ས་གཞི་ཡངས་པོའི་རྩི་ཤིང་སྣ་ཚོགས་ལ་གསོན་ཤུགས་ཀྱི་སྐྱེ་སྟོབས་འཕེལ།འབྲུ་དྲུག་གི་སྐྱེ་སྟོབས་བཟང་ཞིང་སྒོ་ཕྱུགས་ཀྱི་ཤ་ཤེད་རྒྱས་པའི་དབྱར་གཞུང་དུ་སྨྱུག་འཛིན་པས་ཕྱག་ཕྲེང་རྫོང་ཕྲེང་སྟོད་ཤང་གྲོང་སྟོད་གྲོང་ཚོའི་བོད་ཀྱི་ཁྱིམ་གཞིས་མགྲོན་ཁང་ནང་བཅར་འདྲི་བྱེད་དུ་ཆས་པ་ཡིན།
གྲོང་སྟོད་ནི་ཕྱག་ཕྲེང་རྫོང་མཁར་དང་སྤྱི་ལེ12རྒྱང་སར་གནས་ཡོད་ཅིང་།གྲོང་ཚོ་ཡོངས་ལ་དུད་ཚང47ཡོད་པར་མི་གྲངས330ཡོད་པའི་གྲོང་ཚོ་ཞིག་རེད།གནམ་གཤིས་འཚམ་ལ་འབྲུ་དྲུག་སྨིན་པའི་ཡུལ་གྲུ་ཞིག་ཡིན་པར་བརྟེན་ཕྱག་ཕྲེང་རྫོང་གི་འབྲུ་མཛོད་ཅེས་མཚན་སྙན་ཡོད་པས་མ་ཚད།གྲོང་སྟོད་གྲོང་ཚོར་ཀུ་ཤུ་དང་ཁམ་བུ་སོགས་ཤིང་ཏོག་རིགས་ཀྱི་ཐོན་ཚད་འབེལ་པོ་ཡིན་ལ་སྤུས་ཀ་ཡག་པས་ས་གནས་གཞན་དུ་སྙན་པའི་གྲགས་པ་ཁྱབ།མིག་སྔར་གྲོང་ཚོ་ཡོངས་ཀྱིས་རང་འགུལ་གྱི་གསོ་སྤེལ་མཉམ་ལས་ཁང་།ཤིང་ཏོག་མཉམ་ལས་ཁང་བཙུགས་ནས་ཀུང་སིའི་ཐོག་ཞིང་དུད་བསྣན་པའི་བདག་གཉེར་རྣམ་པ་ཞིག་གྲུབ་ཡོད།རྫོང་དེས་ཤམ་བྷལའི་ཡུལ་སྐོར་ལྗོངས་རྒྱུའི་སྤྲོ་གསེང་བྱ་ཡུལ་བསྐྲུན་པའི་གོ་སྐབས་དམ་འཛིན་བྱས་ནས་གྲོང་ཚོ་ཡོངས་སུ་ཚོང་ཁང་དང་ཡུལ་མིའི་སྣེ་ལེན་བྱེད་སའི་མགྲོན་ཁང་འཕེལ་རྒྱས་བཏང་ནས་ཞིང་པ་ཚོའི་དཔལ་འབྱོར་ཡོང་འབབ་འཕར་སྣོན་གཏོང་ཐབས་བྱས་པ་རེད།
ཟླ་བ6པའི་ཚེས26ཉིན་གསར་འགྱུར་ཐོ་འགོད་པས་ལོ་ན66ལ་སོན་པའི་རྡོ་རྗེ་བཟང་པོ་ཚང་གི་ཁྱིམ་དུ་བཅར་འདྲི་བྱེད་དུ་འགྲོ་བ་ཡིན།ཁ་བརྡ་ལབ་ཞོར་དུ་རྡོ་རྗེ་བཟང་པོས་སེམས་འགུལ་ཐེབས་པའི་ངང་ནས་ཁོ་རང་ཚང་གི་འཚོ་བའི་འགྱུར་ལྡོག་ལྷུག་བརྗོད་བྱས་བྱུང་།རྡོ་རྗེ་བཟང་པོའི་བཤད་རྒྱུར།སྔོན་ཆད་ཁོ་ཚོ་ནི་དཀའ་ངལ་ཆེན་པོ་ཡོད་པའི་ཁྱིམ་ཚང་ཞིག་ཡིན།ལོ་གསུམ་གྱི་སྔོན་དུ་ཕྱག་ཕྲེང་རྫོང་གིས་ཡུལ་སྐོར་ལྗོངས་རྒྱུ་འཕེལ་རྒྱས་གཏོང་རྒྱུའི་དུང་བརྡ་བསྒྲགས་པ་དང་ཆབས་ཅིག     རྡོ་རྗེ་བཟང་པོས་ཀྱང་བོད་ཀྱི་ཁྱིམ་གཞིས་མགྲོན་ཁང་འཛུགས་གཉེར་བྱས་མཐར།འཚོ་བ་ཡང་རིམ་བཞིན་བཟང་ཕྱོགས་སུ་གྱུར་ནས་ན་ནིང་ལོ་ཁོ་ནའི་ནང་ཡོང་འབབ་སྒོར1000ལྷག་ཙམ་འཕར་སྣོན་བྱུང་ཡོད་པ་རེད།
དངོས་གནས་བཤད་ན།དེའི་སྐབས་སུ་ངས་བོད་ཀྱི་ཁྱིམ་གཞིས་མགྲོན་ཁང་འཛུགས་གཉེར་བྱསནས་དངུལ་ལོན་རྒྱུ་དྲན་ཡང་མ་མྱོང་།རྫོང་ནང་ནས་མི་མངགས་ཏེ་ངའི་ཤིང་ཏོག་ལྡུམ་ར་གསར་དུ་འཆར་འགོད་བྱེད་རྒྱུ་རེད་ཅེས་ཐོས་རྗེས་བློ་ལ་གཏན་ནས་བབས་མེད།དེའི་རྗེས་སུ་ཤང་གི་ལས་བྱེད་པ་ཚོས་ང་ལ་སློབ་གསོ་བྱེད་དུ་འོངས་ནས་བློ་བདེ་མོ་གྱིས།གལ་ཏེ་མ་རྩ་ལྡིབ་ནས་ཤང་གིས་འགན་འཁུར་ཆོག་ཟེར།རྡོ་རྗེ་བཟང་པོས་བཟོས་ཚར་བའི་རྡོ་ལེབ་བཏིང་པའི་ལམ་དང་རྡོ་ཟམ།གྲལ་གསེང་ནང་བཞིན་སྐྱེ་བའི་དཔལ་འབྱོར་འབྲས་ཤིང་བཅས་ལ་བལྟས་ཞོར་མྱོང་ཚོར་ཟབ་པོ་མཚོན་པའི་སྐད་ཆ་དུམ་འདི་གསར་འགྱུར་ཐོ་འགོད་པར་བཤད་བྱུང་།
ན་ནིང་ལོར།རྡོ་རྗེ་བཟང་པོས་རྫོང་གིས་འདོན་སྤྲོད་བྱས་པའི་ཏང་ཡོན་གྱིས་ལས་རིགས་གསར་སྐྲུན་བྱེད་སའི་རོགས་སྐྱོར་ཐེབས་རྩ་སྒོར་ཁྲི3ཡིས་རོགས་རམ་བྱས་འོག   རང་ཉིད་ཀྱིས་སྒོར6000གཏོང་འཇོག་བྱས་ཏེ་ལུས་པོ་ཁྲུས་ཁང་དང་།གསང་སྤྱོད་ཁང་།མགྲོན་ཁང་།སྐར་ཁུང་།ཁྱིམ་ཆས་ལེགས་བཅོས་བྱས་པའི་དུས་མཚུངས་སུ།ལྗོངས་རྒྱུ་བ་ཚོའི་རེ་འདུན་སྐོང་ཆེད།ད་ལོར་རྡོ་རྗེ་བཟང་པོ་ཚོས་འདེབས་གསོ་གཞི་ཁྱོན་རྒྱ་སྐྱེད་གཏོང་བ་རེད།ཕྱིན་ཆད་ཀྱི་འཆར་གཞི་སྐོར་ལབ་པའི་སྐབས་སུ།མི་རྒན་རྡོ་རྗེ་བཟང་པོས་གདོང་ངོས་སུ་འཛུམ་དམུལ་ཁེངས་བཞིན་བཤད་རྒྱུར།བོད་ཀྱི་ཁྱིམ་གཞིས་གླིང་ག་ལ་བརྟེན་ནས་ས་གནས་རང་ཉིད་ཀྱི་དམངས་སྲོལ་གོམས་གཤིས་དྲིལ་བསྒྲགས་བྱས་ཏེ་རྒྱལ་ཁབ་ཕྱི་ནང་ལྗོངས་རྒྱུ་བ་དེ་བས་མང་པོ་ཞིག་གི་ཡིད་དབང་ཕྱག་ཕྲེང་ཕྱོགས་སུ་འགུག་རྒྱུ་དེ་ཡིན།