ཞིན་ཧྭ་གསར་འགྱུར་ཁང་གི་གློག་འཕྲིན་ལྟར།ལི་པུ་ཡཱའི་ངོ་རྒོལ་ཕྱོགས་ཁག་གི་རྒྱལ་ཡོངས་བར་བརྒལ་ཨུ་ཡོན་ལྷན་ཁང་གི་གྲོས་མོལ་འགན་ཁུར་བ་ཁན་ཞི་ལེ་ཡིས་ཚེས4ཉིན་ཁྱབ་སྒྲོག་བྱས་དོན། ངོ་རྒོལ་ཕྱོགས་ཁག་གིས་ཏི་ལེ་པོ་ལི་ཤར་ལྷོ་ཕྱོགས་ཀྱི་སྤྱི་ལེ་བརྒྱ་ལྷག་གི་མཚམས་སུ་ཡོད་པའི་པེད་ནེ་བོ་ལེ་ཏི་གྲོང་ཁྱེར་ནས་ཁཱ་ཀྲ་ཧྥེ་ཡི་དམག་དཔུང་ལྷག་མར་མགོ་སྒུར་བར་སྐུལ་བའི་གྲོས་མོལ་ལ་མཇུག་འབྲས་མ་ཐོབ་ཟེར།

ཁན་ཞི་ལེ་ཡིས་ཉིན་དེར་གསར་འགྱུར་སྤྱི་སྒྲོག་ཅིག་ལས་བཤད་རྒྱུར། ཁཱ་ཀྲ་ཧྥེ་ལ་བློ་དཀར་བའི་དམག་དཔུང་གིས་ངོ་རྒོལ་ཕྱོགས་ཁག་གིས་མཚོན་ཆ་ཅི་ཡང་མི་འཛིན་པར་པེད་ནེ་བོ་ལེ་ཏི་གྲོང་ཁྱེར་དུ་འགྲོ་དགོས་པའི་རེ་བ་བཏོན་པ་དང་། ཁོ་ཚོའི་གྲོས་མོལ་གྱི་དམིགས་ཡུལ་ནི་གསར་བརྗེའི་སྟོབས་ཤུགས་རྩ་མེད་དུ་གཏོང་བའི་ཆེད་དུ་ཡིན་པ་མངོན་གསལ་ཡིན་པས། ང་ཚོས་དང་ལེན་མ་བྱས་ཟེར། ཁོས་ད་རུང་བསྟན་དོན། ཁཱ་ཀྲ་ཧྥེ་དང་ཁོའི་ཁྱིམ་མི་ཉེ་སྔོན་པེད་ནེ་བོ་ལེ་ཏི་རུ་སོང་མྱོང་བ་དང་། དེའི་ནང་མི་རེ་འགའ་རྗེས་སུ་གནས་དེར་ཁ་བྲལ་ཡང་། ཁཱ་ཀྲ་ཧྥེ་ཡི་བུ་སཱ་ཨ་ཏིས་དང་མུའུ་ཐཱ་ཞི་མུའུ་གཉིས་སྔར་བཞིན་གྲོང་ཁྱེར་དེར་ཡོད་སྲིད་ཟེར།

གྲོས་མོལ་ལ་མཇུག་འབྲས་ཅི་ཡང་མ་ཐོབ་པས་སྲིད་གཞུང་ལ་ངོ་རྒོལ་བྱེད་པའི་དྲག་ཆས་པས་མྱུར་དུ་གྲོང་ཁྱེར་དེར་དཔུང་འཇུག་བྱེད་མིན་གྱི་ཐད་ནས་ཁན་ཞི་ལེ་ཡིས་བཤད་རྒྱུར། དེ་ནི་ངོ་རྒོལ་ཕྱོགས་ཁག་གི་དམག་དོན་མགོ་ཁྲིད་པས་ཐག་གཅོད་བྱེད་དགོས་ཟེར། །