རྒྱལ་སྤྱིའི་རྡུལ་ཕྲན་ནུས་པའི་ལས་ཁུངས་ཀྱི་ལས་འཛིན་ལྷན་ཚོགས་ཀྱི་གྲོས་ཚོགས་ཚེས་བཅུ་གཉིས་ཉིན་མཉམ་འབྲེལ་རྒྱལ་ཚོགས་ཀྱི་ཝེ་ཡེ་ནཱའི་སྤྱི་ཁྱབ་པུའུ་ནས་ཚོགས། གྲོས་ཚོགས་ནས་རྒྱལ་སྤྱིའི་རྡུལ་ཕྲན་ནུས་པའི་ལས་ཁུངས་ཀྱི་ཉིང་རྡུལ་བདེ་འཇགས་བྱ་བའི་འཆར་གཞི་ལ་གྲོས་ཞིབ་བྱས།

རྒྱལ་སྤྱིའི་རྡུལ་ཕྲན་ནུས་པའི་ལས་ཁུངས་ཀྱི་སྤྱི་ཁྱབ་ལས་འཛིན་པ་ཐེན་ཡེ་ཀྲི་མུས་ཀྱིས་ཉིན་དེར་མགོ་རྩོམ་པའི་མཛད་སྒོའི་སྟེང་བཤད་རྒྱུར། ལས་འཛིན་ལྷན་ཚོགས་ལ་གྲོས་ཞིབ་བྱེད་པར་སྤྲོད་རྒྱུ་ཡིན་པའི་ཉིང་རྡུལ་བདེ་འཇགས་བྱ་བའི་འཆར་གཞི་དེ་འཛམ་གླིང་ཡོངས་ཀྱི་ཉིང་རྡུལ་བདེ་འཇགས་འགན་སྲུང་དང་ཐག་གཅོད་ཆུ་ཚད་ཇེ་མཐོར་གཏོང་བ་དང་། མང་ཚོགས་ཀྱི་ཉིང་རྡུལ་ནུས་པའི་མདུན་ལྗོངས་ཐད་ཀྱི་ཡིད་ཆེས་སླར་གསོ་བྱེད་པར་ཕན་པ་ཡོད་ཟེར།

འཇར་པན་ཧྥུའུ་ཏའོ་ཉིང་རྡུལ་ནུས་པའི་དོན་རྐྱེན་བྱུང་རྗེས། རྒྱལ་སྤྱིའི་རྡུལ་ཕྲན་ནུས་པའི་ལས་ཁུངས་ཀྱིས་ཟླ་དྲུག་པར་པུའུ་ཀྲང་རིམ་པའི་ཉིང་རྡུལ་བདེ་འཇགས་ཚོགས་ཆེན་བསྡུས་ཏེ་ཚོགས་ཆེན་བསྒྲགས་གཏམ་ལ་གྲོས་འཆམ་བྱུང་། རྒྱལ་སྤྱིའི་རྡུལ་ཕྲན་ནུས་པའི་ལས་ཁུངས་ཀྱི་དྲུང་ཡིག་ཁྲུའུ་ཡིས་བསྒྲགས་གཏམ་དེ་དང་ཁོངས་གཏོགས་རྒྱལ་ཁབ་དག་གི་ཁས་ལེན་ལྟར་དུ། ཉིང་རྡུལ་བདེ་འཇགས་བྱ་བའི་འཆར་གཞི་གཏན་འབེབས་བྱས་ཏེ། འཛམ་གླིང་ཡོངས་ཀྱི་ཉིང་རྡུལ་བདེ་འཇགས་ལ་དཔྱད་འཇོག་དང་། ཉིང་རྡུལ་བདེ་འཇགས་ཀྱི་ཚད་གཞི་གཏན་འབེབས། ཉམས་ཉེན་མྱུར་དུ་ཐག་གཅོད་པ་སོགས་ཀྱི་ཐད་ལེགས་བཅོས་བྱེད་པའི་སྲིད་ཇུས་བཏོན།

གལ་ཏེ་ཉིང་རྡུལ་བདེ་འཇགས་བྱ་བའི་འཆར་གཞི་དེ་ལ་ལས་འཛིན་ལྷན་ཚོགས་ཀྱི་གྲོས་ཚོགས་ནས་གྲོས་འཆམ་བྱུང་ནས། ཟླ་དགུ་བའི་ཚེས་བཅུ་དགུ་ཉིན་ནས་ཚེས་ཉེར་གསུམ་ཉིན་བར་བསྡུ་རྒྱུ་ཡིན་པའི་རྒྱལ་སྤྱིའི་རྡུལ་ཕྲན་ནུས་པའི་ལས་ཁུངས་ཀྱི་ཁོངས་གཏོགས་རྒྱལ་ཁབ་ཀྱི་ཚོགས་ཆེན་ལ་སྤྲད་དེ་གྲོས་ཞིབ་བྱས་ནས་གྲོས་མཐུན་འགོད་རྒྱུ་རེད།