ཞིན་ཧྭ་གསར་འགྱུར་ཁང་གི་གློག་འཕྲིན་ལྟར། མཉམ་འབྲེལ་རྒྱལ་ཚོགས་སུ་རྒྱུན་དུ་སྡོད་པའི་ལེ་པཱ་ནུན་གྱི་འཐུས་མི་སཱ་ལཱ་མུའུ་ཡིས་ཚེས2ཉིན་ཉིག་ཡོ་རུ་ཡོད་པའི་མཉམ་འབྲེལ་རྒྱལ་ཚོགས་སྤྱི་ཁྱབ་པུའུ་ནས་བཤད་རྒྱུར། ཟླ་འདིར་ལེ་པཱ་ནུན་གྱིས་བདེ་འཇགས་ལས་འཛིན་ལྷན་ཚོགས་ཀྱི་རེས་སྐོར་ཀྲུའུ་ཞིའི་འགན་ཁུར་བའི་སྐབས་སུ། བདེ་འཇགས་ལས་འཛིན་ལྷན་ཚོགས་ཀྱིས་གཙོ་བོ་ལི་པུ་ཡཱ་དང་སོ་མཱ་ལི། སུའུ་ཏན་སོགས་ཀྱི་གནད་དོན་ལ་གྲོས་བསྡུར་བྱེད་རྒྱུ་ཡིན་ཟེར།ལེ་པཱ་ནུན་གྱིས་ཟླ9བའི་ཚེས1ཉིན་རྒྱ་གར་གྱི་རྗེས་སུ་མཐུད་དེ་བདེ་འཇགས་ལས་འཛིན་ལྷན་ཚོགས་ཀྱི་ཟླ་འདིའི་རེས་སྐོར་ཀྲུའུ་ཞིའི་འགན་ཁུར་བ་རེད། སཱ་ལཱ་མུའུ་ཡིས་ཉིན་དེར་བསྡུས་པའི་གསར་འགོད་པའི་སྣེ་ལེན་ཚོགས་འདུའི་སྟེང་བཤད་རྒྱུར། ཟླ9བའི་ནང་མཉམ་འབྲེལ་རྒྱལ་ཚོགས་ཀྱི་དོན་ཆེན་ནི་མཉམ་འབྲེལ་རྒྱལ་ཚོགས་ཚོགས་ཆེན་སྐབས་རེ་དྲུག་པ་ཡིན་ཡང་། བདེ་འཇགས་ལས་འཛིན་ལྷན་ཚོགས་ཀྱིས་ཟླ་འདིར་སོ་མཱ་ལི་དང་། ཧེ་ཏིས། ཨ་ཧྥུའུ་ཧན་དུ་སྡོད་པའི་མཉམ་འབྲེལ་རྒྱལ་ཚོགས་ཀྱི་རོགས་སྐྱོར་ཚོགས་པ་བཅས་ལ་འབྲེལ་བའི་གྲོས་བསྡུར་ཚོགས་འདུ་སྤེལ་རྒྱུ་ཡིན་པ་དང་། དེ་ལས་གཞན་བདེ་འཇགས་ལས་འཛིན་ལྷན་ཚོགས་ཀྱིས་ད་རུང་སེ་ཕུའུ་ལུའུ་སི་དང་། སུའུ་ཏན། སུའུ་ཏན་ལྷོ་མ། ཀྲུང་ཏུང་། མཉམ་འབྲེལ་རྒྱལ་ཚོགས་ཀྱི་ལི་པུ་ཡཱའི་ཆེད་མངག་ཚོགས་པའི་འགན་ཡུན་ཇེ་རིང་དུ་གཏོང་བ་སོགས་གནད་དོན་ལ་གྲོས་བསྡུར་བྱེད་རྒྱུ་ཡིན་ཟེར།ལི་པུ་ཡཱའི་གནད་དོན་ཐད་ནས་སཱ་ལཱ་མུའུ་ཡིས་བཤད་རྒྱུར། བདེ་འཇགས་ལས་འཛིན་ལྷན་ཚོགས་ཀྱིས་ཟླ་འདིའི་ཚེས26ཉིན་ལི་པུ་ཡཱའི་གནད་དོན་ཐད་ནས་སྙན་ཞུ་ལ་ཉན་ཏེ་གྲོས་བསྡུར་བྱེད་རྒྱུ་གཏན་འཁེལ་བྱས་ཡོད་ཀྱང་། གཟའ་འཁོར་རྗེས་མར་བྲེལ་མྱུར་གྲོས་ཚོགས་ཤིག་བསྡུས་ཏེ་ལི་པུ་ཡཱའི་གནས་བབ་སྐོར་གྱི་སྙན་ཞུ་ལ་ཉན་ནས་གྲོས་བསྡུར་བྱེད་ཀྱང་སྲིད། སྐབས་སུ་མཉམ་འབྲེལ་རྒྱལ་ཚོགས་ཀྱི་དྲུང་ཡིག་ཆེན་མོ་ཕན་ཅི་བུན་ཕྱིར་ཉིག་ཡོ་གྲོང་ཁྱེར་དུ་ལོག་ཡོད་མེད་ལ་བལྟ་དགོས་ཟེར། ཁོས་བཤད་རྒྱུར། བདེ་འཇགས་ལས་འཛིན་ལྷན་ཚོགས་ཀྱིས་ལི་པུ་ཡཱའི་གནད་དོན་ཐད་བྱ་སྤྱོད་གང་རུང་སྟོན་སྲིད་ཀྱང་། མིག་སྔར་འབྲེལ་ཡོད་འཆར་ཟིན་གང་རུང་བདེ་འཇགས་ལས་འཛིན་ལྷན་ཚོགས་ལ་སྤྲད་མེད་ཟེར།  །