ཟླ་བ་༤པའི་ཚེས་༡༨ཉིན་སྔ་དྲོར་བོད་ཀྱི་མཁས་དབང་ཆེན་མོ་གཟན་དཀར་མཆོག་སྤྲུལ་ཐུབ་བསྟན་ཉི་མ་མཆོག་སི་ཁྲོན་ཞིང་ཆེན་བོད་ཡིག་སློབ་གྲྭས་གདན་ཞུས་ལྟར་སློབ་གྲྭར་ཕེབས་ནས་ཁོར་ཡུག་སྲུང་སྐྱོབ་དང་ཆོས་ལུགས་བར་གྱི་འབྲེལ་བའི་བརྗོད་བྱ་གཙོ་བོ་བྱས་ནས་ཨ་རིའི་ནུའོ་ཡའོ་སློབ་གྲྭ་གསར་པའི་རྒྱ་བོད་ཞིབ་འཇུག་ཁང་གི་དབུ་གཙོ་ཨ་ཤུ་ཀ་དང་། ཁུལ་ནང་བསྟན་མཐུན་ཚོགས་ཀྱི་ཚོགས་གཙོ་རྒྱལ་བསྟན་བློ་བཟང་བྱམས་པ། ཁུལ་སྲིད་གྲོས་ཀྱི་ཀྲུའུ་ཞི་གཞོན་པ་རྡོ་རྗེ་བཀྲ་ཤིས་དང་ཀརྨ་རྒྱལ་མཚན། བོད་ཀྱི་མཁས་དབང་སྡེ་རོང་ཚེ་རིང་དོན་གྲུབ་སོགས་དང་། བོད་ཡིག་སློབ་གྲྭའི་དགེ་ཁག་ཅིག་དང་ལྷན་དུ་རང་བྱུང་ཁོར་ཡུག་སྲུང་སྐྱོབ་བྱ་རྒྱུའི་གལ་ཆེའི་གནད་དོན་དང་སྲུང་སྐྱོབ་བྱ་ཐབས་སྐོར་ལ་བཞུགས་མོལ་གནང་བ་རེད།
བཞུགས་མོལ་ཚོགས་འདུ་མཇུག་སྒྲིལ་རྗེས་མཆོག་སྤྲུལ་ཐུབ་བསྟན་ཉི་མ་ལགས་ཀྱིས་སི་བོད་སློབ་གྲྭའི་དགེ་སློབ་ཡོངས་ལ་ལུས་ངག་ཡིད་གསུམ་དྲང་པོ་འཛིན་ནས་བོད་ཀྱི་མི་རིགས་དང་རིག་གནས་ལ་ཕན་ཐོག་པའི་ལས་དོན་འབད་དགོས་པའི་སྐོར་གྱི་བཀའ་སློབ་གནང་བ་རེད།།