ཟླ9བའི་ཚེས7ཉིན་གྱི་དགོང་མོར། མཱ་ལེ་ཞི་ཡཱའི་ཅི་ལུང་ཕའོ་རྒྱལ་སྤྱིའི་གནམ་གྲུ་ཐང་ནས། ཕཱ་ཁི་སི་ཐན་རྒྱལ་སྤྱིའི་མཁའ་འགྲུལ་ཀུང་ཟིའི་འགྲུལ་སྐྱེལ་གནམ་གྲུ་ཞིག་ལ་ཉེན་རྟོག་པས་ཞིབ་བཤེར་བྱེད་བཞིན་པ། ཕཱ་ཁི་སི་ཐན་རྒྱལ་སྤྱིའི་མཁའ་འགྲུལ་ཀུང་ཟིའི་འགྲུལ་སྐྱེལ་གནམ་གྲུ་ཞིག་ལ་ཉིན་དེར་འགད་རྫས་ཀྱིས་འཇིགས་སྐུལ་ཐེབས་ཏེ། མཱ་ལེ་ཞི་ཡཱའི་ཅི་ལུང་ཕའོ་རྒྱལ་སྤྱིའི་གནམ་གྲུ་ཐང་དུ་བབས་པ་དང་། འགྲུལ་བར་གནོད་སྐྱོན་ཅི་ཡང་མ་བྱུང་། མཱ་ལེ་ཞི་ཡཱའི་ཉེན་རྟོག་ཕྱོགས་ཀྱིས་རྟོག་ཞིབ་བྱས་རྗེས་སྐྱོན་ཅི་ཡང་མེད་པ་བདེན་དཔང་བྱས།

ཞིན་ཧྭ་གསར་འགྱུར་ཁང་གི་གློག་འཕྲིན་ལྟར། ཕཱ་ཁི་སི་ཐན་རྒྱལ་སྤྱིའི་མཁའ་འགྲུལ་ཀུང་ཟིའི་འགྲུལ་སྐྱེལ་གནམ་གྲུ་ཞིག་ལ་ཚེས7ཉིན་འགད་རྫས་ཀྱི་འཇིགས་སྐུལ་ཐེབས་ཏེ། མཱ་ལེ་ཞི་ཡཱའི་ཅི་ལུང་ཕའོ་རྒྱལ་སྤྱིའི་གནམ་གྲུ་ཐང་དུ་བབས།

ཅི་ལུང་ཕའོ་རྒྱལ་སྤྱིའི་གནམ་གྲུ་ཐང་གིས་འདོན་སྤྲོད་བྱས་པའི་གནས་ཚུལ་ལྟར་ན། ཕཱ་ཁི་སི་ཐན་གྱི་ལཱ་ཧཱ་ཨར་ནས་ཅི་ལུང་ཕོ་རུ་འཕུར་བའི་འགྲུལ་སྐྱེལ་གནམ་གྲུ་དེའི་སྟེང་འགྲུལ་བ164ཡོད་པ་དང་། འགྲུལ་སྐྱེལ་གནམ་གྲུ་འཕུར་བཞིན་པའི་སྐབས་སུ་ཕཱ་ཁི་སི་ཐན་རྒྱལ་སྤྱིའི་མཁའ་འགྲུལ་ཀུང་ཟི་ལ་འབྱོར་བའི་རྡུལ་ཕྲན་སྦྲགས་ཡིག་ཅིག་ལས་འགྲུལ་སྐྱེལ་གནམ་གྲུ་དེའི་སྟེང་འགད་རྫས་བཞག་ཡོད་པར་བཤད། འགྲུལ་སྐྱེལ་གནམ་གྲུ་དེ་ཅི་ལུང་ཕའོ་རྒྱལ་སྤྱིའི་གནམ་གྲུ་ཐང་དུ་བབས་རྗེས། འགྲུལ་བ་ཚང་མ་མྱུར་མོར་གནས་གཞན་དུ་བསྐྱལ་བ་རེད། ཉེན་རྟོག་ཕྱོགས་ཀྱིས་འགྲུལ་སྐྱེལ་གནམ་གྲུའི་ནང་དུ་ཞིབ་བཤེར་ནན་མོ་བྱས་ཀྱང་འགད་རྫས་མ་རྙེད་ཟེར།

བསྒྲགས་པའི་གནས་ཚུལ་ལྟར་ན། ཕཱ་ཁི་སི་ཐན་རྒྱལ་སྤྱིའི་མཁའ་འགྲུལ་ཀུང་ཟིའི་དབྱིན་ཇིའི་མན་ཆེ་སི་ཐི་རུ་འཕུར་བའི་གནམ་གྲུ་ཞིག་ལའང་དེ་མཚུངས་ཀྱི་འགད་རྫས་ཀྱིས་འཇིགས་སྐུལ་ཐེབས་ཏེ། གནམ་གྲུ་དེ་གནས་སྐབས་སུ་ཐུར་ཁེ་རྒྱལ་ཁབ་ཀྱི་དབྱི་སི་ཐན་པུའུ་ཨར་གནམ་གྲུ་ཐང་དུ་བབས་པ་རེད་ཟེར།  །