ཟླ་4ཚེས་18ཉིན།བྲག་འགོ་རྫོང་ཉི་མོ་ཤང་ཤྭ་རྭ་ཐང་གྲོང་ཚོའི་ཝུའུ་ཧྥུ་ཧྲོའུ་ཡི་ཞིང་ནང་ཞིང་ཆེན་ཞིང་ལས་ཚན་རྩལ་ཁང་གི་ཆེད་ལས་མཁས་པ་དང་བྲག་འགོ་རྫོང་ཞིང་ལས་ཚན་རྩལ་མི་སྣ་ཚོས་འཛུགས་གཉེར་བྱས་པའི་ལས་ཡུལ་དངོས་སུ་ཞོག་ཁོག་འདེབས་འཛུགས་བྱ་རྒྱུའི་ལག་རྩལ་གསོ་སྐྱོང་སྦྱོང་བརྡར་གྱི་ལས་ཀ་སྤེལ་བཞིན་ཡོད།
     ད་ལོ་ནས་བཟུང་བྲག་འགོ་རྫོང་གིས་ཞིང་ལས་ལོ་ཏོག་འདེབས་འཛུགས་བྱེད་ཚུལ་ལེགས་སྒྲིག་ཤུགས་ཆེར་བྱེད་པ་དང་།ཞིང་ཆེན་གྱི་ཞིང་ལས་ཚན་རྩལ་ཁང་དང་ནན་ཁྲུང་གྲོང་ཁྱེར་གྱི་ཞིང་འབྲོག་ཅུས་དང་མཉམ་འབྲེལ་བྱས་ནས།རྫོང་འདིའི་ཉི་མོ་ཤང་དང་སྲིབ་མོ་ཤང་དུ་རྒྱ་ཁྱོན་ལྡན་པའི་ཞོག་ཁོག་གི་སོན་བཟང་འདེབས་འཛུགས་ཀྱི་རྟེན་གཞི་བཙུགས་པ།རྟེན་གཞིའི་འཛུགས་སྐྲུན་ཇེ་མགྱོགས་སུ་བྱེད་པ་དང་།ཚན་རིག་དང་མཐུན་པའི་འདེབས་འཛུགས་ཀྱི་ལག་རྩལ་གསོ་སྐྱོང་བྱེད་ཆེད།རྫོང་འདིས་ཞིང་ཆེན་གྱི་ཞིང་ལས་ཚན་རྩལ་ཁང་ནས་འདེབས་འཛུགས་དང་ནད་འབུའི་གནོད་པ་འགོག་བཅོས་ཀྱི་ཆེད་ལས་མཁས་པ་གདན་ཞུ་བྱས་ནས་རྫོང་དེའི་ཞིང་ལས་ཚན་རྩལ་མི་སྣ་དང་མཉམ་དུ་ཞིང་པ་ཚོར་ཆེད་དོན་གསོ་སྐྱོང་སྦྱོང་བརྡར་གྱི་ལས་ཀ་སྤེལ་བ།གསོ་སྦྱོང་ནང་ཆེད་ལས་མཁས་པས་ཞོག་ཁོག་གི་སོན་བཟང་འདེབས་གསོའི་གལ་ཆེའི་རང་བཞིན་དང་དཔལ་འབྱོར་གྱི་དོན་སྙིང་འགྲེལ་བཤད་བྱས་པར་མ་ཟད།ད་དུང་ཞོག་ཁོག་གི་སོན་བཟང་འདེམས་རྒྱུ་དང་ནད་འབུའི་གནོད་པ་འགོག་བཅོས་སོགས་ཀྱི་ལག་རྩལ་ཞིང་འབྲོག་མང་ཚོགས་ལ་ལས་ཡུལ་དངོས་སུ་སློབ་ཁྲིད་བྱས་པ་རེད།