ཡོ་རོབ་གླིང་མནའ་འབྲེལ་ཨུ་ཡོན་ལྷན་ཁང་གིས་ཚེས་ཉེར་དགུ་ཉིན་གསལ་སྒྲོག་སྤེལ་ཏེ་བཤད་རྒྱུར། ཡོ་རོབ་གླིང་མནའ་འབྲེལ་གྱིས་ལི་པུ་ཡཱའི་རྒྱལ་ས་ཏི་ལེ་པོ་ལི་རུ་མི་ཆོས་རིང་ལུགས་རོགས་སྐྱོར་གྱི་གཞུང་སྒྲུབ་ཁང་བཙུགས་ཏེ། ལི་པུ་ཡཱ་རྒྱལ་ཁབ་ལ་ཟས་རིགས་དང་སྨན་རྫས། འཐུང་ཆུ་སོགས་རྒུད་སྐྱོབ་དངོས་རྫས་འདོན་སྤྲོད་བྱེད་པའི་འགན་ཁུར་བཞིན་ཡོད་ཟེར།གསལ་སྒྲོག་ལས་བཤད་རྒྱུར། ཡོ་རོབ་གླིང་མནའ་འབྲེལ་གྱིས་ཏི་ལེ་པོ་ལི་རུ་སྡེ་ཁག་མང་བོའི་ཆེད་མཁས་པས་གྲུབ་པའི་མི་ཆོས་རིང་ལུགས་ཀྱི་རྒུད་སྐྱོབ་ཚན་ཆུང་མངགས་གཏོང་བྱས་ཏེ་རྒུད་སྐྱོབ་དངོས་རྫས་དུས་ལྟར་སྟེར་བར་འགན་སྲུང་བྱེད་པའི་ཞོར་ལ། ཆེད་མཁས་པའི་ཚན་ཆུང་གིས་ད་རུང་ས་དེའི་མི་ཆོས་རིང་ལུགས་ཀྱི་གནས་ཚུལ་ལ་དཔྱད་འཇོག་བྱས་ནས་དུས་ལྟར་གནད་དོན་གསར་བ་ཐག་གཅོད་བྱེད་རྒྱུ་རེད།ཡོ་རོབ་གླིང་མནའ་འབྲེལ་གྱི་རྒྱལ་སྤྱིའི་མཉམ་ལས་དང་མི་ཆོས་རིང་ལུགས་རོགས་སྐྱོར་དང་ཉམས་ཉེན་ཐག་གཅོད་བྱེད་པའི་ཨུ་ཡོན་ཀི་ཨོ་ཨར་ཅི་ཡེ་ཝ་ཡིས་བཤད་རྒྱུར། ཁོ་མོས་ཆེས་སེམས་ཁུར་བྱེད་པ་ནི་ཏི་ལེ་པོ་ལིའི་མི་སེར་གྱི་བདེ་སྡུག་ཡིན་པ་དང་། ཡོ་རོབ་གླིང་མནའ་འབྲེལ་གྱི་ཆེད་མཁས་པས་ཤེས་རྟོགས་བྱུང་བ་ལྟར་ན། དེའི་སྔོན་ཏི་ལེ་པོ་ལི་རུ་སྨན་བཅོས་སྒྲིག་ཆས་དང་འཐུང་ཆུ་ཧ་ཅང་དཀོན་པར་བཤད། ཁོ་མོས་ཕྱོགས་སོ་སོས་འཁོན་ལན་སློག་པའི་འགུལ་བསྐྱོད་མཚམས་བཞག་སྟེ་རྒྱལ་སྤྱིའི་མི་ཆོས་བཅའ་ཁྲིམས་ལ་བརྩི་འཇོག་བྱེད་དགོས་པའི་འབོད་སྐུལ་བཏང་།