འཛམ་གླིང་དངུལ་ཁང་གིས་ཟླ་བདུན་པའི་ཚེས་སུམ་ཅུ་ཉིན་བཤད་རྒྱུར། མིག་སྔའི་ཐོན་ཚད་སྔོན་དཔག་ལྟར་ན། འཛམ་གླིང་ཡོངས་ཀྱི་འབྲུ་རིགས་གཙོ་བོའི་མཁོ་འདོན་ཐད་མི་འདང་བའི་གནད་དོན་འབྱུང་མི་སྲིད་ཀྱང་། གསོག་ཉར་བྱས་ཚད་ཅུང་ཉུང་བ་དང་མ་འོངས་པའི་ཐོན་ཚད་ལ་ནམ་ཟླའི་ཤུགས་རྐྱེན་ཐེབས་སྲིད་པའི་དབང་གིས་རྒྱལ་སྤྱིའི་འབྲུ་རིགས་རིན་གོང་ལ་འཕེལ་འགྲིབ་ཆེན་པོ་འབྱུང་སྲིད་པས། འཛམ་གླིང་དངུལ་ཁང་གིས་དོན་དེ་ཐག་གཅོད་བྱེད་པར་གྲ་སྒྲིག་བྱེད་དགོས་ཟེར།

འཛམ་གླིང་དངུལ་ཁང་གིས་ཉིན་དེར་གསལ་སྒྲོག་ཅིག་ལས་བཤད་རྒྱུར། ཨ་མེ་རི་ཁའི་ཐན་སྐྱོན་དང་། ཡོ་རོབ་གླིང་གི་རྒྱལ་ཁབ་རེ་འགར་ཆར་བ་མང་དུ་འབབ་པ། ཨུ་རུ་སི་དང་རྒྱ་གར་སོགས་འབྲུ་རིགས་ཐོན་སྐྱེད་རྒྱལ་ཁབ་ཏུ་ཆར་ཆུ་ཉུང་བ་སོགས་ཀྱི་རྒྱུ་རྐྱེན་དབང་གིས་རྒྱལ་སྤྱིའི་འབྲུ་རིགས་ཀྱི་རིན་གོང་ཇེ་མཐོར་སོང་། འབྲུ་རིགས་ཀྱི་རིན་གོང་འཕེལ་འགྲིབ་བྱུང་བ་ལས་འབྲུ་རིགས་བདེ་འཇགས་ལ་འཇིགས་ཉེན་ཐེབས་པ་དང་། ཞིང་ལས་ཐད་ཀྱི་དངུལ་གཏོང་བརྩོན་སེམས་ལའང་གནོད་པ་ཐེབས་ངེས་རེད་ཟེར།