བོད་ཁུལ་དུ་ཆུ་བོ་མང་ཞིང་ཆུ་བོ་དེ་དག་གིས་ཕན་པ་ཡང་མང་པོ་ཞིག་བསྐྲུན་བཞིན་ཡོད་མོད།དེ་དང་ཆབས་ཅིག་མཐའ་འཁོབ་ཀྱི་གྲོང་སྡེ་ཁ་ཤས་ཆུ་བོའི་ཕར་རིས་ཚུར་རིས་སུ་བཅད་དེ་ཐོན་སྐྱེད་དང་འགྲིལ་འགྲུལ།ཚོང་ལས།བརྡ་འཕྲིན་སོགས་གང་ཅིའི་ཐད་ལ་གྲོང་ཁྱེར་དང་གྲོང་རྡལ་ལས་རྗེས་ལུས་ལྟ་བུ་ཆགས་ཡོད་པ་རེད།
     ཉེ་ཆར་གསར་འགོད་པ་ཉག་རོང་རྫོང་གི་ཤར་བོ་རིའི་གྲོང་སྡེ་རུ་བཅར་འདྲི་བྱེད་དུ་འགྲོ་སྐབས།གྲོང་སྡེ་དེའི་ཡུལ་མི་བསོད་སྟོབས་ཀྱིས་ཡིད་འགུལ་ཐེབས་པའི་ངང་ནས་སྔ་མ་ཡིན་ན་ཁྱིམ་དུ་མཁོ་བའི་ཇ་ཚྭ་དང་སྤྱོད་ཆས་ཉོ་རུ་འགྲོ་དགོས་ཚེ་ལམ་ཐག་རིང་བ་རྣམས་ཞོགས་ཉི་མ་རྩེ་ཤར་ནས་ཁྱིམ་ལས་ཐོན་ཏེ་དགུང་མུན་ལ་མ་ཐུབ་པའི་བར་རང་ཁྱིམ་དུ་ལོག་ཐུབ་ཀྱི་མེད།གློ་བུར་གྱི་ནད་ཚབས་ཆེན་ཞིག་ཕོག་ཀྱང་མགྱོགས་མྱུར་དུ་སྨན་ཁང་དུ་སྐྱེལ་ཐབས་མེད་པས་བར་ཆད་ཀྱི་དབང་དུ་སོང་བའི་མི་གྲངས་ཀྱང་མི་ཉུང་བ་ཞིག་ཡོད་པ་རེད།སློབ་གྲྭ་དང་ཁ་ཐག་རིང་བས་སློབ་སྦྱོང་བྱེད་འདོད་ཀྱང་ཆ་རྐྱེན་གྱིས་བཀག་ནས་ཡོན་ཏན་སྦྱོང་བའི་གོ་སྐབས་མ་འདོར་ཐབས་མེད་པ་ཡིན།ན་སོ་ཕར་འགྲོ་རྣམས་ཕྱི་རོལ་དུ་ལྟད་མོ་དང་ཆོས་མཇལ་འགྲོ་བསམ་ཡང་ལམ་ཐག་རིང་བ་ལ་སྐྲག་ནས་འགྲོ་ཕོད་ཀྱི་མེད།ཕྱི་རོལ་དང་འབྲེལ་འདྲིས་དེ་ཙམ་མི་ཆེ་བས་ལྟ་རྒྱ་དང་ཐོས་རྒྱ་ཆུང་བ་དང་།བསམ་བློ་གཏོང་ཚུལ་ཡང་ཐབས་སྡུག་པོ་ངོ་མ་རེད།ཁོམ་སྐབས་ཡོད་དུས་ཕྱི་རོལ་དུ་ལས་བསྒྲུབ་ཏུ་འགྲོ་འདོད་ཀྱང་ཡོང་སྒོ་ལས་འགྲོ་སོང་མཉམ་པ་ཡིན།དཔེར་ཆུང་ངུ་ཞིག་བཞག་ན་ང་ཚོའི་གྲོང་སྡེ་ལ་ཐུན་མིན་གྱི་ཁྱད་ཆོས་ལྡན་པའི་ཐོན་རྫས་ཤིག་ཡོད་ཀྱང་འགྲིམ་འགྲུལ་སྟབས་མི་བདེ་བས་ཕྱི་རོལ་གྱི་ཚོང་ར་རུ་ཁྱབ་སྤེལ་བྱེད་ཐུབ་ཀྱི་མེད་ལ་རིན་གོང་ཡང་ཆེན་པོ་མི་ལོན་པས་མི་དམངས་ཀྱི་ཟ་ཁ་རང་བཞིན་གྱིས་བསྒག་འགྲོ་གི་འདུགསྔ་མར་ཁྱིམ་ཚང་རེ་ལ་རྟ་དྲེལ་རེ་གཉིས་མེད་ན་ཐོན་སྐྱེད་དང་སྐྱེལ་འདྲེན་གྱི་ཐད་ལ་དངོས་གནས་དཀའ་མོ་ཡིན་ལེ་རེད།ད་ལྟར་ཏང་སྲིད་བཟང་པོའི་དྲིན་གྱིས་ལམ་མེད་ས་ལམ་དང་།ཟམ་པ་མེད་ས་ཟམ་པ་བཙུགས་ནས་མཐའ་འཁོབ་ཀྱི་གྲོང་སྡེ་ཡན་གྱི་འགྲིལ་འགྲུལ་ལམ་བུ་སྟབས་བདེར་བསྐྲུན་པ་དང་ཆབས་ཅིགསྔོན་ཐོན་གྱི་བསམ་བློ་དང་ཡ་རབས་ཀྱི་ལུགས་སྲོལ་མང་པོ་ཞིག་ཀྱང་དར་བ་རེད།ཚོང་ལས་དང་།ནད་ལྟ་བ།སློབ་གྲྭར་འགྲོ་བ།ཡུལ་སྐོར་འགྲོ་བ།ཟུར་ལས་འགྲོ་བ་སོགས་ཕྱོགས་གང་མང་ནས་འགྱུར་ལྡོག་བསམ་ཡུལ་ལས་འདས་པ་ཕྱིན་སོང་།དམངས་ཕན་གྱི་བྱ་བ་འདི་ལྟར་སྒྲུབ་མཁན་གུང་ཁྲན་ཏང་ལ་མི་དགའ་སུ་ལ་དགའ།ངོ་མ་བཅིངས་འགྲོལ་ཐོབ་ཟེར་བ་འདི་འདྲ་བ་ཞིག་ལ་གོ་དགོས་པ་ལོས་ཡིན་ཞེས་བཤད་བྱུང་།མི་རྒན་བསོད་སྟོབས་ཀྱིས་གོང་དུ་བཤད་ཟིན་པའི་སྐད་ཆ་དང་ད་དུང་འཆད་འདོད་པའི་སྐད་ཆ་རྣམས་གསར་འགོད་པས་ཟམ་པ་བརྒྱ་ཡིས་ཕན་བརྒྱ་བསྐྲུན།།མཐའ་འཁོབ་གྲོང་སྡེ་བ་བཅིངས་འགྲོལ་ཐོབ་ཅེས་པའི་ཚིག་རྐང་སྟབས་བདེ་མོ་གཉིས་ཀྱིས་བསྟན་པ་ཡིན་ནོ།།