ཟླ་དགུ་བའི་ཚེས་བཅུ་གཅིག་ཉིན། ཨ་མེ་རི་ཁའི་ཉིག་ཡོ་གྲོང་ཁྱེར་གྱི་འཛམ་གླིང་ཉོ་ཚོང་ལྟེ་གནས་ཀྱི་དགུ་བའི་བཅུ་གཅིག་ཉིན་གྱི་འཇིགས་སྐུལ་འཇབ་རྒོལ་དོན་རྐྱེན་ལ་རྗེས་དྲན་བྱེད་པའི་གླིང་ག་ན། དགུ་བའི་བཅུ་གཅིག་ཉིན་གྱི་འཇིགས་སྐུལ་འཇབ་རྒོལ་དོན་རྐྱེན་བྱུང་ནས་ལོ་བཅུ་འགོར་བའི་རྗེས་དྲན་བྱ་འགུལ་ལ་ཞུགས་པའི་ཨ་མེ་རི་ཁའི་ཙུང་ཐུང་ཨོ་པཱ་མཱ་ཡིས་ཤི་བོའི་མིང་བཀོད་པའི་བྱང་བུར་ལག་པས་རེག་བཞིན་མྱ་ངན་བྱེད་བཞིན་པ།
དགུ་བའི་བཅུ་གཅིག་ཉིན་གྱི་འཇིགས་སྐུལ་འཇབ་རྒོལ་དོན་རྐྱེན་བྱུང་ནས་ལོ་བཅུ་འགོར་བའི་རྗེས་དྲན་བྱ་འགུལ་དེ་ཚེས་བཅུ་གཅིག་ཉིན་ཨ་མེ་རི་ཁའི་ཉིག་ཡོ་གྲོང་ཁྱེར་གྱི་འཛམ་གླིང་ཉོ་ཚོང་ལྟེ་གནས་ཀྱི་ཤུལ་དུ་ཡོད་པའི་རྗེས་དྲན་ཁང་ནས་སྤེལ། ཤི་བོའི་ཁྱིམ་མི་དག་གིས་གཉེན་ཉེ་དག་གི་རུས་མིང་འདོན་བཞིན་ཤི་བོར་མྱ་ངན་ཞུས།རྗེས་དྲན་བྱ་འགུལ་ལ་ཞུགས་པའི་མི་རྣམས་ཀྱིས་སོ་སོར་དུས་ཚོད་བརྒྱ་དང་སྐར་མ་ཞེ་དྲུག་དང་། དུས་ཚོད་དགུ་དང་སྐར་མ་གསུམ། དུས་ཚོད་དགུ་དང་སྐར་མ་སོ་བདུན། དུས་ཚོད་དགུ་དང་སྐར་མ་ང་དགུ། དུས་ཚོད་བཅུ་དང་སྐར་མ་གསུམ། དུས་ཚོད་བཅུ་དང་སྐར་མ་ཉེར་གཅིག་བཅས་ཀྱི་སྟེང་། འཇིགས་སྐུལ་ཉེས་ཅན་གྱིས་གནམ་གྲུ་བཀོལ་ནས་འཛམ་གླིང་ཉོ་ཚོང་ལྟེ་གནས་ཀྱི་ཐོག་ཁང་ལ་ཐོ་བརྒྱབ་པ་དང་། ཟུར་ལྔའི་ཐོག་ཁང་ཆེན་མོར་ཐོ་བརྒྱབ་པ། ཐོག་ཁང་གཉིས་ལོག་པ་སོགས་དུས་སྐབས་གལ་ཆེན་དྲུག་ལ་ཤི་བོར་མྱ་ངན་ཞུས།ཨ་མེ་རི་ཁའི་ཙུང་ཐུང་ཨོ་པཱ་མཱ་དང་། སྔོན་ཆད་ཀྱི་ཙུང་ཐུང་པུའུ་ཧྲི། ཉིག་ཡོ་ཡི་ཀྲིག་ཀྲང་ཁི་མའོ། ཉིག་ཡོ་གྲོང་ཁྱེར་གྱི་ཧྲི་ཀྲང་པུའུ་ལུང་པོ་ཀི་སོགས་རྗེས་དྲན་བྱ་འགུལ་ལ་ཞུགས་ཀྱང་ཚང་མས་དངོས་གཞིའི་གཏམ་བཤད་མ་སྤེལ།རྗེས་དྲན་བྱ་འགུལ་དེ་དོགས་ཟོན་ཆེན་པོའི་ཁྲོད་སྤེལ་བ་རེད། ཉིག་ཡོ་གྲོང་ཁྱེར་གྱི་ཉེན་རྟོག་ཕྱོགས་ཀྱིས་གལ་ཆེ་བའི་ཟམ་པ་དང་ཕུག་ལམ། འགྲིམ་འགྲུལ་ལྟེ་བ། དུས་སྐབས་ཐང་ཆེན་སོགས་ས་ཁུལ་དུ་བདེ་འཇགས་ཞིབ་བཤེར་ས་ཚིགས་བཙུགས་པ་དང་། མན་ཧཱ་ཏོན་གྱི་བར་སྣང་དུ་དུས་ངེས་མེད་དུ་དམག་བཀོལ་གྱེན་འཕུར་གནམ་གྲུས་ལྡིང་བསྐོར་བྱེད་བཞིན་ཡོད།