བྱ་དངོས་ཐམས་ཅད་ལ་སྐྱེ་སྟོབས་ཀྱི་དཔལ་འབར་བའི་དུས་ཚིགས་འདིར། འདབ་པ་རྫོང་བཅིངས་འགྲོལ་གྲོང་རྡལ་ཕན་རོགས་གྲོང་ཚོ་རུ་འདེགས་འཁོར་དང་གཅོད་འབྲེག་འཕྲུལ་ཆས། ཨར་ལས་བྱེད་མཁན་བཅས་བྲེལ་འཚུབ་ཆེན་པོས་མཚོ་བོད་མཐོ་སྒང་ཕན་རོགས་གནའ་ཤུལ་གྱི་ཡུལ་སྐོར་རྨང་གཞིའི་སྒྲིག་བཀོད་འཛུགས་སྐྲུན་ལས་གཞིར་སྐུལ་འདེད་གཏོང་བཞིན་ཡོད།

2020ལོའི་ཟླ་བ5པར། ངོ་མཚར་ཆེ་བའི་ཕན་རོགས་གནའ་ཤུལ་དེ2021ལོའི་ཀྲུང་གོའི་གནའ་རྫས་རྟོག་ཞིབ་གསར་རྙེད་ཆེན་པོ་དྲུག་གི་ནང་དུ་ཚུད་ནས། ལོ་ངོ་ཁྲི13གོང་རོལ་དུ་མིའི་རིགས་ཀྱིས་མཚོ་བོད་མཐོ་སྒང་དབང་དུ་བསྒྱུར་བ་ར་སྤྲོད་བྱས། ཕན་རོགས་གནའ་ཤུལ་ནི་མཚོ་བོད་མཐོ་སྒང་གི་རྡོ་ཆས་རྙིང་པའི་རྗེས་ཤུལ་གལ་ཆེན་ཞིག་ཡིན་པས་ས་ཁུལ་དེའི་སྔ་དུས་ཀྱི་མིའི་རིགས་ཀྱི་རིམ་འགྱུར་རྣམ་པ་རགས་རིམ་ལས་ལོ་རྒྱུས་རིག་གནས་ཀྱི་ནང་དོན་དང་ཚན་ཞིབ་རིག་གཞུང་གི་རིན་ཐང་ཆེན་པོ་ལྡན།

ལོ་རྒྱུས་ཀྱི་དཔང་པོ་འདི་ཇི་ལྟར་སྲུང་སྐྱོང་དང་བེད་སྤྱོད་ཡག་པོ་བྱེད་པའི་ཐད་ལ། འདབ་པ་རྫོང་གིས2023ལོའི་ལོ་སྟོད་ནས་བཟུང་ཤུགས་ཡོད་རྒུས་མཚོ་བོད་མཐོ་སྒང་ཕན་རོགས་གནའ་ཤུལ་གྱི་ཡུལ་སྐོར་རྨང་གཞིའི་སྒྲིག་བཀོད་འཛུགས་སྐྲུན་ལས་གཞི་སྟེ་མཚོ་བོད་མཐོ་སྒང་ཕན་རོགས་གནའ་རྫས་རྟོག་ཞིབ་ཞིབ་འཇུག་ལྟེ་གནས་ལག་བསྟར་འཆར་འགོད་བྱས་པར་མ་ཟད་ན་ནིང་གི་སྤྱི་ཟླ10པའི་ཚེས15ཉིན་དངོས་སུ་སྐྲུན་འགོ་བཙུགས་པ་རེད།། （རྟ་མགྲིན་རྡོ་རྗེས་བསྒྱུར།)