——སློབ་གསོ་འཕེལ་རྒྱས་ཚོགས་ཆེན་གྱི་གྲོས་བསྡུར་ཟུར་བྲིས།
     ཚེས20ཉིན་གྱི་ཕྱི་དྲོར། སློབ་གསོ་འཕེལ་རྒྱས་ཚོགས་ཆེན་དུ་ཞུགས་པའི་མི་སྣ་རྣམས་ཚོ་ཁག11བགོས་ནས་ཁུལ་ཨུའི་ཧྲུའུ་ཅི་ལུའུ་ཏའོ་ཕིང་དང་། ཁུལ་དཔོན་ལི་ཁྲང་ཕིང་། ཞིང་ཆེན་སློབ་གསོ་ཐིང་གི་ཐིང་ཀྲང་གཞོན་པ་ཅང་ཧྲུའུ་ལིན་བཅས་ཀྱི་གསུང་བཤད་ཀྱི་སྙིང་དོན་དང་《དཀར་མཛེས་ཁུལ་དུས་ཡུན་འབྲིང་རིང་གི་སློབ་གསོ་བཅོས་བསྒྱུར་དང་འཕེལ་རྒྱས་འཆར་འགོད་རྩ་གནད（2011ལོ་ནས2020）》། ཁུལ་ཨུ་དང་ཁུལ་སྲིད་གཞུང་གི་སློབ་གསོ་དམིགས་སུ་བཀར་ནས་འཕེལ་རྒྱས་གཏོང་རྒྱུར་སྐུལ་འདེད་བྱེད་པའི་བསམ་འཆར་དང་། སྔར་ལྷག་གིས་སློབ་གསོ་བཅོས་བསྒྱུར་གསར་གཏོད་གཏིང་ཟབ་ཏུ་གཏོང་རྒྱུའི་བསམ་འཆར་བཅས་ལ་དམིགས་ནས་གྲོས་བསྡུར་བྱས་པ་རེད།
     དར་མདོ་རྫོང་སྒྲིག་ཁྲིམས་ཨུ་ཡོན་ལྷན་ཁང་གི་ཧྲུའུ་ཅི་པའེ་ཕུང་གིས་བཤད་རྒྱུར་། ཐེངས་འདིའི་སློབ་གསོ་འཕེལ་རྒྱས་ཚོགས་ཆེན་གྱི་གཞི་ཁྱོན་དང་ཚད་གཞི། སྤུས་ཚད་དང་ཁོར་ཡུག་བཅས་ནི་ཧ་ཅང་ཆེ་ཞིང་ལེགས་པ་དང་མི་ལ་སྤྲོ་སྣང་དང་སྤོབས་པ་ཚད་མེད་སྦྱིན་གྱི་འདུག འགོ་ཁྲིད་རྣམ་པ་གསུམ་གྱི་གཏམ་བཤད་དང་རྩ་གནད་གཅིག བསམ་འཆར་གཉིས་ཀྱི་སྙིང་དོན་ནི་རང་ཁུལ་སློབ་གསོའི་དངོས་ཡོད་གནས་ཚུལ་དང་ཧ་ཅང་འཚམ་པ་ཞིག་རེད། ཁ་ཕྱོགས་དང་ལས་འགན་གསལ་བ། རང་ཁུལ་གྱི་སློབ་གསོའི་གནས་བབ་དང་མི་འདང་བའི་སྐོར་ལ་རྣག་ཐོག་གཙག་ཁེལ་བའི་ཕྱོགས་བསྡོམས་བྱས་ཡོད་པ་རེད། དར་མདོ་རྫོང་གི་སློབ་གསོ་ལ་མཚོན་ན་ཉེ་བའི་ལོ་ཤས་རིང་ཡར་མར་བསྡུར་ན་གྲུབ་འབྲས་ཆེན་པོ་ཐོབ་ཡོད་ཀྱང་ཕར་ཚུར་བསྡུར་བའི་ཚེ་ད་དུང་མི་འདང་ས་ཡོད་ཅིང་སློབ་ཁྲིད་ཀྱི་སྒྲིག་ཆས་དང་སློབ་མའི་ཟ་ཁང་གི་ཐབ་ཆས་སོགས་ནི་ལོ་དུ་མ་གསར་རྙིང་བརྗེས་ཐུབ་ཀྱི་མེད་པ་དང་། སློབ་གྲྭ་སོ་སོའི་སློབ་ཚན་སོ་སོར་དེ་མཐུན་གྱི་ཆེད་ལས་དགེ་རྒན་མེད་པ། དགེ་རྒན་གྱི་སྒྲིག་གཞི་དང་གོ་མིང་ཆགས་ཚུལ་མི་འཚམ་པ། དགེ་རྒན་སྡུད་ལེན་གྱི་འབྱུང་ཁུངས་དག་པོ་མིན་པ། སྐད་གཉིས་སྨྲ་བའི་དགེ་རྒན་ཧ་ཅང་དཀོན་པ། དགེ་རྒན་གྱི་ཆབ་སྲིད་ཐོབ་ཐང་དང་། གླ་ཕོགས་ཐོབ་ཐང་། འཚོ་བའི་ཐོབ་ཐང་བཅས་ད་དུང་ཐག་གཅོད་གང་ཐུབ་ཡིན་མོད། ང་ཚོ་ལ་དཀའ་ངལ་ཐམས་ཅད་ཁྱད་དུ་བསད་པའི་སྙིང་སྟོབས་ལྡན་ལ་ཐེངས་འདིའི་ཚོགས་ཆེན་གྱི་སྙིང་དོན་ལག་ལེན་མཐར་ཕྱིན་བྱས་ཏེ་དར་མདོ་རྫོང་གི་དཔལ་འབྱོར་དང་སྤྱི་ཚོགས་བྱ་གཞག་ཐམས་ཅད་གོང་སྤེལ་ཆེན་པོ་བཏང་ནས་དཀར་མཛེས་ཁུལ་གྱི་རྫོང་ཁག་ཨང་དང་པོ་བསྐྲུན་རྒྱུའི་ཆོད་སེམས་ང་ཚོ་ལ་ཡོད།

     ལི་ཐང་རྫོང་གི་རྫོང་དཔོན་གཞོན་པ་ཙིན་ཝུའུ་ཡུའུ་ཡིས་ཞིང་ཁུལ་དང་འབྲོག་ཁུལ་གྱི་སློབ་གསོ་གཅིག་ལྟ་བུ་བྱེད་རྒྱུ་མེད་ལ་འབྲོག་ཁུལ་དུ་ཕྱོགས་སྡུད་སློབ་འཛུགས་ཀྱི་ལམ་བུ་ལ་མ་བརྟེན་ན་མི་ཕན་ཞིང་། ཁུལ་ཡོངས་ཀྱི་ཚབ་ཁྲིད་དགེ་རྒན་གྱི་དཔུང་ཁག་ལ་ཞིབ་འཇུག་ཡག་པོ་ཞིག་བྱས་ནས་དེ་དག་གི་ཐོབ་ཐང་ཐག་གཅོད་བྱ་རྒྱུ་དང་དགེ་རྒན་གྱི་སྒྲིག་གཞི་ཇེ་ཆེར་གཏོང་བའི་ལྟ་ཚུལ་དང་རེ་བ་ཞུ་པ་རེད།