ནག་ཚོགས་ངན་སྤྱོད་ཀྱི་ངོ་བོ་ལྡན་པའི་ཁྲིམས་འགལ་ཉེས་གསོག་གི་བྱ་འགུལ་རིགས་བཅུ་འདི་མཐོང་འཕྲལ། མྱུར་དུ་ཐེར་འདོན་གནང་རོགས།

༡ གྲོང་གསེབ་ཏུ་གཞི་རིམ་སྲིད་དབང་ཚོད་འཛིན་ངན་བཀོད་བྱེད་པ་དང་གྲོང་གསེབ་ཐུན་མོང་གི་རྒྱུ་ནོར་ལྐོག་ཟ་བཅས་བྱེད་མཁན་གྱི“གྲོང་དཔོན་ངན་རུལ”དང་ལྐོག་ཇུས་ཅན་དང་། ཡུལ་ཤོག་དང་གྲོང་སྡེར་བཙན་ཚོད་མེད་པའམ་ཡང་ན་ཁྱིམ་རྒྱུད་དང་། རུས་རྒྱུད། ཉེ་རྒྱུད་བཅས་ཀྱི་སྟོབས་ཤུགས་ལ་བརྟེན་ནས་ཡུལ་ཕྱོགས་གཅིག་ཏུ་རང་སྣང་གང་ཤར་གྱིས་བཙན་པོ་དབང་ཡོད་བྱེད་མཁན་གྱི“ཡུལ་གྱི་གཤེད་མ”། ལྐོག་རྔན་དང་གཏུམ་སྤྱོད། མགོ་སྐོར། འཇིགས་སྐུལ་སོགས་ཀྱི་ལག་ཐབས་ལ་བརྟེན་ནས་གྲོང་གསེབ་གཞི་རིམ་གྱི་སྐབས་བརྗེ་འདེམས་བསྐོར་འགལ་རྐྱེན་གཏོར་བཤིག་བཟོ་བའི་ནག་ཚོགས་ངན་སྤྱོད་སྟོབས་ཤུགས། ཁག་དཀྲི་མིང་འདོགས་སྣ་ཚོགས་བྱས་ནས་ས་ཆ་གཞུང་སྤྱོད་བོགས་གཏོང་གི་བརྒྱུད་རིམ་ནང་དུ་མང་ཚོགས་ངན་སྐུལ་བྱས་ཏེ་དོན་རྐྱེན་སློང་བ་དང་འདུ་འཛོམས་རང་བཞིན་གྱི་གོང་བཅར་སྒྲིག་འཛུགས་ཇུས་བཀོད་བྱེད་པའི་ནག་ཚོགས་ངན་སྤྱོད་སྟོབས་ཤུགས་བཅས།

༢ ཞིང་འབྲོག་ཐོན་རྫས་སོགས་ཀྱི་ཚོང་ལས་ཁྲོམ་ར་སྣ་ཚོགས་བཙན་བཟུང་བྱས་ཤིང་། ཧམ་འདོད་ངོམས་མེད་དང་། བཙན་ཉོ་བཙན་འཚོང་། གཡོ་སྦྱོར་བསྙད་འཕྲོག། དཔུང་སྡེབ་ཟིང་སློངས་བཅས་བྱས་ཏེ། མང་ཚོགས་ཀྱི་ཁེ་ཕན་ལ་གནོད་པའི“ཚལ་བཙན”དང་། “ལས་བཙན” “ཁྲོམ་བཙན”སོགས་རིགས་འདྲ་མིན་གྱི་ནག་ཚོགས་ངན་སྤྱོད་སྟོབས་ཤུགས།

༣ ཨར་ལས་འཛུགས་སྐྲུན་དང་། འགྲིམ་འགྲུལ་དབོར་འདྲེན། ཉར་སྲུང་སྐྱེལ་ལེན་སོགས་ཀྱི་ཁྱབ་ཁོངས་སུ་ལས་གྲྭ་བཙན་ལེན་དང་། བུ་ལོན་བཙན་འགེལ། བསམ་ངན་འགྲན་རྩོད། ཉོ་ཚོང་བཙན་ཤེད། གཉེར་སྐྱོང་ཚུལ་མིན་གྱིས་སྒེར་སྡོམ་བྱེད་པ། སྐྱབས་གླ་བསྡུ་བ། དཔལ་འབྱོར་གྱི་སྒྲིག་ལམ་གཏོར་བཤིག་གཏོང་བའི་ནག་ཚོགས་ངན་སྤྱོད་སྟོབས་ཤུགས།

༤ མང་ཚོགས་ཀྱིས་ལབ་གླེང་མང་བའི་སྐྱེད་ཆེའི་བུ་ལོན་ཚུལ་མིན་བསྡུ་ལེན་བྱས་རིགས་དང་འབྲེལ་བའི་བུན་འདེད་དང་། དེ་བཞིན་རྐང་བཙུགས་ནས་རྨས་སྐྱོན་བཟོ་བ་དང་། ཚུལ་མིན་བཀག་འཇུག། འཇིགས་སྐུལ་སོགས་ཀྱི་ལག་ཐབས་ལ་བརྟེན་ནས་གཏུམ་སྤྱོད་བུན་འདེད། ཡང་ན་དཔལ་འབྱོར་རྩོད་གླེང་གི“བུན་འདེད་སྤྱི་གཉེར་ཁང” དང་། “གསང་བའི་ཉེན་རྟོག་པ” “ལས་རིགས་སྨན་ཟིང་སློང་མཁན”སོགས་དང་ངན་འབྲེལ་བྱས་པའི་ངན་སྤྱོད་སྟོབས་ཤུགས།

༥ གྲོང་གསེབ་དང་གྲོང་ཁྱེར་ཉེ་འདབས། ཡུལ་མིའི་སྡེ་ཁུལ། རོལ་རྩེད་ཁང་བཅས་སུ་སྒྲིག་འཛུགས་ཡོད་པའི་སྒོ་ནས“འཆལ་རྒྱན་དུག་མདའ”བཞི་ཡི་ཁྲིམས་འགལ་ཉེས་གསོག་བྱ་འགུལ་སྤེལ་ཅིང་། སྤྱི་ཚོགས་སྤྱོད་ཚུལ་དང་སྤྱི་ཚོགས་བདེ་འཇགས་ལ་གནོད་སྐྱོན་ཤིན་ཏུ་ཚབས་ཆེན་བཟོས་པའི་ནག་ཚོགས་ངན་སྤྱོད་སྟོབས་ཤུགས།

༦ གཏེར་ཁའི་ཐོན་ཁུངས་མི་སྒེར་གྱིས་འདོན་པའམ་གང་འདོད་བཞིན་འདོན་པ་དང་ཉ་གྲུ་སྒྲིག་འཛུགས་བྱས་ནས་རྒྱལ་མཚམས་སྒྲོལ་བའི་ཉ་འཛིན་བཅས་ཁྲིམས་འགལ་བྱ་སྤྱོད་སྤེལ་བ། དེ་བཞིན་གྲམ་ངོགས་ཀྱི་གསོ་ཚགས་ནང་དུ་ས་མཚམས་བགོ་བ་དང་གྲུ་ཁའི“པགས་བཤུས”སོགས་ཀྱི་བྱ་སྤྱོད་ལས་ཐོན་པའི་གཏེར་བཙན་དང་གྲུ་བཙན། ཆུ་བཙན་སོགས་མ་རབས་ཁྲམ་པའི་ངན་སྤྱོད་སྟོབས་ཤུགས།

༧ ནག་ཚོགས་ངན་སྤྱོད་སྟོབས་ཤུགས་ཀྱིས་སྟངས་འཛིན་བྱེད་བཞིན་པའི་ཡུལ་སྐོར་སྣེ་ཤན་རྫུན་མ་དང་། དེས་སློང་པའི་བཙན་ཉོ་བཙན་འཚོང་དང་། བསྙད་རྐོ་ཟིང་སློང་། གཡོ་སྦྱོར་བསྙད་འཕྲོག་སོགས་ཀྱི་ཁྲིམས་འགལ་ཉེས་གསོག་གི་བྱ་འགུལ།

༨ གླ་ཕོགས་འབོར་ཆེའི་བསླུ་བྲིད་ཀྱིས་གྲུ་པ་གླས་ཏེ་མགོ་སྐོར་དང་། གཡོ་སྦྱོར་བསྙད་འཕྲོག། བཙན་ཤེད་ངལ་རྩོལ་བཅས་ཁྲིམས་འགལ་ཉེས་གསོག་གི་བྱ་འགུལ་སྤེལ་བ།

༩ ངན་པ་ཁྱུ་སྒྲིག་དང་། བསྙད་རྐོ་ཟིང་སློང་། རྒྱག་འཛིང་རྩོད་འཐབ། ཧམ་འཕྲོག་བཙན་འཁྱེར། དབང་ཡོད་བཙན་བདག་སོགས་ཡུལ་ལུང་གཅིག་གི་སྒྲིག་ལམ་ལ་གནོད་ཅིང་ནག་ཚོགས་ཀྱི་ངོ་བོ་ལྡན་པའི་ཤོག་ཁའི་སྟོབས་ཤུགས།

༡༠ ནག་ཚོགས་ངན་སྤྱོད་དང་འབྲེལ་བའི་ཁྲིམས་འགལ་ཉེས་གསོག་གི་ཁུངས་སྣེ་གཞན་དག་བཅས་སོ།།

（ ལྷ་མོའི་ཁྲིམས་བཤད་ནས་དྲངས།）