འཆར་འགོད་སྔ་ཙམ་དང་།གསོག་འཇོག་སྔ་ཙམ།འཛུགས་སྐྲུན་སྔ་ཙམ།གྲ་སྒྲིག་སྔ་ཙམ་བཅས་བྱས།
     ཟླ་བ5པའི་ཚེས11ཉིན།གསར་འགོད་པས་ཁུལ་འབྲོག་པའི་གཞིས་ཆགས་གཞུང་ལས་ཁང་ནས་ཤེས་རྟོགས་བྱུང་བར།དམིགས་ཡུལ་ལེགས་འགྲུབ་ཡོང་བ་བྱེད་ཆེད།རྫོང་སོ་སོས་ཨར་ལས་མ་རྒྱག་སྔོན་གྱི་གྲ་སྒྲིག་ལས་ཀ་ཡག་པོ་བྱ་རྒྱུ་དེ་ལོ་འཁོར་གྱི་དམིགས་ཡུལ་ལས་འགན་བདེ་བླག་ངང་འགྲུབ་པར་འགན་ལེན་བྱེད་པའི་གལ་འགངས་ཆེ་བའི་ལྷུ་ཚིགས་ཤིག་ཏུ་བརྩིས་ནས་དམ་འཛིན་བྱས་པ།མིག་སྔར་ཁུལ་ཡོངས་ཀྱི་འབྲོག་པའི་གཞིས་ཆགས་བྱ་སྤྱོད་འཆར་གཞི་གོ་རིམ་ལྡན་པའི་སྒོས་སྐུལ་སྤེལ་བྱེད་བཞིན་པ།
     འཆར་གཞི་སྔ་ཙམ་བཞག་པ་དང་།འཆར་འགོད་ཀྱི་ཇུས་གཞི་སྔ་ཙམ་དོན་འཁྱོལ་བྱས་པ།ན་ལོའི་དགུན་ཁ་དང་ད་ལོའི་དཔྱིད་ཀ་ནས་བཟུང་།ཞིང་ཆེན་དང་ཁུལ་གཉིས་ཀྱིས་སྤྲད་པའི་དམིགས་ཡུལ་ལས་འགན་ལ་གཞིགས་ནས་རྫོང་སོ་སོས་འབྲོག་པའི་གཞིས་ཆགས་དང་།འགྲིམ་འགྲུལ།ཆུ་དོན།སྡོད་ཁང་འཛུགས་སྐྲུན།དབུལ་སྐྱོར་སོགས་སྡེ་ཁག་གི་མི་སྣ་སྒྲིག་འཛུགས་བྱས་ནས་འབྲོག་པའི་གཞིས་ཆགས་ས་འཛུགས་སྐྲུན་བྱ་ཡུལ་དུ་དངོས་སུ་ཞིབ་བཤེར་བྱས་པ་དང་འཛུགས་སྐྲུན་བྱེད་གྲབས་ཡོད་པའི་རྣམ་གྲངས་ལ་ཡང་དུ་དཔྱད་ཞིབ་དོན་འཁྱོལ་བྱས་པ་རེད།དོན་དངོས་དང་མི་མཐུན་པ་དང་ཡང་ན་མང་ཚོགས་ཀྱི་བསམ་འཆར་མང་ན་ཁ་གཏད་རོགས་སྐྱོར་འཛུགས་སྐྲུན་སྡེ་ཚན་དང་མཐུན་སྦྱོར་ཧུར་ཐག་བྱས་ནས་དུས་ཐོག་ཏུ་བཟོ་བཅོས་བྱ་རྒྱུ་འཐུས་ཚང་བཏང་བ་རེད།མིག་སྔར།རྫོང་སོ་སོས་གཞི་རྩའི་ཐོག2011ལོའི་གཞིས་ཆགས་སྡོད་ཁང་འཆར་གཞི་ལག་བསྟར་ཇུས་འགོད་ཞིབ་དཔྱད་དང་བཟོ་བཅོས།འཐུས་ཚང་ལས་ཀ་བཅས་ལག་བསྟར་བྱས་ནས་གཞིས་ཆགས་སྡོད་ཁང་ཆགས་སྟངས་དང་འཛུགས་སྐྲུན་བྱེད་སྟངས་གཞི་རྩའི་ཐོག་གཏན་འཁེལ་བྱས་ཚར་བ་རེད།རྫོང་ཕལ་ཆེར་གྱིས་གཞིས་ཆགས་སར་ཆུ་དང་གློགལམ།གད་སྙིགས་བསྡུ་བླུག་བྱེད་ས་སོགས་སྒྲིག་ཆས་ཆ་ཚང་འཛུགས་སྐྲུན་རྣམ་གྲངས་གསལ་པོ་བྱས་ནས་དོན་འཁྱོལ་བྱས་ཡོད་པ།འཛུགས་སྐྲུན་རྣམ་གྲངས་ཁག་གཅིག་གི་སུ་འཇོན་དེ་འགུགས་ཀྱི་ལས་ཀ་གྲུབ་པ་རེད།
     གསོག་འཇོག་སྔ་ཙམ་བྱས་ཡོད་པ་སྟེ།འཛུགས་སྐྲུན་རྒྱུ་ཆ་གསོག་འཇོག་བྱ་རྒྱུ་ནན་འཛིན་བྱས་པ།ད་ལོའི་འབྲོག་པའི་གཞིས་ཆགས་འཛུགས་སྐྲུན་བདེ་བླག་ངང་སྐུལ་སྤེལ་གཏོང་རྒྱུར་ཁག་ཐེག་བྱེད་ཆེད།རྫོང་སོ་སོས་ཧུར་ཐག་གིས་གཞིས་ཆགས་འབྲོག་པ་ཚོ་སྐུལ་སློང་དང་སྒྲིག་འཛུགས་བྱས་ནས་དུས་ཐོག་ཏུ་ཤིང་ཆ་དང་བྱེ་རྡོ་གསོག་འཇོག་ལས་ཀ་སྔ་ཙམ་བསྒྲུབས་པ་དང་ཆབས་ཅིགཧུར་ཐག་གིས་ཨར་འདམ་དང་ངར་ལྕགས་རྒྱུ་ཆས།སྒོ་དང་སྒེའུ་ཁུང་སོགས་ཕྱིར་ནས་ཉོ་དགོས་པའི་རྒྱུ་ཆས་སྤྱོད་གྲངས་སྔོན་རྩིས་བྱས་པ་དང་རྒྱུ་ཆས་མཁོ་སྤྲོད་བྱེད་མཁན་ཚོང་པ་དང་མཐུན་སྦྱོར་ཡག་པོ་བྱས་པ་རེད།མིག་སླེབས་དུས།ཁུལ་ཡོངས་ཀྱིས་ཤིང་ཆ་སྨི་གྲུ་བཞི་ལྷམ་པ96770དང་ཨར་འདམ་ཏུན24749།ངར་ལྕགས་རྒྱུ་ཆས་ཏུན4524.45།ས་གནས་རྒྱུ་ཆས་སྨི་གྲུ་བཞི་ལྷམ་པ571385བཅས་གྲ་སྒྲིག་བྱས་ཚར་བ་རེད།
     འཛུགས་སྐྲུན་སྔ་ཙམ་བྱས་པ།གཞུང་ལམ་འཛུགས་སྐྲུན་བྱ་རྒྱུ་དམ་འཛིན་སྔ་ཙམ་བྱས་པ།ད་ལོའི་ལག་བསྟར་བྱེད་པའི་གཞིས་ཆགས་ས་ཁག་གཅིག་རྒྱང་རིང་ལུང་ཁུལ་ཡིན་པ་དང་།གཞུང་ལམ་མེད་པའི་དོན་དངོས་ལ་དམིགས་ནས་འཛུགས་སྐྲུན་ལས་འགན་བདེ་བླག་ངང་སྐུལ་སྤེལ་གཏོང་ཆེད།ཉག་ཆུ་དང་རྟའུ་སོགས་རྫོང་གིས་ན་ལོའི་དགུན་ཁ་ནས་འགོ་བཙུགས་ཏེ་ཧུར་ཐག་གིས་གཞིས་ཆགས་སའི་གཞུང་ལམ་མྱུར་བཟོ་བྱས་ནས་གཞིས་ཆགས་འབྲོག་པའི་འཛུགས་སྐྲུན་རྒྱུ་ཆས་དེ་དུས་ཐོག་ཏུ་སྐྱེལ་ཐུབ་པར་ཁག་ཐེག་བྱས་པ་རེད།
     གྲ་སྒྲིག་སྔ་ཙམ་བྱས་ཡོད་པ་སྟེ།མ་དངུལ་ཧུར་ཐག་གིས་གྲ་སྒྲིག་ཡག་པོ་བྱས་པ།ཁུལ་ཡོངས་ཀྱི་རྫོང་སོ་སོས་སྔར་ལྷག་གིས་བྱེད་ཐབས་མང་པོ་བླངས་ནས་འཛུགས་སྐྲུན་གྱི་མ་དངུལ་གྲབས་གཤོམ་བྱས་ཏེ་གཞིས་ཆགས་སྡོད་ཁང་འཛུགས་སྐྲུན་དུས་བཀག་ལྟར་ལས་འགོ་ཚུགས་པར་འགན་ལེན་བྱས་པ་རེད།