ཞིན་ཧྭ་གསར་འགྱུར་ཁང་གི་གློག་འཕྲིན་ལྟར། ལེ་པཱ་ནུན་དུ་སྡོད་པའི་མཉམ་འབྲེལ་རྒྱལ་ཚོགས་ཀྱི་དམིགས་བསལ་མཐུན་སྦྱོར་པ་ཝེ་ལིན་སི་ཡིས་ཚེས6ཉིན་ལེ་པཱ་ནུན་གྱི་རྒྱལ་ས་པེ་རུ་ཐི་ནས་ནན་གྱིས་བསྟན་དོན། ཨ་རབ་ས་ཁུལ་དུ་འགྱུར་ལྡོག་ཆེན་པོ་བྱུང་བའི་གནས་ཚུལ་འོག ལེ་པཱ་ནུན་གྱི་བདེ་འཇགས་དང་བརྟན་འཇགས་ལ་སྲུང་སྐྱོབ་བྱེད་པའི་དགོས་པ་ཡོད་ཟེར།

ཝེ་ལིན་སི་ཡིས་ཉིན་དེར་ལེ་པཱ་ནུན་གྱི་ཙུང་ལི་མུས་ཁཱ་ཐིས་དང་གྲོས་མོལ་བྱས། ཕྱོགས་གཉིས་ཀྱིས་གཙོ་བོ་ཀྲུང་ཏུང་ས་ཁུལ་དང་ཁྱད་པར་དུ་ལེ་པཱ་ནུན་གྱི་གནས་བབ་དང་ལེ་པཱ་ནུན་གྱིས་མི་འགྱངས་པར་མཉམ་འབྲེལ་རྒྱལ་ཚོགས་བདེ་འཇགས་ལས་འཛིན་ལྷན་ཚོགས་ཀྱི་རེས་སྐོར་ཀྲུའུ་ཞིའི་འགན་ཁུར་བ་སོགས་ཀྱི་གྲོས་གཞི་ལ་གྲོས་བསྡུར་བྱས།

ཝེ་ལིན་སི་ཡིས་གྲོས་མོལ་བྱས་རྗེས་གསར་འགྱུར་ལས་རིགས་ལ་གཏམ་བཤད་སྤེལ་ཏེ། ལེ་པཱ་ནུན་གྱི་བདེ་འཇགས་དེ་བདེ་འཇགས་ལས་འཛིན་ལྷན་ཚོགས་ཀྱི་གྲོས་ཆོད1701ལ་འབྲེལ་ཡོད་པ་དང་། ལོ་ངོ་ལྔའི་རིང་ལ། གྲོས་ཆོད་དེས་ལེ་པཱ་ནུན་གྱི་བརྟན་འཇགས་ལ་སྲུང་སྐྱོབ་བྱས་ལ། ཁྱད་པར་དུ་ལེ་པཱ་ནུན་དང་དབྱི་སི་རལ་གྱི་རྒྱལ་མཚམས་ས་ཁུལ་གྱི་བརྟན་འཇགས་ལ་སྲུང་སྐྱོབ་བྱས་ཡོད། ཁོ་རང་ལེ་པཱ་ནུན་སྲིད་གཞུང་གིས་གྲོས་ཆོད་དེ་མུ་མཐུད་དུ་ལག་བསྟར་བྱེད་པར་སྤྲོ་བ་ཆེན་པོ་སྐྱེས་ཡོད་ཟེར།