ཉེ་ཆར། དཀར་མཛེས་རྫོང་ཨུ་དང་རྫོང་སྲིད་གཞུང་གིས་2010ལོའི་དམངས་འཚོ་ལེགས་བཅོས་ཀྱི་ལས་ཀ་ཡོངས་སུ་སྐུལ་སྤེལ་གཏོང་བ་དང་གཞི་རིམ་མང་ཚོགས་ལ་གློག་སྒུལ་ཁྲའེ་ཡིའུ་ཕྱེ་འཐག་འཕྲུལ་འཁོར་གཏོང་སྤྲོད་བྱེད་པའི་མཛད་སྒོ་སྤེལ་ནས་རྫོང་གི་ཚོགས་ཁང་ཆེན་མོ་བཞིའི་འགོ་ཁྲིད་དང་།རྩ་ཁོག  འདན་མ།  སི་ངོ་། དཀར་ར་སོགས་ཤང16གི་ཏང་སྲིད་འགོ་ཁྲིད་དང་། གྲོང་སྡེའི་ལས་བྱེད་པ་སོགས་འཕྲུལ་འཁོར་གཏོང་སྤྲོད་བྱེད་པའི་མཛད་སྒོ་ནང་ཞུགས་པ་རེད།
འཕྲུལ་འཁོར་གཏོང་སྤྲོད་བྱེད་པའི་མཛད་སྒོ་ཐོག་རྫོང་དེའི་གྲོང་ཚོ་ཧྲིལ་པོ་སྐུལ་འདེད་གཏོང་བའི་འགོ་ཁྲིད་ཚོ་ཆུང་གི་འགན་ཁུར་པས་ཕན་པ་ཐོབ་པའི་ཤང་སོ་སོར་འཕྲུལ་འཁོར་ལ་དོ་དམ་དང་བེད་སྤྱོད་ཡག་པོ་བྱས་ནས་ཏང་གི་དམངས་ཕན་སྲིད་ཇུས་དྲིལ་བསྒྲགས་བྱ་རྒྱུར་ཤུགས་སྣོན་བརྒྱབ་དེ་འཕྲུལ་འཁོར་དེ་མང་ཚོགས་ཀྱི་ཐོན་སྐྱེད་དང་འཚོ་བའི་ཐད་ནུས་པ་གང་ལེགས་སྤེལ་དགོས་ཞེས་བླང་བྱ་བཏོན་པ་རེད། རྫོང་གི་ཚོགས་པ་ཆེན་པོ་བཞིའི་འགོ་ཁྲིད་ཀྱིས་ཤང་སོ་སོའི་འཐུས་མིར་གློག་སྒུལ་ཁྲའེ་ཡིའུ་ཕྱེ་འཐག་འཕྲུལ་འཁོར་གཏོང་སྤྲོད་བྱས་པ་མ་ཟད།ཤང་སོ་སོར་སྔར་ལས་ལྷག་པར་དམངས་འཚོ་ལ་མཐོང་ཆེན་དང་དམངས་འཚོ་ལེགས་བཅོས་ཐད་འབད་བརྩོན་ཆེན་པོ་བྱས་ནས་མང་ཚོགས་ཀྱི་ཐོན་སྐྱེད་དང་འཚོ་བའི་སྤུས་ཀ་མཐོར་འདེགས་གཏོང་དགོས་ཞེས་པའི་བླང་བྱའང་བཏང་བ་རེད།
ཕན་པ་ཐོབ་པའི་མང་ཚོགས་འཆི་མེད་མགོན་པོས་སེམས་འགུལ་ཐེབས་པའི་ངང་ནས་“ཏང་དང་རྒྱལ་ཁབ་ཀྱིས་ང་ཚོར་ལམ་ལས་པ་དང་ཆུ་ཁྲིད་ཡོད། ད་ལྟར་ང་ཚོར་ཡང་གློག་འདོན་ཕྱེ་འཐག་འཕྲུལ་འཁོར་གཏོང་སྤྲོད་བྱེད་བྱུང་། ཏང་གིས་ང་ཚོའི་འཚོ་བར་སེམས་ཁུར་གནང་བ་དེ་ང་ཚོས་སེམས་གཏིང་ནས་བཞག་པ་དང་མི་རབས་ནས་མི་རབས་ཀྱིས་ཏང་གི་བཀའ་དྲིན་མི་བརྗེད”ཅེས་བཤད་པ་རེད།
ཐེངས་འདིའི་མཛད་སྒོ་ནང་ཤང16ལ་རིན་པ་སྒོར་ཁྲི་27ལྡན་པའི་གློག་འདོན་ཁྲའེ་ཡུའུ་ཕྱེ་འཐག་འཕྲུལ་འཁོར་59གཏོང་སྤྲོད་བྱས་ཡོད།