རྒྱུ་སྐར་ས་ག་འཆར་བའི་ཧོར་ཟླ་བཞི་པ་འདིའི་ཚེས་པ་བཅོ་ལྔ་ལ་སངས་རྒྱས་ཤཱཀྱ་ཐུབ་པ་སྐུ་བལྟམས་པ་དང་།སངས་རྒྱས་པ།མྱ་ངན་ལས་འདས་པའི་དུས་ཆེན་གསུམ་དུས་གཅིག་ཏུ་འཛོམས་པར་གསུངས་རུང་།བཞེད་པ་གཞན་གྲགས་སུ་ས་ག་ཟླ་བའི་ཚེས་བདུན་ཉིན་ཤཱཀྱ་མུ་ནེ་ལུམ་བིའི་ཚལ་དུ་སྐུ་བལྟམས་པ་དང་།ཚེས་བཅོ་ལྔ་ཉིན་ཤཱཀྱ་མུ་ནེ་ཡུམ་གྱི་ལྷུམས་སུ་ཞུགས་པ་དང་།སངས་རྒྱས་པ།མྱ་ངན་ལས་འདས་པ་བཅས་ཀྱི་དུས་ཆེན་གསུམ་འཛོམས་པ་ཡིན་ཟེར།གང་ལྟར་ཡང་ས་ག་ཟླ་བའི་དུས་སྟོན་དེར་བོད་མི་ཚོས་ཧ་ཅང་མཐོང་ཆེན་བྱེད་ཀྱི་ཡོད།ཆོས་ལུགས་ཀྱི་ཤོད་རྒྱུན་དུ་ས་ག་ཟླའི་རིང་དགེ་སྡིག་ཇི་ལྟར་བྱས་ན་འབུམ་འགྱུར་རེད་ཟེར་བར་དམིགས་ནས་དད་ལྡན་བོད་མི་ཚོས་ཤ་སོགས་དམར་ཟས་དང་མི་དགེ་བ་སྤོང་བ་དང་།ངན་སློང་ལ་སྦྱིན་པ་གཏོང་བ།སྲོག་གཅོད་མི་བྱེད་པ།དགོན་སྡེ་ཁག་ལ་མཆོད་འབུལ་དང་།སྨྱུང་གནས་སྲུང་བ་སོགས་དགེ་བའི་ལས་ལ་རང་རང་འཁོས་དཔག་ལ་གཞིགས་ཏེ་རྣམ་དཀར་གྱི་ལས་ལ་བརྩོན་པ་དང་།སྤྱི་ཚོགས་རྙིང་པའི་སྐབས་བཙོན་པ་གློད་གྲོལ་དུ་གཏོང་སྲོལ་ཡོད།ལྷག་པར་དུ་ཚེས་བཅོ་ལྔ་ཉིན་བོད་མི་མང་ཆེ་བས་ཤ་མི་ཟ་བ་ནི་ངག་རྒྱུན་དུ་དེ་ཉིན་སྲིན་པོས་ཀྱང་ཤ་སྤོང་གི་ཡོད་ཟེར།ས་ག་ཟླ་བའི་རིང་བོད་མི་སྟོང་ཕྲག་མང་པོས་རྒན་སྐྱོར་བྱིས་ཁྲིད་ཀྱིས་གླིང་སྐོར་དང་རྩེ་སྐོར་དུ་འགྲོ་བའི་སྐབས་དང་བསྟུན་ནས་རྫོང་རྒྱབ་ཀླུ་ཁང་ཁག་སོགས་གླིང་ཁ་ཁག་ལ་སྤྲོ་སྐྱིད་གཏོང་སྲོལ་ཡོད་པ་རེད།དར་མདོ་ས་ཁུལ་དུའང་དེ་ལས་མ་འདས།ཟླ་བ5པའི་ཚེས10（བོད་ཟླ4པའི་ཚེས8）ཉིན།རི་ཀླུང་ཀུན་ཏུ་སྔོན་ལྗང་གི་གོས་བཟང་བཀླུབས་པའི་མཛེས་ལྗོངས་ཁྲོད་དར་མདོ་ས་ཁུལ་གྱི་མི་རིགས་སོ་སོའི་ཕོ་མོ་རྒན་གཞོན་ཀུན་དང་ཞིང་ཕྱི་ནང་ནས་ཡོང་བའི་སྐུ་མགྲོན་རྣམས་དར་མདོའི་འཕགས་མོ་རི་བོར་འཛོམས་ཏེ་འཕགས་མོ་རི་བོ་ལ་གནས་སྐོར་འགྲོ་བ་དང་།འཕགས་མོ་རྒྱལ་སྤྱིའི་གནས་སྐོར་དུས་ཆེན་སྒྲིག་འཛུགས་ཨུ་ལྷན་གྱིས་སྒྲུབ་འགན་ཁུར་ནས་གདན་ཐོག་ཏུ་བསང་མཆོད་ཀྱི་དུད་སྤྲིན་ལང་ལོང་དུ་འཕྱུར་ཞིང་།མཚར་སྡུག་གི་གླུ་གར་བར་མེད་དུ་འཁྲབ་ནས་དུས་ཆེན་གྱི་བྱེད་སྒོ་རྒྱ་ཆེར་སྤེལ་བ་རེད།
     ཐེངས་འདིའི་རིག་རྩལ་འཁྲབ་སྟོན་གྱི་བྱེད་སྒོ་ནི་དར་མདོ་རྫོང་ཨུ་དང་རྫོང་མི་དམངས་སྲིད་གཞུང་གིས་གཙོ་གཉེར་བྱས་པ་རེད།གོས་སྐུ་ཐང་ཆེན་བཤམས་པའི་ཆོ་ག་ལ་བརྟེན་ནས་རིག་རྩལ་འཁྲབ་སྟོན་བྱེད་འགོ་བཙུགས་པ་དང་།ལས་རིགས་སོ་སོ་ནས་ཡོང་བའི་འཁྲབ་སྟོན་པ་ཚོས་གནས་སྐོར་དུས་ཆེན་ལ་རྟེན་འབྲེལ་མཚོན་ཕྱིར་དུ་སྙན་མོའི་གླུ་ཡིས་དར་མདོའི་མཛའ་གཞས་དབྱངས་སུ་འགུག་ཅིང་།ལྡེམ་མྱུར་གར་གྱིས་མི་ཉག་གི་སྐོར་བྲོ་དང་དཀར་མཛེས་རྡོག་བྲོའབའ་བྲོ་སོགས་མི་རིགས་རིག་གནས་ཀྱི་མཚོ་མོར་མཉམ་དུ་རོལ་བ་རེད།