རྒྱལ་སྲིད་སྤྱི་ཁྱབ་ཁང་གི་ཙུང་ལི་ཝུན་ཅ་པའོ་ཡིས་ས་དེའི་ཚེས་ཉེར་དྲུག་ཉིན་གྱི་སྔ་དྲོར་ཧྭ་ཧྲ་ནས་སོ་སོར་ཀྲུང་གོ་དང་ཡོ་རོབ་དབུས་ཤར་རྒྱལ་ཁབ་ཀྱི་མགོ་ཁྲིད་པའི་ཐུག་འཕྲད་ལ་ཞུགས་པའི་ལ་ཐོ་ཝེ་ཡའི་ཙུང་ལི་ཐོ་མོ་པུའུ་ལོ་ཧྥུའུ་སི་ཅི་སི་དང་སེར་ཝེ་ཡའི་ཙུང་ལི་ཚི་ཝེ་ཐི་ཁི་ཝེ་ཆི།སི་ལོ་ཝུན་ཉི་ཡ་ཡི་ཙུང་ལི་དབྱང་ཧྲ།པོ་ཧེ་པུའུ་ཀྲང་གྲོས་ཚོགས་ཀྱི་ཀྲུའུ་ཞི་པེ་ཝན་ཏ་སོགས་ཡོ་རོབ་དབུས་ཤར་རྒྱལ་ཁབ་ཀྱི་མགོ་ཁྲིད་པར་མཇལ་འཕྲད་གནང་།

ལ་ཐོ་ཝེ་ཡའི་ཙུང་ལི་ཐོ་མོ་པུའུ་ལོ་ཧྥུའུ་སི་ཅི་སི་ལ་མཇལ་འཕྲད་གནང་སྐབས་སུ་ཝུན་ཅ་པའོ་ཡིས་བསྟན་དོན།ཀྲུང་གོ་སྲིད་གཞུང་གིས་རྒྱལ་ཁབ་རང་གི་ཁེ་ལས་ལ་ཐོ་ཝེ་ཡར་སོང་ནས་མ་དངུལ་གཏོང་བར་སྐུལ་མ་བྱེད་བཞིན་ཡོད་ལ།ལ་ཐོ་ཝེ་ཡ་ཕྱོགས་ནས་རྒྱབ་སྐྱོར་དང་སྟབས་བདེ་བྱེད་པར་རེ་བ་བཅངས་ཡོད།ཀྲུང་གོའི་ཕྱོགས་ནས་ལ་ཐོ་ཝེ་ཡ་ཕྱོགས་བར་འགྲིམ་འགྲུལ་དང་དངོས་ཟོག་མཉམ་ལས་བྱས་ནས་ཡོ་རོབ་གླིང་དང་ཨེ་ཤ་ཡའི་འགྲིམ་འགྲུལ་སྟབས་བདེ་ཅན་དུ་གཏོང་བར་སྐུལ་འདེད་བྱེད་པར་མཐོང་ཆེན་བྱེད་བཞིན་ཡོད་ཟེར།ཐོ་མོ་པུའུ་ལོ་ཧྥུའུ་སི་ཅི་སི་ཡིས་བསྟན་དོན།ཀྲུང་གོ་ལ་ཐོ་ཝེ་ཡའི་འབྱོར་འཚོང་འབྲེལ་བ་ད་དུང་རྒྱ་ཇེ་ཆེར་བཏང་ཆོག་པས།རྒྱལ་ཁབ་རང་གི་དགེ་མཚན་ལ་བརྟེན་ནས་ཀྲུང་གོའི་བར་གྱི་འབྱོར་འཚོང་འགྲོ་འོང་དམ་ཟབ་ཏུ་གཏོང་རྒྱུ་ཡིན་ལ།ཀྲུང་གོའི་ཕྱོགས་ཀྱིས་ལ་ཐོ་ཝེ་ཡར་མ་དངུལ་གཏོང་ཚད་རྒྱ་བསྐྱེད་པར་དགའ་བསུ་བྱེད་རྒྱུ་ཡིན་ཟེར།

སེར་ཝེ་ཡ་ཡི་ཙུང་ལི་ཚི་ཝེ་ཐི་ཁི་ཝེ་ཆི་ལ་མཇལ་འཕྲད་གནང་སྐབས། ཝུན་ཅ་པའོ་ཡིས་བསྟན་དོན། ཀྲུང་གོ་དང་སེར་ཝེ་ཡའི་བར་རྨང་གཞིའི་སྒྲིག་ཆས་འཛུགས་སྐྲུན་ཁྱབ་ཁོངས་སུ་མཉམ་ལས་བྱེད་ས་མང་པོ་ཡོད།ཕྱོགས་གཉིས་ཀྱིས་པེ་ཨེར་ཀི་ལའེ་ཏི་ཡི་ཏོ་ཎོ་གཙང་བོ་བརྒལ་བའི་ཟམ་ཆེན་བདེ་བླག་ངང་ལེགས་འགྲུབ་འབྱུང་བར་ཁག་ཐེག་བྱས་ནས་ཀྲུང་གོ་དང་ཡོ་རོབ་དབུས་ཤར་རྒྱལ་ཁབ་ཀྱི་མཉམ་ལས་ལ་མིག་དཔེ་འཇོག་དགོས།ཀྲུང་གོའི་ཕྱོགས་ནས་སེར་ཝེ་ཡའི་དཔལ་འབྱོར་ལག་རྩལ་གླིང་ཁུལ་འཆར་འགོད་དང་།སེར་ཝེ་ཡ་ཡི་ཐོན་ལས་ཀྱི་འགྲན་རྩོད་ནུས་ཤུགས་ཇེ་མཐོར་གཏོང་བ།ཕྱིར་གཏོང་གི་ཚད་ཇེ་མཐོར་གཏོང་བར་རོགས་རམ་བྱེད་འདོད་ཡོད་ཟེར།

ཚི་ཝེ་ཐི་ཁི་ཝེ་ཆི་ཙུང་ལི་ཝུན་ཅ་པའོ་ཡི་བསམ་འཆར་ལ་ཡོངས་སུ་འཐད་པ་བྱུང་བ་དང་། སེར་ཝེ་ཡ་དང་ཀྲུང་གོ་ཕྱོགས་གཉིས་ཀྱི་འབྲེལ་བ་ལེགས་པོས་དཔལ་འབྱོར་ཁྱབ་ཁོངས་ཀྱི་མཉམ་ལས་གྲུབ་འབྲས་བླངས་ཡོད་པ་དང་།ཕྱོགས་གཉིས་ཀའི་མཉམ་ལས་ལ་འཕེལ་རྒྱས་ཆེན་པོ་འབྱུང་བར་རེ་བ་བཅངས་ཡོད་ཟེར།སི་ལོ་ཝུན་ཉི་ཡ་ཡི་ཙུང་ལི་དབྱང་ཧྲ་ལ་མཇལ་འཕྲད་གནང་སྐབས།ཝུན་ཅ་པའོ་ཡིས་བསྟན་དོན།སི་ལོ་ཝུན་ཉི་ཡ་ལ་ཆེས་ལེགས་པའི་བཟོ་ལས་ཚན་རྩལ་གྱི་རྨང་གཞི་ཡོད་པ་དང་།ཀྲུང་གོའི་ཕྱོགས་ཀྱིས་སི་ལོ་ཝུན་ཉི་ཡ་ཕྱོགས་ཀྱིས་ཀྲུང་གོའི་ཁྲོམ་ར་གསར་སྤེལ་བྱེད་པར་དགའ་བསུ་བྱེད་པ་ཡིན། ཀྲུང་གོའི་ཁེ་ལས་སི་ལོ་ཝུན་ཉི་ཡ་རུ་སོང་ནས་འཕེལ་རྒྱས་བརྩོན་པར་སྐུལ་འདེད་བྱེད་པ་དང་སི་ལོ་ཝུན་ཉི་ཡ་ཕྱོགས་དང་མཉམ་དུ་ཡོ་རོབ་དབུས་ཤར་གྱི་རྨང་གཞིའི་སྒྲིག་ཆས་འཛུགས་བསྐྲུན་ལ་ཞུགས་ནས་ས་གནས་ཁྲོམ་ར་གསར་སྤེལ་བྱེད་འདོད་ཡོད་ཟེར།

དབྱང་ཧྲ་ཡིས་བསྟན་དོན།ཀྲུང་གོ་ནི་སི་ལོ་ཝུན་ཉི་ཡའི་མཉམ་ལས་གྲོགས་པོ་གལ་ཆེན་ཡིན་པ་དང་། ཀྲུང་གོ་ཕྱོགས་དང་མཉམ་དུ་ཧུར་བརྩོན་བྱས་ནས་ཕྱོགས་གཉིས་ཀྱི་འབྱོར་འཚོང་རྒྱུན་མཐུད་དོ་མཉམ་སྒོས་འཕེལ་བ་མངོན་འགྱུར་བྱེད་པར་མ་ཟད།རྨང་གཞིའི་སྒྲིག་ཆས་འཛུགས་བསྐྲུན་དང་ཚན་རྩལ་ཁྱབ་ཁོངས་ནས་བརྗེ་རེས་དང་མཉམ་ལས་བྱེད་པར་ཤུགས་སྣོན་འདོད་ཡོད་ཟེར།པོ་ཧེ་ཡི་པུའུ་ཀྲང་གྲོས་ཚོགས་ཀྱི་ཀྲུའུ་ཞི་པར་ཝན་ཏ་ལ་མཇལ་འཕྲད་གནང་སྐབས།ཝུན་ཅ་པའོ་ཡིས་བསྟན་དོན།ཀྲུང་གོ་དང་པོ་ཧེ་བར་ལ་སྲོལ་རྒྱུན་གྱི་མཛའ་བརྩེ་ཟབ་མོ་ཡོད།ཀྲུང་གོའི་ཕྱོགས་ནས་མུ་མཐུད་དུ་པོ་ཧེ་ཡིས་དཔལ་འབྱོར་འཕེལ་རྒྱས་དང་དམངས་འཚོ་ཇེ་ལེགས་སུ་གཏོང་བར་རྒྱབ་སྐྱོར་བྱེད་རྒྱུ་ཡིན།ཕྱོགས་གཉིས་ཀྱིས་སྔར་ལས་ལྷག་པའི་སྒོ་ནས་རྒྱལ་ཁབ་གཉིས་བར་གྱི་འབྱོར་འཚོང་མཉམ་ལས་ཨུ་ཡོན་ལྷན་ཁང་དང་འབྱོར་འཚོང་གླེང་སྟེགས་གྱི་ནུས་པ་འདོན་སྤེལ་བྱེད་དགོས་པ་དང་།ཁེ་ལས་དང་མི་སྣ།ཆ་འཕྲིན་སོགས་ཀྱི་བརྗེ་རེས་ལ་ཤུགས་བསྣན་ནས་འབྱོར་འཚོང་དངུལ་གཏོང་མཉམ་ལས་ཀྱི་སྣེ་ཁྲིད་པ་དང་།ས་ཁུལ་འགྲིམ་འགྲུལ་དྲ་རྒྱ་འཛུགས་སྐྲུན།གནས་སྐོར་དང་རིག་གནས་ཁྱབ་ཁོངས་ཀྱི་བརྗེ་རེས་དར་སྤེལ་གཏོང་དགོས་ཟེར།

པེ་ཝན་ཏ་ཡིས་བསྟན་དོན། ཀྲུང་གོས་པོ་ཧེ་ལ་རྒྱབ་སྐྱོར་དང་རོགས་རམ་བྱས་པར་བཀའ་དྲིན་ཆེ། ཀྲུང་གོ་པོ་ཧེ་ཡི་འབྱོར་འཚོང་མཉམ་ལས་རྒྱ་བསྐྱེད་པ་དང་པོ་ཧེ་ཡི་རྨང་གཞིའི་སྒྲིག་ཆས་འཛུགས་སྐྲུན་དང་ནུས་ཁུངས་འཛུགས་སྐྲུན་ལ་ཞུགས་པར་དགའ་བསུ་བྱེད་བཞིན་ཡོད་ཟེར།