ཕཱ་ལེ་སི་ཐན་མི་རིགས་དབང་ཤུགས་ལས་ཁུངས་ཀྱི་ཀྲུའུ་ཞི་ཨ་པཱ་སིའི་མཐོ་རིམ་ཆབ་སྲིད་བློན་འདོན་པ་ཨེ་ལོས་ཁཱ་ཐི་ཡིས་ཚེས་སུམ་ཅུ་ཉིན་ཁཱ་ཐར་རྒྱལ་ཁབ་ཀྱི་རྒྱལ་ས་ཏའོ་ཧཱ་ནས་ཕཱ་ལེ་སི་ཐན་མི་རིགས་དབང་ཤུགས་ལས་ཁུངས་གཏོར་རྒྱུའི་འཆལ་གཏམ་དེ་ལ་རྒོལ་གཏམ་དྲག་པོ་བཏང་། ཁོས་བཤད་རྒྱུར། ཕཱ་ལེ་སི་ཐན་མི་རིགས་དབང་ཤུགས་ལས་ཁུངས་གཏོར་རྒྱུའི་འཆལ་གཏམ་དེར་བདེན་པའི་རྩ་བ་ཅི་ཡང་མེད་ཟེར།ཨེ་ལོས་ཁཱ་ཐི་ཡིས་ཉིན་དེའི་དགོང་མོར་ཨ་རབ་ཞི་བདེ་འདོད་བློ་ཨུ་ཡོན་ལྷན་ཁང་གི་པུའུ་ཀྲང་རིམ་པའི་གྲོས་ཚོགས་གྲོལ་རྗེས་གསར་འགྱུར་ལས་རིགས་ལ་བཤད་རྒྱུར། ཕཱ་ལེ་སི་ཐན་མི་རིགས་དབང་ཤུགས་ལས་ཁུངས་ནི་ཕཱ་ལེ་སི་ཐན་མི་དམངས་ཀྱིས་དུས་ཡུན་རིང་བོར་འཐབ་རྩོད་བྱས་པའི་མཇུག་འབྲས་ཡིན་ཞིང་། སྔར་བཞིན་དུ་རང་ཉིད་ཀྱི་འགན་འཁྲི་ལག་བསྟར་བྱས་ཤིང་མི་དམངས་ཀྱི་སྣེ་ཁྲིད་དེ་བཙན་བཟུང་ནས་རང་བཙན་མངོན་འགྱུར་བྱེད་རྒྱུ་ཡིན་ཟེར།ཨེ་ལོས་ཁཱ་ཐི་ཡིས་དུས་རྒྱུན་ཕཱ་ལེ་སི་ཐན་མི་རིགས་དབང་ཤུགས་ལས་ཁུངས་ཀྱི་དབུ་བཞུགས་འཐུས་མིའི་འགན་ཁུར་ཡོད། ཁོས་བཤད་རྒྱུར། ཨ་པཱ་སི་ཡིས་དབྱི་སི་ལན་གྱི་དམར་མཆོད་དུས་ཆེན་གྱི་རྗེས་སུ་ཁའེ་ལོ་ནས་ཧཱ་མཱ་སིའི་ཆབ་སྲིད་མགོ་ཁྲིད་པ་མཱ་ཧྲ་ལེ་དང་གྲོས་མོལ་བྱེད་རྒྱུ་ཡིན་པ་དང་། སྐབས་དེར་ཕཱ་ལེ་སི་ཐན་གྱི་ཆབ་སྲིད་གནད་དོན་དང་ཕཱ་ལེ་སི་ཐན་མི་དམངས་ཀྱི་འགྲིག་མཐུན་སོགས་གནད་དོན་རབ་དང་རིམ་པར་གྲོས་བསྡུར་བྱེད་རྒྱུ་ཡིན་པ་དང་། ཕྱོགས་གཉིས་ཀྱིས་མིག་སྔར་ཐེངས་འདིའི་གྲོས་ཚོགས་ལ་གྲ་སྒྲིག་བྱེད་བཞིན་ཡོད་ཟེར།