ཞིན་ཧྭ་གསར་འགྱུར་ཁང་གི་གློག་འཕྲིན་ལྟར། འཇར་པན་གྱི་རྒྱལ་ཚོགས་གྲོས་ཞུགས་ཁང་གི་འདེམ་བསྐོ་སྐབས་ཉེར་གསུམ་པའི་མཇུག་མཐའི་འདེམ་ཤོག་གི་མཇུག་འབྲས་དེ་སྤྱི་ཟླ7པའི་ཚེས22ཉིན་གྱི་ཞོགས་པར་དངོས་སུ་ཤེས་པ་དང་། འཇར་པན་གྱི་མཉམ་དུ་སྲིད་འཛིན་བཞིན་པའི་རང་དབང་དམངས་གཙོ་ཏང་དང་གུང་མེན་ཏང་གཉིས་ལ་རྒྱལ་ཚོགས་གྲོས་ཞུགས་ཁང་གི་འདེམ་བསྐོའི་ཁྲོད་རྒྱལ་ཁ་ཐོབ་སྟེ། ཏང་ཁག་གཉིས་ཀྱིས་གྲོས་ཞུགས་ཁང་གི་གོ་གནས་ཕྱེད་ཀའི་ཡན་བཟུང་ནས། སྲིད་བཟུང་མེད་པའི་ཏག་ཁག་གིས་དམངས་གྲོས་ཁང་དང་གྲོས་ཞུགས་ཁང་ལ་དབང་སྒྱུར་བའི་རྒྱལ་ཚོགས་ཀྱི་སྣང་ཚུལ་དེ་རྩ་བ་ནས་བསྒྱུར།

  མཇུག་མཐའི་འདེམ་ཤོག་གི་མཇུག་འབྲས་ལྟར་ན། རང་དབང་དམངས་གཙོ་ཏང་ལ་གོ་གནས65དང་གུང་མེན་ཏང་ལ་གོ་གནས11ཐོབ་པ་དང་། དེའི་ཁར་བཅོས་སྒྱུར་མ་བྱས་པའི་གོ་གནས59བསྣན་ན། ཏང་གཉིས་ཀྱི་གོ་གནས་བསྡོམས་པས135བར་བུད་དེ། གྲོས་ཞུགས་ཁང་གི་སྤྱིའི་གོ་གནས་ཀྱི་ཕྱེད་ཀ་སྟེ121ལས་བརྒལ་ནས། ལོ་ངོ6རིང་གི་རྒྱལ་ཚོགས་ཀྱི་རྒྱུན་ལྡན་མིན་པའི་སྣང་ཚུལ་དེ་བསྒྱུར། སྲིད་བཟུང་མེད་པའི་ཏང་ཁག་ཆེས་ཆེན་པོ་དམངས་གཙོ་ཏང་གིས་འདེམ་བསྐོའི་ཁྲོད་ཕམ་ཁ་ཆེན་པོ་མྱངས་ཏེ་གོ་གནས17མ་གཏོགས་མ་ཐོབ། གོ་གནས་སྤྱིའི་གྲངས་ཀ་དེ་ཡང་འདེམ་བསྐོའི་སྔོན་གྱི86ནས་ད་ལྟ59མར་ལྷུང་།

  ད་ལྟ། རང་དབང་དམངས་གཙོ་ཏང་གཅིག་པུས་དམངས་གྲོས་ཁང་གི་གོ་གནས་ཕྱེད་ཀའི་ཡན་ཟིན་ཡོད་པ་དང་། གུང་མེན་ཏང་གི་གོ་གནས་བསྣན་ན། དམངས་གྲོས་ཁང་གི་གོ་གནས་སུམ་ཆའི་གཉིས་ཡན་བཟུང་ཡོད། སྲིད་འཛིན་མནའ་འབྲེལ་གྱིས་དམངས་གྲོས་ཁང་དང་གྲོས་ཞུགས་ཁང་ལ་དབང་སྒྱུར་བའི་གནས་ཚུལ་འོག སྲིད་འཛིན་ཏང་དང་ཨན་པེ་སྲིད་གཞུང་གིས་རྗེས་ཕྱོགས་རྒྱལ་ཚོགས་ལ་སྤྲད་པའི་ཁྲིམས་གཞི་ལ་ཅུང་བདེ་བླག་ངང་གྲོས་འཆམ་འབྱུང་ཐུབ།