉིས་ཀྱི་ཨུ་ཡོན་ཚོགས་འདུར་ཞུགས་ཡོད།ཚོགས་འདུའི་ཐོག་རྫོང་ཨུའི་ཧྲུའུ་ཅི་གཞོན་པ་ཀརྨ་བསོད་ནམས་གཙོས་པའི་འགོ་ཁྲིད་ཀྱིས་ཐེངས་འདིའི་ལས་ཀའི་གཙོ་གནད་དྲིལ་བསྒྲགས་བྱས་པ་དང་འབྲེལ་ཡོད་ཀྱི་ཁྲིམས་སྲོལ་དྲིལ་བསྒྲགས་དཔྱད་ཡིག400ལྷག་ཙམ་བཀྲམ་པས་མང་ཚོགས་ཀྱིས་ལས་ཀའི་གལ་ཆེའི་རང་བཞིན་དང་དགོས་ངེས་ཀྱི་རང་བཞིན་ལ་ངོས་འཛིན་ཡག་པོ་བྱེད་ཐུབ་པ་རེད།ཐེངས་འདིའི་ཕྱོགས་བསྡུས་ལས་ཀ་བདེ་བླག་ངང་སྤེལ་བའི་ཆེད་རྫོང་དེས་སྤྱི་བདེ་ལས་ཁུངས་དང་ཞིབ་བཤེར་ཁང་།ཁྲིམས་འཛིན་ཁང་སོགས་སྡེ་ཁག་གི་ལས་བྱེད་པ་དང་།ཉེན་རྟོག་པ50དང་རླངས་འཁོར་རིགས་སྣ་ཚོགས15བཅས་འབྲོག་ཁུལ་དུ་མངགས་པ་དང་ཆབས་ཅིག་དྲིལ་བསྒྲགས་དང་རྒྱབ་ཕྱོགས་མཁོ་སྒྲུབ་ལས་དོན།ཁྲིམས་ལུགས་སློབ་གསོ།འགལ་བ་ཞིབ་རྩིས་སོགས་ཀྱི་འགན་ནུས་ལས་སྒྲུབ་ཚོ་ཆུང་བཙུགས་ཏེ་ཕྱོགས་བསྡུས་ལེགས་སྒྲིག་ཀྱི་ལས་ཀའི་རྨང་གཞི་སྲ་ཞིང་བརྟན་པ་ཞིག་བཏིང་ཡོད་པ་རེད།