བསྒྲགས་པའི་གནས་ཚུལ་ལྟར་ན། ལི་པུ་ཡཱའི་རྒྱལ་ཡོངས་བར་བརྒལ་ཨུ་ཡོན་ལྷན་ཁང་གིས་ཚེས་གསུམ་ཉིན་ཁཱ་ཀྲ་ཧྥེ་ལ་བློ་དཀར་བའི་དྲག་ཆས་པར་ཆེས་མཇུག་མཐའི་ཐ་ཚིག་བསྒྲགས་པ་དང་། གཟའ་འཁོར་གཅིག་གི་དུས་ཚོད་ནང་དུ་ཁོ་ཚོ་མགོ་སྒུར་དགོས་པའི་རེ་བ་བཏོན། དེའི་ཞོར་ལ་ངོ་རྒོལ་ཕྱོགས་ཁག་གིས་རྒྱལ་ཁབ་ཀྱི་ཆབ་སྲིད་སྒྲིག་གཞི་འཛུགས་པའི་གོམ་སྟོབས་ཇེ་མགྱོགས་སུ་བཏང་།ལི་པུ་ཡཱའི་རྒྱལ་ཡོངས་བར་བརྒལ་ཨུ་ཡོན་ལྷན་ཁང་གི་ཀྲུའུ་ཞི་ཅཱ་ལེ་ལེ་ཡིས་ཚེས་གསུམ་ཉིན་པན་ཅཱ་ཞི་ནས་བཤད་རྒྱུར། ངོ་རྒོལ་ཕྱོགས་ཁག་གིས་སུའུ་ཨར་ཐི་དང་། པེད་ནེ་བོ་ལེ་ཏི། ཀྲུའུ་ཧྥུའུ་ལ། སའེ་པུའུ་ཧཱ་བཅས་མཁར་གྲོང་བཞིའི་ཁཱ་ཀྲ་ཧྥེ་ཡི་དྲག་ཆས་དམག་དཔུང་ལྷག་མས་ཟླ་དགུ་བའི་ཚེས་བཅུ་ཉིན་གྱི་སྔོན་ལ་མཚོན་ཆ་སྤྲད་དེ་མགོ་སྒུར་དགོས་པའི་རེ་བ་བཏོན་པ་དང་། མགོ་མི་སྒུར་བའི་དྲག་ཆས་པ་རྩ་མེད་དུ་གཏོང་རྒྱུ་ཡིན་ཟེར།ཚེས་གཅིག་ཉིན་ཁཱ་ཀྲ་ཧྥེ་ཡིས་སྤྱི་ཁྱབ་པུའུ་སི་རི་ཡཱ་རུ་ཡོད་པའི་གླེང་ཕྱོགས་ཞེས་པའི་བརྙན་འཕྲིན་ཁང་བརྒྱུད་དེ་དུས་ཚོད་ཉེར་བཞིའི་ནང་ཐེངས་གཉིས་ལ་སྒྲ་ཕབ་གཏམ་བཤད་སྤེལ་ཏེ། ཁོའི་རྒྱབ་སྐྱོར་མཁན་གྱིས་དགྲ་བོ་རྩ་མེད་དུ་གཏོང་བ་དང་མི་སེར་སྤེལ་མཁན་མཐར་སྐྲོད་གཏོང་དགོས་པ་འབོད་སྐུལ་བཏང་། ཁོས་བཤད་རྒྱུར། ལི་པུ་ཡཱའི་ཕོ་མོ་ཚང་མས་མེས་པོ་དག་དང་མཉམ་དུ་མི་སེར་སྤེལ་མཁན་ལ་འགོག་རྒོལ་བྱས་ཏེ། དུས་ཡུན་རིང་བོའི་འཐབ་འཁྲུག་བྱེད་པར་གྲ་སྒྲིག་བྱེད་དགོས་ཟེར།