མདང་གི་རྨི་ལམ་འཁྲུགས་ནས་རྦབ་རྡོ་ཉིལ། །

འདས་སོང་དྲན་པའི་རི་མོ་རྨེག་མེད་གྱུར། །

ཡིད་ལ་བབས་པའི་སྙིང་སྡུག་ལྷ་མོ་དེ། །

རྒྱང་དུ་བཀྱེད་ནས་མི་ལོ་མང་ཙམ་འདས། །

སེམས་ཀྱི་ངོས་སུ་བརྐོས་པའི་ཡིག་འབྲུ་དེ། །

ལས་ཀྱི་རླུང་ཆེན་གཡུག་ཀྱང་གཡོ་བ་མེད། །

འདང་གསུམ་རྨི་ལམ་འཁྲུགས་པའི་སྐྱོ་སྣང་ལ། །

ཁྱོད་ཉིད་བདག་ལ་དབང་བའི་གོ་སྐབས་ཕྲ། །

སེམས་ཀྱི་སྨུག་པ་འདི་ནས་དྭངས་ཐབས་བྲལ། །

འོད་ཀྱི་ཉག་མ་རེ་ཟུང་ཐོབ་ན་འདོད། །

རྨི་ལམ་འཁྲུགས་པའི་ལོ་ཟླ་ནག་པོ་དེ། །

སྙིང་ལ་ཟུག་པའི་ཚེར་མ་ནག་པོ་ཞིག །

མི་ཚོགས་འདུས་པའི་ལམ་གྱི་གཞི་མདོ་རུ། །

ཁྱོད་ཉིད་དྲན་པའི་སྨྲེང་བ་རླུང་ལ་སྐུར། །

ཟས་བརྗེད་གཉིད་བཅག་བྱས་པའི་དུས་ཚིགས་དེ། །

བདག་གི་མི་ཚེའི་སྐྱོ་གདུང་ཆེ་ཤོས་སོ། །

ལམ་ལོག་ལམ་གོལ་འཁྱམ་པའི་མི་བུ་ངས། །

ཡིད་ཀྱི་དྭངས་མ་རྒྱང་རིང་རི་རྩེར་བསྙེགས། །

གཡོ་མེད་དུས་ཀྱི་བར་ཐག་ཕྱེས་པ་ཡིས། །

ཡོད་ཚད་སྟོང་པ་ཡིན་པའི་ལོ་ཟླ་འདི། །

མཚན་མོ་འདི་ཡི་འཁྲུལ་སྣང་མཐའ་མེད་པས། །

རོལ་དབྱངས་ནད་པ་ཞིག་ཡིད་ལ་འཁྲེངས་ནས། །

ཡིད་ཀྱི་མེ་ཏོག་དཀར་པོ་མཚོན་བྱེད་དུ། །

ཚིག་དང་ཐ་སྙད་ལམ་ནས་ཁྱེད་ཉིད་བསྐྲུན། །

༼ རི་སྤྱང་། ༽