རྟའུ་རྫོང་དཔལ་སྨད་གྲོང་རྡལ་གྲོང་འགོ་གྲོང་སྡེའི་ཁོངས་སུ་ཡོད་པའི་གསེག་རི་གླིང་ག་ནང་ཕྱོགས་བཞི་མཚམས་བརྒྱད་ནས་ཡོང་བའི་ཡུལ་སྐོར་བས་ཁེངས་པ་དང་། ཡུལ་སྐོར་བར་མགྲོན་སྣེ་བྱེད་པའི་ཡུལ་མི་ལ་ལས་ཡུལ་སྐོར་བར་ཐོན་རྫས་བཙོང་བ་དང་།ལ་ལས་རྟ་ཁྲིད་ནས་མི་ཁོམ་མི་ལྕོགས་བྱེད་བཞིན་འདུག།

མཛེས་ལྗོངས་ཁུལ་དུ་ཐོན་ཚེ། ས་ཁམས་ཆགས་སྟངས་ཁྱད་པར་ཅན་གྱིས་གོ་ལ་གཞན་པ་ཞིག་ལ་ཐོན་པའི་སྣང་བ་སྟེར། ཡུལ་སྐོར་བ་ཚོ་ལ་ལས་མཛེས་ལྗོངས་ལ་ལྟད་མོ་ལྟ་བ་དང་། ལ་ལས་པར་ལེན་པ། ལ་ལས་རྡོ་ནགས་གླིང་གར་འཆམ་འཆམ་འགྲོ་བ་སོགས་གང་ས་གང་ལ་དགའ་སྤྲོ་དང་དགོད་སྒྲས་ཁེངས། “ང་དཀར་མཛེས་ལ་ཡོང་ཐེངས་དང་པོ་ཡིན།འདི་གའི་ཡུལ་ལྗོངས་ནི་ས་ཆ་གཞན་དག་ཏུ་མཐོང་དཀའ་བ་དང་།ཧ་ཅང་བརྗིད་ཉམས་ལྡན་ཞིང་དམིགས་བསལ་གྱི་ཁྱད་ཆོས་ཡོད་པ་ཞིག་རེད”ཅེས་ཡུལ་སྐོར་བ་སྐུ་ཞབས་ཁྲེན་ལགས་ཀྱིས་དེ་ལྟར་བཤད།

རྟའུ་རྫོང་དཔལ་སྨད་གྲོང་རྡལ་གྲོང་འགོ་གྲོང་སྡེ་ནི་སྔོན་ཆད་དབུལ་ཕོངས་གྲོང་ཚོ་ཞིག་ཡིན།གྲོང་ཚོ་དེར་ཁྱོན་བསྡོམས་དུད་ཚང191དང་མི676ཡོད།སྐབས་དེར་གྲོང་ཚོ་ཡོངས་ཀྱི་དབུལ་ཕོངས་འབྱུང་ཚད་བརྒྱ་ཆ3.7ལ་ཟིན་པ་དང་མི་རེའི་ཆ་སྙོམས་ཡོང་འབབ་སྒོར3900ལྷག་མ་གཏོགས་མེད། 2016ལོར།རྟའུ་རྫོང་གིས་དཀར་མཛེས་ཀྲུང་ཨའོ་ཡུལ་སྐོར་འཕེལ་རྒྱས་སྤྱི་གཉེར་ཁང་དེ་གསེག་རི་གླིང་གའི་ལྗོངས་ཁུལ་གྱི་གཉེར་སྐྱོང་གཙོ་གཟུགས་སུ་ནང་འདྲེན་བྱས་ནས།ལོ་དེའི་ལོ་མཇུག་ཏུ་རྒྱལ་ཁབ་ཀྱིAབཞི་རིམ་པའི་ལྗོངས་ཁུལ་དུ་བདེ་བླག་ངང་བཙུགས་ཐུབ་པ་རེད། དེ་ནས་བཟུང་། དེ་གར་ཡུལ་སྐོར་ཡོང་མཁན་ཡང་ལོ་རེ་བཞིན་རྒྱུན་ཆད་མེད་པ་དང་གྲོང་འགོ་གྲོང་སྡེའི་ཐུན་མོང་དཔལ་འབྱོར་འཕེལ་རྒྱས་ལ་སྒུལ་ཤུགས་ཆེན་པོ་བསྣན་ཡོད་ལ་ཡུལ་མི་ཚོར་ཡུལ་སྐོར་གྱི་ཡོང་སྒོ་ཡང་ཇེ་མང་དུ་སོང་བ་རེད།

2017ལོ་ནས་ད་བར།སྲིད་གཞུང་གིས་ཁེ་ལས་ནང་འདྲེན་བྱས་པ་དང་། སྤྱི་གཉེར་ཁང་གིས་བདག་གཉེར་བྱས་པ།མང་ཚོགས་ནང་དུ་ཞུགས་པ་བཅས་ཀྱི་ཐབས་སྤྱད་ནས་ལྗོངས་ཁུལ་དུ་ཡུལ་སྐོར་ཡོང་མཁན་ལོ་རེ་ལས་ལོ་རེ་ཇེ་མང་རེད།དུས་མཚུངས་སུ།ང་ཚོའི་གྲོང་ཚོས་ད་དུང་ཐུན་མོང་དཔལ་འབྱོར་འཕེལ་རྒྱས་གཏོང་སྟངས་འཚོལ་ཞིབ་བྱས་ནས་མང་ཚོགས་ཀྱི་ཡོང་འབབ་ཇེ་འཕར་ཡོང་བར་སྐུལ་འདེད་བཏང་སྟེ་ཐོན་ཁུངས་རྒྱུ་ནོར་དུ་གྱུར་བ་དང་ཡུལ་མི་མ་རྐང་དུ་གྱུར་བ་བྱུང་ཡོད་ཅེས་གྲོང་འགོ་གྲོང་སྡེའི་ཧྲུའུ་ཅི་དང་པོ་ལྷ་མོས་དེ་ལྟར་ངོ་སྤྲོད་བྱས།

ཤེས་རྟོགས་བྱུང་བར་གཞིགས་ན།2023ལོར་གསེག་རི་གླིང་གའི་ལྗོངས་ཁུལ་དུ་ཡུལ་སྐོར་བ་ཁྲི100ལྷག་ལ་སྣེ་ལེན་ཞུས་པ་དང་།2023ལོའི་ཟླ8པའི་ཟླ་མཇུག་བར།གྲོང་འགོ་གྲོང་སྡེའི་ཐུན་མོང་དཔལ་འབྱོར་གྱི་ཁེ་སྤོགས་སྒོར་ཁྲི200.3ལ་ཟིན་པ་དང་།མི་རེའི་ཆ་སྙོམས་ཡོང་འབབ་སྒོར2963འཕར་བ་རེད། ད་དུང་། ས་གནས་དེ་གའི་མང་ཚོགས་ཀྱིས་གསེག་རི་གླིང་གའི་ལྗོངས་ཁུལ་ལ་བརྟེན་ནས་རྟ་ཁྲིད་པ་དང་།བསྲེགས་ཟས་དང་ཞོར་ལས་སོགས་ཀྱི་ཡུལ་སྐོར་ཕྱོགས་བསྡུས་ཞབས་ཞུ་སྤེལ་ཏེ།2023ལོའི་ཟླ10བར།རྟ་ཁྲིད་པའི་ཡོང་འབབ་ཁྱོན་བསྡོམས་སྒོར་ཁྲི220.8ལྷག་རག་པ་དང་།བསྲེགས་ཟས་ཀྱི་ཡོང་འབབ་ཁྱོན་བསྡོམས་སྒོར་ཁྲི144.8རག་པ།ལས་ཀ་བྱེད་མཁན་རྣམས་ལ་གླ་ཕོགས་སྒོར་ཁྲི269སྤྲད་པ་རེད།

གྲོང་འགོ་གྲོང་སྡེའི་ཡུལ་མི་བཀྲ་ཤིས་སྨོན་ལམ་གྱིས་གསེག་རི་གླིང་གའི་ལྗོངས་ཁུལ་དུ་རྟ་ཁྲིད་ཞབས་ཞུ་བྱས་ནས་ལོ་གཅིག་ལྷག་ཕྱིན་ཡོད། ཁོས་ལོ་གཅིག་ནང་གྲོང་འགོ་གྲོང་ཚོར་འགྱུར་ལྡོག་ཆེན་པོ་བྱུང་ཡོད། ད་ཆ་ཡུལ་སྐོར་བ་ཇེ་མང་དུ་འགྲོ་བཞིན་ཡོད།ང་ཚོས་གསེག་རི་གླིང་གའི་ལྗོངས་ཁུལ་དུ་རྟ་ཁྲིད་ནས་ཡོང་སྒོ་ལོན་པར་མ་ཟད། ཐུན་མོང་དཔལ་འབྱོར་གྱི་ཁེ་སྤོགས་ཀྱང་བགོ་བཞིན་ཡོད།ན་ནིང་ངེད་ཚང་ལ་ཐུན་མོང་དཔལ་འབྱོར་གྱི་ཁེ་སྤོགས་སྒོར837བགོ་རྒྱུ་ཡོད་པ་དང་།དེའི་ཁར་རྟ་ཁྲིད་ནས་བསྡོམས་པས་སྒོར་ཁྲི2ལྷག་རག་ཡོད།ད་ལྟ་ང་ཕྱིར་འགྲོ་མི་དགོས་པར་གྲོང་པ་ནང་ནས་སྒོར་མོ་ལོན་ཐུབ་པ་དང་།ངས་མ་འོངས་པའི་འཚོ་བ་དེ་བས་ཡག་པོ་ཡོང་ཐུབ་པར་ཡིད་ཆེས་ཀྱིས་ཁེངས་ཡོད་ཅེས་གསར་འགོད་པར་དེ་ལྟར་བཤད།

དཀར་མཛེས་ཁུལ་ཀྲུང་ཨའོ་ཡུལ་སྐོར་འཕེལ་རྒྱས་ཚད་ཡོད་སྤྱི་གཉེར་ཁང་གི་འབྲེལ་ཡོད་འགན་འཁུར་བས་ངོ་སྤྲོད་བྱས་པར་གཞིགས་ན།གསེག་རི་གླིང་གའི་ལྗོངས་ཁུལ་དེ་རྒྱལ་ཡོངས་ཀྱི་གྲོང་གསེབ་དར་རྒྱས་གཏོང་བའི་འཐབ་ཇུས་ལག་བསྟར་བྱེད་པའི་དཔེ་མཚོན་ཞིག་ཏུ་འགྱུར་བར་བྱ་ཆེད། རྟའུ་རྫོང་སྲིད་གཞུང་གི་འཛུབ་ཁྲིད་འོག་སྤྱི་གཉེར་ཁང་གིས་ཐོན་ཁུངས་མ་རྐང་འཇོག་པ་དང་།སྤ་སེའི་ཡོང་སྒོ་བགོ་བ།ཡུལ་མིའི་སྡོད་ཁང་བོགས་མར་གཏོང་བ།ལས་ཞུགས་རོགས་སྐྱོར་བྱས་པ།མི་སྣ་གསོ་སྦྱོང་བྱས་པ།ཁྱད་ལྡན་ཞིང་ཞོར་ཐོན་རྫས་ཕྱིར་ཚོང་སྟེགས་བུ་མཁོ་འདོན་སོགས་ཀྱི་བྱེད་ཐབས་བརྒྱུད་ནས་མཐའ་འཁོར་གྱི་ཡུལ་མི་ཚོ་ཡང་གསེག་རི་གླིང་གའི་ལྗོངས་ཁུལ་འཕེལ་རྒྱས་ཀྱི་འབྲས་བུར་མཉམ་སྤྱོད་ཐུབ་པ་བྱུང་ཡོད།

ད་ལོར་ཡུལ་སྐོར་བའི་རླངས་འཁོར་འཇོག་ས་རྒྱས་སྐྲུན་དང་སྔོ་འགྱུར་གྱི་ལས་དོན་སྤེལ་ནས་རླངས་འཁོར་འཇོག་ས་མང་དུ་བཏང་བ་དང་།ལྗོངས་ཁུལ་གྱི་སྤྱི་པའི་རླངས་འཁོར་འཇོག་སའི་ཐོན་ཁུངས་བེད་སྤྱོད་གང་ལེགས་བྱས་ཡོད། གཞན་ད་དུང་ལྗོངས་ཁུལ་གྱི་ཁོར་ཡུག་བཅོས་སྒྲིག་དང་ལེགས་སུ་གཏོང་བའི་བྱ་སྤྱོད་སྤེལ་ནས་ལྗོངས་ཁུལ་གྱི་གད་སྙིགས་རིགས་དབྱེ་བར་ཤུགས་བརྒྱབ་སྟེ་ཤེས་དཔལ་དང་།འཆམ་མཐུན།གཙང་མ།གྲལ་འགྲིག་བཅས་ཀྱི་ལྗོངས་ཁུལ་གྱི་ཁོར་ཡུག་གསར་པ་ཞིག་བསྐྲུན་རྒྱུ་ཡིན་ཞེས་ལྗོངས་ཁུལ་གྱི་འབྲེལ་ཡོད་འགན་འཁུར་བས་གསར་འགོད་པར་ངོ་སྤྲོད་བྱས། ལྗོངས་ཁུལ་གྱིས་ལས་མིར་གསོ་སྦྱོང་དང་དོ་དམ་བྱ་རྒྱུར་ཤུགས་བརྒྱབ་ནས་ལས་མིའི་ཞབས་ཞུའི་སྤུས་ཚད་དང་ཞབས་ཞུའི་ཆུ་ཚད་མཐོ་རུ་བཏང་སྟེ་ཡུལ་སྐོར་ཞབས་ཞུ་ལེགས་སུ་བཏང་བ་དང་ཡུལ་སྐོར་བའི་ཡུལ་སྐོར་ཉམས་ལེན་གྱི་ཚོར་སྣང་ཆེ་རུ་བཏང་ཡོད།

ཕྱིན་ཆད།ཏང་འཛུགས་སྐྱོང་དང་མགོ་ཁྲིད་མ་ལག་སྔར་བས་འཐུས་ཚང་དུ་བཏང་ནས་གནད་དོན་སྣ་ཚོགས་མཐུན་སྦྱོར་ཐག་གཅོད་དང་འབྲེལ་གཏུག་ལམ་སྲོལ་འཛུགས་པ།དེ་གའི་ཁྱད་ཆོས་དང་ཟུང་འབྲེལ་བྱས་པའི་རིག་གནས་གསར་གཏོད་ཐོན་རྫས་ཁག་གཅིག་བཟོས་ནས་མང་ཚོགས་ཀྱི་ཡོང་འབབ་འཕར་བའི་ཐབས་ལམ་སྔར་བས་རྒྱ་ཆེར་གཏང་རྒྱུ་དང་།ཆབས་གཅིག་ཏུ་གསེག་རི་གླིང་གའི་དྲྭ་ཐོག་གྲགས་ཅན་གྱི་ནུས་པ་འདོན་སྤེལ་བྱས་ཏེ་ཡུལ་སྐོར་བ་རིམ་བཞིན་དཔལ་སྨད་ཡུལ་གྱི་གྲོང་ཚོ་གཞན་དག་ཏུ་འདྲེན་རྒྱུ་དང་ལྗོངས་ཁུལ་གྱིས་མང་ཚོགས་ཀྱི་ཡོང་འབབ་འཕར་བའི་ཕན་འབྲས་ཆེ་རུ་གཏང་རྒྱུ་ཡིན་ཞེས་དཔལ་སྨད་གྲོང་རྡལ་གྲོང་འགོ་གྲོང་སྡེའི་ཧྲུའུ་ཅི་དང་པོ་ལྷ་མོས་དེ་ལྟར་བཤད།།